¹ Enyuma z'okufa kwa Yoshua, abana b'israeli bajidosa Nnamubaho, omukuderha: ndi mulirhwe wayinamuka embere ly'abakanani oku barhabalira? ² Nnamubaho ashuza: Yuda ayinamuka, alaga, Nahushire ecihugo omu maboko gage, ³ Na Yuda abwira Simeoni, mwenewabo: Yinamuka rhwembi omucihugo cimpirimire oku cigole, na rhwajilwisa abakanani; nayishi genda nani rhwembi omuco cikuhirimire oku cigabi. Na Simeoni agenda bonaye. ⁴ Yuda ayinamuka na Nnamubaho aheba omu maboko gabo abakanani n'abaperezi, bayirha balume bihumbi ikumi e Bezeki. Barhimana Adoni Bezeki e Bezeki; banamurhabalira, bayirha abakanani n'abaperezi. ⁶ Adoni Bezeki ayaka, cikwone bamukulikira banamugwarha, bamutwa ebyunkumwe n'amano manene. ⁷ Adoni Bezeki aderha: bami makumi galinda batwisire ebyunkumwe n'amano manene, bakagirholeza idaku ly'ameza gani, Nnamahanga amangalulira ebi najiraga. Bamuheka e Yerusalemu, anafirayo. ⁸ Bene Yuda barhabalira Yerusalemu banamugwarha, nashurha oku bwoji bw'engorho banadulika omurhundu. ⁹ Bene Yuda banaciri yandagala okulwisa abakanani balilamire oku ntondo, omunciga z'ekagarhi n'omu lubanda. ¹⁰ Yuda arhablira abakanani balilamire e Hebroni, yakagihamagalwa burhanzi Kiriati Araba; na bayirha Sheshai, Ahimani na Talmai. ¹¹ Kurhengaho barhabalira abikala b'e Debiri: Debiri akagihamagalwa burhanzi Kiriati Seferi. ¹² Kalebu aderha: naherusa mwali wani Aksa okuwashurha Kiriati Seferi n'oku mugwarha. ¹³ Otinieli, mwene Kenazi, mulumuna muzibo wa Kalebu, agugwarha, na Kalebu omuha omwali Aksa nka mukage. ¹⁴ Erhi aja emwa Otinieli ayinginga iba oku ahune ishe ishwa. Ahonoka oku cihesi cage; na Kalebu amudosa: bici bikudwirhe? ¹⁵ Amushuza: ompe oluhembo, bulya wampire idaho ly'kagrhi; ompe n'enshoko z'amishi. Na Kalebu amuha enshoko z'enyanya n'ezidaku. ¹⁶ Abana ba Keni, ishazala wa Musa, ayinamuka omu murhundu gw'amabo, na bene Yuda, omw'irungu lya Yuda ekagarhi ka Aradi, na bagenda balama omu lubaga. ¹⁷ Yuda aja omu lugenzi boshi na Simeoni, banashurha abakanani balilamire e Sefati; bajira omurhundu muzira, na baguhamagala Homa. ¹⁸ Yuda aciha kandi Gaza n'enciga zabo, Askaloni n'enciga zabo, na Ekroni n'enciga zabo. ¹⁹ Nnamubaho ali haguma na Yuda; na Yuda acijira nahano w'entondo, ci arhahashaga okuhinva abikala b'omu lubanda, bulya baligwerhe endogomi z'ecuma. ²⁰ Baha Kalebu Hebroni, nkoku Musa anakudrhaga; na ahinvamwo abana gasharhu ba Anaki. ²¹ Bene Benyamini barhahinvaga abayebusi balilamire e Yerusalemu; n'abayebusi balamire kuhik'ene e Yerusalemu na bene Benyamini. ²² Enyumpa ya Yusufu nabo barhabalira Beteli, na Nnamubaho aba haguma nabo. ²³ Enyuma ya Yusufu yarhangula Beteli, yakagihamagalwa burhanzi Luzu. ²⁴ Abalanzi babona omuntu warhenga omumurhundu,banamubwira: rhuyereke aharhwagera okuja omumurhundu, na rhwakujirira olukogo. ²⁵ Abayereka ahabagwasirwe okuyinamuka omumurhundu. Banashurha omurhundu oku bwoji bw'engorho; cikwone baleka oyomuntu agenda n'omulala gwage gwoshi. ²⁶ Oyomuntu aja omucihugo c'abahiti, anayubaka omurhundu, na aguha izino lya Luzu, izino gujira kuhik'ene. ²⁷ Manasi arhahinvaga abikala b'e Beti Sheani n'abomu mirhundu g'eburhambi bwage, kurhangira e Tanaki n'emirhundu y'eburhambi bwage, e Dori n'emirhundu y'eburhambi bwage, e Megido n'emirhundu y'eburhambi bwage; n'abakanani balonza okubera omw'ecocihugo. ²⁸ Erhi Israeli agwarha oburhwali, arhegeka oku buko buguma, ci barhabahinvaga. ²⁹ Efrahimu arhahinvaga abakanani bali e Gezeri, n'abakanani balilamire haguma na Efrahimu e Gezeri. ³⁰ Zabuloni arhahinvaga abikala b'e Kitroni, erhi abikala b'e Nahaloli; n'abakanani balama haguma na Zabuloni, ci barhegekwa na buko buguma. ³¹ Asheri arhahinvaga abikala b'e Ako, erhi abikala b'e Sidoni, erhi ab'e Ashladi, b'e Akzibu, b'e Helba, b'e Afiki n'ab'e Rehob; ³² Na bene Asheri balama haguma n'abakanani, bikala b'ecihugo, bulya barhabahinvaga. ³³ Neftali arhahinvaga abikala b'e Beti shemeshi, erhi bikala b' Beti Anati, na balama haguma n'abakanani bikala b'ecihugo, cikwone abikala b'e Beti shemeshi n'e Beti Anati barhegekwa na buko buguma. ³⁴ Aba Amori basukuma bene Dani omu ntondo, barhanabalekaga bahonokera omu lubanda. ³⁵ Aha Amori balilonzize babere e Hari Heresi, e Ayaloni n'e Shalbimu; cikwone okuboko lw'enyumpa ya Yusufu kwabazidohera, barhegekwa na buko buguma. ³⁶ Enciga z'aba Amori zaligalihire kurhrngera omushozi gwa Akrabimu, kurhenga e Sela, n'idaku.