¹ Amabonekezi ga Obadia. Ntyo kwo adesire Nnamahanga enyanya lya Edomu; Rhwahabirwe emyanzi emwa Nnahamwirhu, n'omu rhumisi arhumirwe omu mashanja, aderha: "Ntya, muyimuke; rhuyinamuke rhumulwise. ² Alaga nashikujira murho omu karhi k'amashanja; wa ganyagusibwa bwenene. ³ Enzizi z'omurhima gwawe ziku rhebire, we otamire omu migaku y'olwala; oderha omu murhima, erhi: Indi w'aka mponola nie? ⁴ Hano osoka enyanya nka nyunda, Hano ociheba omu ntonde, Naku hungulula kurhenga eyo munda; kw'adesire Nnamahanga. ⁵ Nk'abashambo baka kuyishira, nk'ebishumusi byaka kuyishira budufu (nk'oku wahebirwe hali) Ka banaheka binji kulusha ebi ogwerhe? Nk'abahumbula emizabibu banka kuyishira, ka barhanka siga ebi wakaza? ⁶ Nk'oku Esau ashakulagwa! N'emihako yage yafululwa! ⁷ Abira bawe bakuhinvire kuhika oku lubibi, n'abakagi lya omugati gwawe baakuhebire omurhego orhana birhimanyagya; ⁸ Olwo lusiku, ka nta shereze abantu b'obwenge omu Edomu? n'abo bwenge omu mishozi y'e Esau? kwo adesire Nnamubaho. ⁹ N'entwali zawe, eh Tamani, z'aba omu kulugurha, bulya ngasi w' omu mushozi gw'e Esau ashifera omu malibuko. ¹⁰ Enyanya ly'obubi bwawe kuli mwene winyu Yakobo, wabona nshonyi, ona hererekere ensiku zoshi. ¹¹ Amango wali yimanzire embere zage, olisiku abihanga bali murhabalire, nawe wayimanga kwone waka mulola, nanawe wali nka muguma wabo. ¹² Cikwoki orhalole olusiku lwa mwene winyu, olusiku lw'akarhinda kage, erhi orha cishinge olusiku mwene winyu ali omu bizibu; orha shagalukaka amango abana ba Yuda bali omu malibuko. ¹³ Orhadahe omu muhango gw'abantu bani, olusiku lw'oku rherwa kwage, erhi okuheba amaboko gawe enyanya ly'obuhiri bwage, olusiku lw'oku rherwa kwabo. ¹⁴ Erhi orhayimange aha mashanganjira, mpu ly'oka lingirira oyukirize balya bantu bage baja yaka. Orhahanaga abantu bage barhulubusire. ¹⁵ Enyanya ly'okwo olusiku lwa Nnamahanga luli hofi enyanya ly'olubaga lwoshi; nk'oku wakozire, kwo wana kolerwa; oluhembo lwawe lwagalukira enyanya ly'irhwe lyawe wene. ¹⁶ Bulya nka kulya mwa nywaga oku chirhwa cani cicesibwa, ntyo kw'amashanja goshi ganywa ensiku zoshi; nabo bayishi yorha nka barhahabaga. ¹⁷ Ci omu ntondo y'e Sayuni mwashiba obwakiro, nayo yaba ntondo ecesibwe; n'enyumpa ya Yakobo bagalulirwa ebyabo. ¹⁸ N'enyumpa ya Yakobo gwaba muliro, n'enyumpa ya Yusufu yaba ngulumira ya muliro, ci enyumpa ya Esau yaba bukere bumu, nabwo bwayaka omu karhi kabo, n'oku bamalirira, erhi kurha sigalire muntu yeshi yeshi omu nyumpa ya Esau; bulya Nnamahanga anakudesire. ¹⁹ N'abantu b'e Negebu barhambula entondo y'e Esau; n'abantu b'e Shefela barhambula abafilisti; nabo barhambula olugo lw'e Efrahimu, n'olugo lw'e Samaria na Benyamini arhambula Geladi. ²⁰ N'empira zoshi z'abasirika b'Israheli bayishigwarha ecihugo abakananii bali mwo kuhika e Sarepta; n'empira z'e Yerusalemu z'ashigwarha emirhundu ya Negebu. ²¹ Kandi aba cizanya bagenda oku ntondo y'e Sayuni lyo bahana entondo y'e Esau; n'obwo bwami bwaba mwimo gwa Nnamahanga.