¹ Amabonekezi kuli Ninawi. Citabu ca bulebi bwa Nahumu, w'elkoshi. ² Nnamubaho ali Nnamahanga wa mujina, anakacihola; Nnamubaho anakacihola, ayunjwire burhè, Nnamubaho anakacihola oku bashombanyi bage. Anakabikira abashombanyi bage omutula. ³ Nnamubaho arhaharha omu burhè, ali mukulu oku burhwali bwage; arhakabula buhana. Nnamubaho omu musirula agenda, omu cihusi; amalunga luli lutulo ly'amagulu gage. ⁴ Anamamire enyanja anayikazè. Anaganye enyishi zoshi; Bashani na Karmeli zinaberhe, obwaso bwa Liba bunahonge. ⁵ Entondo zinajugume embere zage, n'emishozi ejonge, idaho lina yimuke embere zage, igulu n'abikala bamwo boshi. ⁶ Ndi wayishi simika embere z'omtula gwage? ndi wayishi yimanga embere z'oburhè bw'omutula gwage. ⁷ Nnamubaho ali mwinja, ye bwakiro olusiku lw'amalibuko; amanyirire abamuyakirakwo. ⁸ Cikwone oku rhulaba rhushandire ayishaba omurhundu, na anayishi kulikira abashombanyi bage abahise omu mwizizi. ⁹ Bici mulimwahigira Nnamubaho? Ye kashaba. amalibuko garhakaciboneka bundi. ¹⁰ Bulya bihangarhine nka mishugi, na nk'ebilalusire oku manvu gabo. Bayishi gulumira lwoshi nka bukere bumu. ¹¹ Emwawe yoyarhenganga owakagi higa amabi kuli Nnamubaho, yewaligwerhe emihigo mikali. ¹² Nnamubaho adesire ntya: ciru bakaba banji barhanalikwo luga, nabayimbula banahirigirhe. Ciru akaba nakulibuzize, ntakacikulibuza. ¹³ Nayishi muberera empegere kuliwe, na okutwa emigozi yage ekushwesire... ¹⁴ Ebyo byo Nnamubaho arhegesire kuliwe: ''orhakabona omwana wayimika; nayishikula omunyumpa ya mungu wawe enshushano ntule erhi nyayuse; Nayishi rheganya enshinda yawe, bulya oli ntaye.'' ¹⁵ Lolaga akuntondo amagulu g'omurhumisi oliyalagaza omurhula, ocishingire amadinyè gawe, hikiriza emihigo yawe, Yuda! bulya endyalya erhakaci kugeramwo, ya hererekire lwoshi...