¹ Mabonekezi, kanwa ka Nnamubaho emwa Israeli kugerea Malaki. ² Namusimire, kwo Nnamubaho adesire; Ninyu muderhe: okubici warhusimire? Ka Esau arhali mwene wabo Yakobo? kwo Nnamubaho adesire. Cikwone nasimire Yakobo. ³ Nagwasire agarhima kuli Esau, n'entondo zage nazijira marango, n'omwimo gwage naguha emiha y'omwiirungu. ⁴ Erhi edomu akaderha: rhwashabirwe, ci rhwalungula ebiguka! Nnamubaho w'emirhwe adesire: bayubake, nayishibirundula, bagali kabahamagala cihugo ca bugoma, olubaga lurhuma Nnamubaho aba burhè ensikuzoshi. ⁵ Amasu ginyu ganabone, mwanayishiderha: obukulu bwa Nnamubaho burhalusire embibi za israili. ⁶ Omwana anakeng'ishe, na omukozi akenge nawabo. Nkaba ndi ishe, ngahi luli olukengwa bampire? Nkaba ndi nwabo, ngahi banyobohire? kwo Nnamubaho w'emirhwe amubwizire, mwe bagula, muli mwaganya izino lyage, munalimwaderha: okubici rhwaganyize izino lyawe? ⁷ Mulimwarhulira oku luhero lwani ebiryo bizira, mugaliderha: okubici rhulirhwa kuhushira? Omukuderha: ecibo ca Nnamubaho cirhagwerhi lukengwa! ⁸ K'erhi mwakantulira ensimba ehusire, kakurhali kubi? erhi mwakantulira elemire erhi elwazire, kakurhali kubi? Kawana bihekera omurhegesi wawe! kanakuyegereza bwinja? kakuyankirira bwinja? kwo Nnamubaho w'emirhwe adesire. ⁹ Muhune Nnamahanga buno, lyo arhubera bwonjo! Emwinyu ebyo birhenzire: k'amuyegereza bwinja? kwo Nnamubaho w'emirhwe adesire. ¹⁰ Ndi mulimwe wanyigalira emihango yani, lyo murhakiyasa busha omuliro oku luhero lwani? Ntamushagalukiri, kwo Nnamubaho w'emirhwe adesire, n'entulo z'amaboko ginyu zirha nsimisizi. ¹¹ Bulya kurhangira sezi guhika bijingo izino lyani liri line omu mashanja. Na ngasi hoshi balibashushagiza okw'irenge l'izino lyani na okurhula entulo ecire; bulya izino lyani liri likulu omu mashanja, kwo Nnamubaho w'emirhwe adesire. ¹² Cikwone mweki, muli mwaligomera, n'okuderha: ecibo ca Nnamubaho ci zinzire, n'ebi cirikwo biri biganyagusibwa. ¹³ Mulimwaderha: murhamo muci ogu? na muliganyaguse, kwo Nnamubaho w'emirhwe adesire, mugalilerha n'ebyazimbagwa, ebyajashunagira erhi bilwala. Na zo nterekero mulimwarhula! Kurhigi nakayemera amaboko ginyu? kwo Nnamubaho w'emirhwe adesire. ¹⁴ Ahehererwe omunywesi, ogwerhe empanzi omubishwekwa byage, ayihanyire ciragane, agalirhulira Nnamubaho ecirema, bulya nie ndi Mwami mukulu, kwo Nnamubaho w'emirhwe adesire, n'izino lyani lyakuyobohwa omu mashanja.