¹ La oyo, bangwaya, bosambele po e iso, po ine liohi li Nkolo litsangane pe liyale nkembo ko une eyali lio ngino, ² pe tsina ine twandolame ngi baito ba mombelemu pe bambembe po ine kwatu betsiki bwinoli. ³ Nkolo ebayi mwinoli ekokembesa ombe onu pe ekofetesa ombe onu ngi molimo u mbembe. ⁴ Tobayi a bwinoli katsi e Nkolo ine bokela pe bokela ombe bima bine bitoma osu onu. ⁵ Mina ine Nkolo akambe metema myaino mwatsi u loondo lo Mongalima pe mwatsi wi iyaala i Klisto. ⁶ Totoma onu, bango aya, a lina li Nkolo e iso Yesu Klisto boyali yesika amonginena ano uma katsi lyenge pe ta une eteukolaka onu bateya ngi iso. ⁷ Bolembeli onu bangine iya ekoki onu botomeholi osu, po ine totsitumaka katsi e ino a lyenge. ⁸ Totsitelaka ifoe yo okunda i mito, kasi, katsi e yesili pe lumbe, toteyelaka botso pe mwasa a lotomo po ine totsiyale a moliko u mito omyi o ino. ⁹ Itsiteyalaka te ine totsiyalaki a likoki, kasi tokundaki bwangi onu la osu mangine yelenge ye bomekoli. ¹⁰ Po ine tango ene eyalaki osu ngi ino, totekelaka onu a nko: la mito omoyi etsikundji bokeli yesili, atsile pe aisia. ¹¹ Tokoka mbala emoyi, ine bomoyi katsi eino bane biuma a lyenge, bane betsikela yesili, kasi beyaisia a bima bitsiki tsina. ¹² Twetaka baito wo balwe pe tolonga wo la Nkolo Yesu Klisto, a bolei ifoe yaibo mangine, la bokeli yesili la hai. ¹³ Po eino bango aya solemba bokeli wali. ¹⁴ Pe la mito omoyi etsitosi ine yeeka osu a yene yesali, sila noti lo, pe so sohola a lae tsina ine aoke bosambo. ¹⁵ So molita aine monguna, kasi molembelsia aine mongo inena. ¹⁶ Mina ine Nkolo e bohai ayaesi onu ye motuke bo hai a tango kwetu, a lolenge ko lo tu. Mina Nkolo ayale a ino ngia. ¹⁷ Ngo aya onu okalo, ngo Polo, a lifindji lila mangine, ebayi elo sinyatile e la a bisala ngia biye, koyo nga ekome ngo. ¹⁸ Mina ine lisungi li Nkolo e iso Yesu Klisto liyale a ino kwatu. Ko oyo.