¹ A ine ilitsi bofako ba yelimo, inzikunzi ine, bangwaya, botsiyale a bolembeli, ² bolembeli ine eteyalaka onu mepakano, boteyatsikaka bokei ngi bikeko bitsieka, kwene ndenge etetolamaka onu. ³ La tsina emotsi leekela onu 'te ata mito omoi, leeka la yelimo ye Mongalima, etseeka: Yesu aumakane! Mpe mito omoi etsikoki boeki: Yesu ebayi Nkolo! Litsibayi soko la yelimo ye tsangaa ⁴ Bafako bebayi bilenge a bilenge, kasi yelimo ko yemoi; ⁵ Mesala ndenge a ndenge, kasi Mongalima kumoi ukela ngia katsi e kwitu. ⁶ Ainzi yelimo yanoyenesia ngi mito a mito fuko e litomba limoi oyo. ⁷ La omoi, yelimo yekamwaya lyoi li wanya, a osiaka lyoi li boeki bayele, bolandemi a yo yelimo ko yemoi. ⁸ A osiaka, bwinoli, kwa yo yelimo, a osiaka, lifako li bumesi batatsi, kwa yo yelimo; ⁹ A osiaka, lifako li bokeli bikamweseli, a osiaka bisakweli, a osiaka bososolake bo bahoyi ba yelimo, ¹⁰ a omoi, boeki menwa ndenge a ndenge, a osiaka, bolimboli menwa. ¹¹ Yelimo ko yemoi yo yekela bio bima ngia, a bofaki ngi mito kune ekunzi yee. ¹² Fuko ine, kune eyali bilongo ko imoi mpe bibayi la bifinzi bofela, mpe kune ebayi bio bifinzi bi bilongo, ata kune ebayi motango waibo, ikeli soko yelongo ko yemoi, la oyo mpe ebayi Kilisito. ¹³ Totebatesamaka osu kwatu katsi e yelimo ko yemoi, fuko e bokeli yelongo yemoi, ata meyuda, ata ba Geleki, ata metuke, ata melombo mpe tonwesami osu ngia la baye ba yelimo kumoi ¹⁴ Oyo, bilongo bitsibayi yefinzi yemoi ye bilongo, kasi bikelami la bifinzi bofela bi bilongo. ¹⁵ La mokele wekaki: mpo ine inzibayi ndala, nzilwei a bilongo; utsilwei a bilongo mpo emotsi? ¹⁶ Mpe la litoi likaeka: nziyali liso, nziyali yefinzi ye bilongo. Litsiyali yefinzi ye bilongo fuko emotsi? ¹⁷ La bilongo mobimba byayalaka liso,kohe akokaka boyali bookoki? Layalaka mobimba bookoki, kohe akokaka buumbi lumba boyali? ¹⁸ Sikene Mongalima etisa yefinzi a yefinzi yee binama a bilongo kune etekundaka yee. ¹⁹ La bifinzi kwitu biteyalaka yeteni ko yemoi, kohe akokaka bilongo boyali? ²⁰ Sikene bifinzi bi bilongo bibayi bofela, mpe bilongo ko bimoi; ²¹ Liso litsikoki boeki a ndala: nziyali a posa elao; ata moto boeki a mokele: nziyali a tsina elao? ²² Kasi wali mbuse, bifinzi bi bilongo bieneni la bolembu biyali a litomba? ²³ Mpe bifinzi bi bilongo bine byenakola osu ine bibayi a lokumu moke, toayakola bimotsi lokumo bweteli. Bongo bifinzi bi bilongo la lokumu moke biukola lokumu bweteli. ²⁴ Nzokande bine bi lokumo bitsiyali a lo posa. Mongalima etepanga bilongo a yelenge ine aisii lokumo e bine bifinzi bilumbi longumo. ²⁵ Tsina ine bofakani batsiyale a bilongo, kasi ine bifinzi bi bilongo bibatelame bimoi a bisiaka. ²⁶ Mpe la yenama yemoi yekatonga, bine bimoi biokokanaka kooyo la yene yemoi, la yenama yemoi yee kakumama, bine bimoi biokonangela la yee isikani imoi. ²⁷ Bobayi bilongo bi Kilisito, mpe bobayi bifinzi bi bilongo biyae, ito a mito a lilae lifako. ²⁸ Mpe Mongalima etisa a lisangana felo kwetu bantomami, mbala eyele basakoli, a esaso ba lokotolo, mbuse emoli bane bebayi a libonza li bikamwiseli, mbuse bane bebayi a babonza ba bumesi baito, bosungi, boyangeli, boeki menwa ndenge la ndenge. ²⁹ Baito ngia bebayi bantomami? Basakoli? Ba lokotolo? ³⁰ Kwatu bebayi a libonza li bisakweli, li bumesi baito? Boeki menwa ndenge la ndenge? Bolimboli menwa? ³¹ Bopale bakabo beleki bonene. Mpe leokohana onu ndole ene eeteli ndole kwitu.