¹ Ntyo akanwa ka Nnamahanga kamuyishira Yona, mwana wa Amitai, erhi: ² Rhenga, ogende e Ninawi, omu lugo lunene, oyakuze bwenene omu co; bulya amabi gabo gasosire enyanya emalanga gani. ³ Cikwone Yona arhenga alibirhirha e Tarasisi, mpu ahasha oku libirha amalanga ga Nnamuzinda, ayandagala kuhika e Yafa, abona yo amashuwa gayerekire e Tarasisi, ntyo, alyula idike, asoka omu mashuwa, mpu agende haguma nabo e Tarasisi, ayake amalanga ga Nnamahanga. ⁴ Cikwone Nnamahanga arhuma empusi nkali omu nyanja, kaba kalaba kakulu omu nyanja, kuhika amashuwa galinzi vunika. ⁵ Omuntyo balya bali omu nyanja bayoboha, nkasi muguma arhangira ahuna nnahamwabo; nabo barhangira bakabulira oku birugu byali omu mashuwa mpu lyo bapunguza oku buzirhu, cikwoki Yona alihonosire kuhika edako bwenene omu mashuwa; agwishira, anaja liro. ⁶ Otembeza amashuwa amugendera, amubwira erhi: Kurhi byaku hunire, we ohunire? Zuka, ohune Nnamahanga wawe; nkaba oyo Nnamahanga wawe arhu kengera rhurhaki hera. ⁷ Barhangira baderhezanya nkasi muntu n'owabo, omu ntya, rhushurhe ecigole, lyo mumanya gano mabi garhuhikire enyanya lyandi. Lero bashurha ecigole, ecigole ca hirimira Yona. ⁸ Lero bamubwira, waliha orhubwire, we orhumire agano mabi garhugwarha; omukolo gwawe guli muhi? Nawene ngahi orhenzire? Ecihugo cawe cili cihugo cihi? nawe oli muntu wa kabila kahi? ⁹ Aba bwira, nie ndi Muebrania; nanka nacikumba Nnamahanga, Nnamuzinda we mpingu, ye wabumbaga enyanja n'igulu. ¹⁰ Abo bantu bayoboha bwenene, bamubwira erhi: bintu bici ebi wajijire! Bulya abo bantu bamanyire oku aja yaka, mpu alibirhe amalanga ga Nnamahanga, bulya alikola ama bashobekera. ¹¹ Lero bamudosa, kurhi rhwakujira, lyo enyanja erhulirira? bulya enyanja yali egendekire oku biha bwenene. ¹² Naye abashuza erhi: Mungwarhe, munkwebe omu nyanja; aho enyanja ya rhulirira; bulya mmanyire oku kugerera nie co cirhumire bino bizibu bya bashimana. ¹³ Cikwone abo bantu baciseza mpu bahashe oku yikirira ishiriza, ci bayabirwa, bulya enyanja yali gendekire yabiha bwenene kulusha. ¹⁴ Lero bayamira Nnamahanga, baderha, Rhukuhunire, mashi Nnamahanga, rhukuhunire, rhurha hererere enyanya ly'oyu muntu, erhi orha rhushimbe oku muko gurhagwerhi mahushe; bulya wehe, Nnamahanga, ojijire nk'oku simire. ¹⁵ Lero bagwarha Yona, bamu kabulira omu nyanja, n'enyanja yanaleka oku chafuka. ¹⁶ Lero abo bantu bayoboha Nnamahanga, bamurholera Nnamahanga entulo, bana hana endagano emwa Nnamahanga. ¹⁷ Nnamahanga arheganya ensamaki mpamu bwenene emire Yona, na Yona aba omu nda yeyo nsamaki nsiku zisharhu, mushi na budufu.