¹ Polo, pe Silife, pe Timoté, a mbele e Mongalima e Batesaloniki, nda ebai la Mongalima Aha oiso pe la Yesu Klisito Kolo, ² Ine ngolu pe la hai ba yenaeli onu a ndole e Mongalima Aha o iso pe Kumi Yesu Kilisito. ³ Tokoki ine a lo beko lo hahe mongwaya, bo ulesi bambela la kombo e ngolu ngi Mongalima lokola ebayi yo la bosembo. Po ine bwinoli bohaho bokela bakita bafulaku. pe ine la lokundo lo omoyi kati e ino kwatu la bane balitsi bosio i sumbelia mingi mingi. ⁴ Tooko yakumesia po e ino kati kati e ba Ekelesia e Mongalima, likita li ihala ihaho pe la boinoli bo haho kati e minyoko pe la metungisi ine inangi oye motema. ⁵ Ibayi yemekeli yu nani la yesambeseli ye Mongalima po ine bo sambesame wali a bokumi bo Mongalima pe ndenge e nyokwama oye. ⁶ Po iné ibayi a bosambesami bo Mongalima e bohulesi minyoko ngu bane be nyokolo onu. ⁷ Pe la bwaesa onu la onu bane bahoi a bonyokwami, la bohomi la iso, henina ye Kolo e yenesia ombe likolo la ba andjelu la ngolu elahe, ⁸ lolame la yohé po e botumboli bane betsi lembeli Mongalima pe la bane betsi tosa Mboli ndjale i Kolo e iso Yesu. ⁹ Bee eko ukola lokola yetumbu bobebisami bo libela-la libela, yesika la bosio bo Kolo pe la ngolu a lokulu lo hayi, ¹⁰ Tango eeko lwa ye po akumisame kati e basantu ba hahe pe bwinolami umoli mwasa kati e bane behinola, po iné litatoli lia iso ngino litsi te tatolama. ¹¹ La tina emoli osu pe tosambela mekombe la mekombe po elaho aine Mongalima waiso asile oye a bakita baa iitanaka pe aenanesi langolungia banebelitsi lokundo lohahe pe la mesala mahahe, ¹² po iné lina li Kolo eiso Yesu li kumisame kwaho, pe iné oye o kumesame la yee la yelenge ye ngalasia i Mongalima wa iso pe u Kolo Yesu Klisito.