¹ Yude, mosali u Yesu klisito, pe monginena oya Kobo, bane betetaka bo pe bekundami a Mongalima ise, pe bebatelami po e Yesu klisito: ² Te bowaowa, hai pe lokundo iyale i fule ngino. ³ Bakundami baa, bune e kundji ngo pe ndja bokomeli unu esali likita li boumake boiso bolisanga ngo ngokoka ine lekeele unu po e bolendisi bolani po e boinoli ine iteeisea bo a basatu boinoli po libela. ⁴ Zambi baito bamoi betsi itani bakahola a sekele katikati eiso, bune e komi boo po e mokitesi tee kofelo, la bane bekela mbeko mbe eibo, pe belengesa ngolu e Mongalima oiso, a bokeli pite eibo pe a bowangani molakesi omoi oiso, pe Nkolo Yesu klisito. ⁵ Le kanesela unu, lane belembeli bakita bakita bane malamu mina Nkolo, mbuse boumesi baito pe bokofesi bo a moki iibo Ejipito, a kela kwalisiaka bombengesi bane betsi inoli; ⁶ A kisa bo kelekele po ebosambisi bane bekoyala wasa umoli a bobila bo libela a ndjima, ba andjelu bane betisusaki bomoto boibo, kasi bete tsika isikani iibo yo boyali: ⁷ Mina sondomo pe gomola pe bangemba biyangani, bane baka yaisiya beyaisi oine bo a pite pe a bombengesi bilongo biibo a bakita ba mwano, bakayaisia ndakisa, bekofilinga bo a yohe ine etsilimala. ⁸ Simi ko ngoyo, baito bo, bune e yaeesi bo a basema, beluesa bilongo mbindo, bembengesa lokumu pe pobotangoli lokulu. ⁹ Ndjokande, mokondji u bandjelu mikaele, une eekana ye a ndjabulu, po e bilongo bi Mose pe belutana, e tsimotangakoli, emoli e moekeli sanga ine: Nkolo e mopamale! ¹⁰ Bo, a bokesini, beeka a ndenge e batangakoli bane betseyembeli yema, pe beyafuta la bane beembeli a bokanesi pamba oine lifuti. ¹¹ Bawaowa a bo, zambi bakabila ndole e kaina, beyafingi po e lifuti kati e boungesami i Balama, betayaungesa po e te tomboka bo i kola. ¹² Bayali baito ba boeisi ane e hola bo a bafete ine i kela bo feti a esikani etsokoyala bosambo, pe kanesa sanga sanga likita liibo batuke. I yali ba loola lone lolumbi baye, mopepe nde eelesa wo; imoli iyali oine mote etiota simi ngonga e booti mbuma, mbala yele bowei, e kopikolama: ¹³ Oine baye ba mokwa lieli, botusesi mbeo iibo isoni; iyali oine tontofi li boelali to bisikani kwitu, imoli Mongalima a kakenga isika bo eibo seko katikati e lilima line lisusami po elibela. ¹⁴ Po e moli Enoka mito e sumba tuele pe a Adama, e tesakola ine: lita Nkolo e yeli a basatu bwaye kotu. ¹⁵ Po bakele basambisi baito kwatu, pe boisi bane beyali a mbeko mbe a kati eibo, a bakita kwitu i mabe ikeli bo pe baoi i botangakoli bone botetanga kola bo ye i ya sumu. ¹⁶ Beyali baito bane bei mama, bane bayeka sanga bo batuke beeyala sanga a biposa biibo batuke, amenua biibo baloba bookosi, beinola baito basiaka po elifuti. ¹⁷ Kasi unu, bakundani baha, bokanesi baoi eteka felo a ba postolu ba Nkolo eiso Yesu klisito. ¹⁸ Bete eekela unu ine abaose bambuse yokoyala baooli beyeli, bekoyela sanga a biposa iibo i mabe; ¹⁹ Baye bane betoesesa bo fakani, boito betsikoli molimo. ²⁰ Po eino, bakundani baa, boyalendesi unu batuke likolo li boinili bosatu boino, pe bosambeli a molimo mosatu, ²¹ Simiko ane unu kati e lokundu lo Mongalima a bokongaka bowaowa bo Nkolo Yesu klisito po e boumi boseko. ²² Bokokele bane ulesela bamoi bane beemaeli; ²³ Oumesi bamoi a batusesi a yowe; pe po a basiaka lokola, bokele oyo a boangi, bebai a sembo beyangani a boangi boini tiii a tulu ine ibebi a monio ²⁴ Ndjokonde, a lano e koki bobateli unu a bokwei kwitu pe bokeli boenesi unu felo kembo lilahe line li tsokowa pe kati ebonangeli. ²⁵ A Mongalima ye matuke, e tumesi, boumesi boiso a Yesu klisito Nkolo ieso, bangale a lokulu pe nguya bandafelo e tango ngiaa pe sikane pe kati ebikeke ngiaa. Kooyo