¹ Oku mwaka gwa kasharhu gw'oburhegesi bwa Yoyakimu, mwami w'e Yuda, Nebukadeneza, mwami w'e Babeli, arhabalira Yerusalemu, anamugorha. ² Nnahamwirhu anahana Yoyakimu omu maboko gage, mwani w'e Yuda, na ecihimbi c'ebirugu by'omunyumpa ya Nnamahanga. Nebukadeneza anaheka ebyo birugu omucihugo c'e Shineari, omunyumpa ya mungu wage, anabiheba omunyumpa y'omuhako ya mungu wage. ³ Mwami arhegeka Ashipenazi, mukulu w'abajinji bage, okulerha bagumabaguma omu bana b'israeli b'oku buko bwa mwami erhi omu milala elengerire. ⁴ Bamisole barhabana barhalikwo ishembo oku mubiri, binja ba nshusho, bagwerhe obwenge, bumanyi na basomi, bakahasha oku kolera enyumpa ya mwami, na balya bakayishi yigirizibwa oluvabe n'oluderho lw'abakalidayo. ⁵ Mwami abarhegekera oku ngasi lusiku ecihimbi c'ebiryo byage n'ecinywebwa akaginywa, alilonzize abayinamule lugero lwa miaka isharhu, enyuma zaho balibayishijira omukolo gwa mwami. ⁶ Mulibo mwali, omubana ba Yuda, Danieli, Hanania, Mishaeli na Azaria. ⁷ Omukulu w'abajinji abayirika amazino,kuli Danieli erya Belshazari, kuli Hanania erya Shadraki, kuli Mishaeli erya Meshaki, na kuli Azaria erya Abed Nego. ⁸ Danieli alahira okurha ci gomesa okubiryo bya mwami n'oku cinywebwa mwawi okaginywa, ahuna omukulu w'abajinji oku arhamuseze oku cigomesa. ⁹ Nnamahanga aha Danieli okuyemerwa emwa omukulu w'abajinji. ¹⁰ Omukulu w'abajinji abwira Danieli: nyobohire nahamwirhu mwami, ye warheganyagya ebi mukwanine okulya n'okunywa; bulya cakarhuma ayishi bona amalanga ginyu gagonyohire kulusha oga eyinyu misole y'emyaka yinyu? Mwalega irhwe lyani emwa mwami. ¹¹ Lero Danieli abwira omuganda Omukulu w'abajinji alihebire oku langa Danieli, Hanania, Mishaeli na Azaria: ¹² Ogere abakozi bawe nsiku ikumi, barhuhe enshogo z'okulya n'amishi g'okunywa; ¹³ wayishi sinza buzinda amalanga girhu n'aga emisole egwerhe yalya okubiryo bya mwami, wanayishi jirira abakozi bawe kushimbana ebi wayishibona. ¹⁴ abayemerera nkoku bali hunyire, babagera nsiku ikumi. ¹⁵ Enyuma lya nsiku ikumi, baligwerhe amalanga minja na ibunda kulusha emisole yakagirya oku biryo bya mwami. ¹⁶ Omuganda akagi cihekera ebiryo n'ecinywebwa cabo, anaka baha enshogo. ¹⁷ Nnamahanga aha eyo misole ini obumanyi, obwenge omu luvabe lwoshi, na obukengukwe; na Danieli akagi hugula endorho zoshi na amabonekerezi. ¹⁸ Oku kasanzi kalirheganyibwe na mwami okulyo bamulerherabo, omukulu w'abajinji abalerha emwa Nebukadeneza. ¹⁹ Mwami abaganiza; na, muli eyo misole, arhabonaga oli nka Danieli, Hanania, Mishaeli na Azaria. Ntyo bayemerwa oku mikolo ya mwami. ²⁰ Oku ngasi birugu byalihunyire obukengukwe na obwenge, na okubirya mwami akagi cidosa, ababona balushire kalikumi abalaguzi bage, n'abasagasi bali omubwami bwage bwoshi. ²¹ Ntyo kwo Danieli aliyosire kuhika omwaka murhanzi gwa mwami Sirusi.