¹ Polo, Silive, kwa Timoté, kati e lingomba li Tesalonike, ine ibayi kati e Mongalima pe Kolo Yesu Klisito: mina ete ngolu pe hayi e esamele onu. ² Toulesi sanga ngolu batondi ngu Mongalima po e ino ngia, ba ise onu kati e sambo e iso, ³ la bolandenesi yesili me boinoli boino, yesili ye lokundo laino, pe e yelikia eino ngu Kolo Yesu Klisito e iso, felo e Aha Mongalima e iso. ⁴ Bolembeli bangwa aya, ba lokundo ba Mongalima po ete onu bote haka ba ponomi. ⁵ Mboli i Mongalima e iso betsi teekelaka onu sanga baoyi pamba, kasi la ngulu e bokulesi mbeko ndjale, bi yaaki elo ngino po e bolamu e ino. ⁶ Pe onu matuke, bote yalaki ba mekoli owa po baane ba Kolo la boukoli liloba loo o kati o mitungisi ofela a lolenge lone kwa kamo li molimo. ⁷ Sikane onu boka kwa ba mekoli ba baito ngia bene be inoli baa Macedoni pe baa Akaya. ⁸ Taa soko lioyi li Kolo o ino ebeka ngino a Masedonia pe a Akaya. Kasi boinoli la boino ba Mongalima ika lembelana bisikani kwetu, a lolenge lone osu totsi bayi a tina e boeki. ⁹ po ine beheka a tina eiso, awo ndingisa toukalaki kelekele e ino pe ao ndenge e bongwanaki onupo e Mongalima la botsiki ba zambe zambe po e bokeeli Mongalima u bomoyi, pe boo solo. ¹⁰ Pe,po e bokongi mona o wae alue helo a likolo ano e sekwi ngi bawei, Yesu, ye mito eo ko kofesa onu o Kandja line liyele.