¹ Kwa batcha, tchiye tch'e Muyahudi arengire kw'e bandji? Ilyi e kwishibwa tchiye kutetchire? ² Kulyi kwa bulayilyire busibu, kwa ngasi ndjira, kwa bushi beresibirwe e mwasi wa Ongo. ³ Na batcha, nde kasi ola ut'emeraa, nga bauma mubwo bat'emeraa? E kut'emera kwabwo kungayira e kwemera kwa Ongo kuba busha? ⁴ Nanga, tchiro n'e hitcha; si kweyine Ongo alyi w'e kunalyi, na ngasi mundju mweki w'e bisha, ng'okwo bya andjikirwe: ''Uandjirwe kuba n'e kunalyi mwa myasi yawe, ilyi uala e kuyima e kahangi k'e kutchindjibusibwa, ilyi e kwishirwa e lubandja.'' ⁵ Si kweyine, nga e bubi bwenyu bungalusha e kunalyi kwa Ongo, tchutete kute? Ongo alyi mubi ilyi areta e busheresi kulyipisa e bubi? (Nyitetchire batcha nga mundju.) ⁶ Nanga, ata batcha, tchiro n'e hitcha; nga batcha, kute kwa Ongo anga sheresa e butala? ⁷ Kwa bushi, n'okwo, nga e kunalyi kwa Ongo kukulushire busibu e bisha byanyi, kwa bushi n'e tchiye nyitchilyi natchindjibusibwa nga mwesha byaa? ⁸ Na kwa bushi n'e tchiye tchutateta ngokola tchw'ekerwa e bisha, na nga kula e bandji b'ende bateta okwo tchuyir'e mabi ilyi e mabuya m'esha? e kutchindjibusa kwabwo kulyi kw'e kunalyi ⁹ Kute kasi, ilyi tchubano tchu babuya kulush'e bandji? Nanga, tchiro n'e hitcha; kwa bushi netchu tchwatangiraa e kutchindjibusa e Bayahudi n'e Bayunani; okwo nabwo bwoshi balyi e masina m'e byaa. ¹⁰ Ng'okwo bya andjikirwe: ''Kutalyi mundju w'e kunalyi, tchiro n'e muuma. ¹¹ Kutalyi mundju ola umenyire byoshi, kutalyi e mundju woshi ola w'e kuhonda Ongo. ¹² Kwa bushi batengire mwa ndjira y'e kunalyi kwa Ongo; bwoshi bera balyi busira mutoloke. Kutalyi ola w'e kuyira e bibuya, tchiro n'e muuma. ¹³ E kunalyi kwabwo, ilyi shinda era yitalyi mu kandju, n'okwo nyilyimi sabwo, balyi batebanyi' n'e matchoka tchoka m'e ndjoka malyi e masina m'e bunu bwabwo. ¹⁴ E bunu bwabwo, bwihur'e bitaki n'e bubi ilyi kalulu. ¹⁵ Emaulu mabwo, malyi lubiro ilyi fuba-fuba kushesh'e mikira. ¹⁶ Ekusheresa n'e malyibuko malyi mwa ndjira sabwo. ¹⁷ Tchiro n'e ndjira y'e bwolo batayishi. ¹⁸ Tchiro kwa meho mabwo bat'obwoyire Ongo!'' ¹⁹ Na tchumenyire okwo myasi yitchiye yi itetchire e ndonga s'e maano, yi tetchire e mwa bala balyi e masina s'e maano; ilyi ngasi bunu buhwekwe, n'e butala bwoshi bub'e masina m'e butchindjibuse bwa Ongo. ²⁰ Kwa bushi, okwo mukolo w'e maano, kutalyi mundju ola w'et'e mubilyi, ola ukaandjirwa e kunalyi e muhondo saye; kwa bushi e ndonga s'e maano, e byaa bimenyekene. ²¹ Si kweyine, batcha, e kulyi kwa Ongo kwa bwonekene busira e maano; na bya amilyisibwe n'e maano n'e burebi. ²² E kulyi kwa Ongo kwa ndjira y'e bwemere mwa kakatchi ka Yesu Kristo e mwala bwoshi, n'e ndonga sa bwoshi beemere; kwa bushi kutalyi lubero. ²³ Kwa bushi, bwoshi bayilyir'e byaa, n'e kwandaalyirwa n'e buashe bwa Ongo, ²⁴ bera kuandjirwa e kulyi kwa Ongo busha, kwa bushi n'e lukoo lwaye, kwa ndjira y'e butchunguke bulyi mwa kakatchi ka Yesu Kristo. ²⁵ Ne Ongo ayilyire Kristo, abe lushangi kwa ndjira y'e bwemere mwa kakatchi k'e mikira yaye, ilyi erekana e kulyi kwaye kwa kurekerera e byaa byayilyibwaa mira, mwa kakatchi k'e mababalyire ma Ongo. ²⁶ Ilyi Ongo aala e kwerekana e kulyi kwaye, mwa mano mango, ilyi aba w'e kunalyi n'e kuandjira ngasi mundju ola w'emere Yesu. ²⁷ Na batcha,ngayi bilyi ebye tchunga tchitongera? kwera kuhwekirwe e mbuwaa. Kwa bushi n,e ano lyitchiye? Ilyi kwa bushi n'e biyiro? Nanga! Si kwa ndjira y'e maano kwa bwemere. ²⁸ Kwa bushi n'okwo, tchubwene okwo e mundju ende aandjirwa e kulyi kwa bwemere busira e biyiro by'e maano. ²⁹ Ilyi Ongo aba Ongo w'e Bayahudi beyine? Ilyi Ongo ata Ongo w'e nyibaa soshi? Netchi, alyi Ongo w'e nyibaa soshi. ³⁰ Kwa bushi Ongo alyi muuma, ola ukaandjira e kulyi, e bandju b'eshirwe kwa ndjira y'e bwemere, na bala bat'eshibwaa e kulyi kwa ndjira y'obwo bwemere. ³¹ Na batcha, Twera tchuyilyire e maano kuba busha kwa ndjira y'e bwemere? Nanga, tchiro n'e hitcha. Si kweyine, tchwimanzis'e maano.