¹ Paulo, ndjumwa ya Kristo Yesu, yi wabalangirwaa kuba ndjumwa, n'e kuberulwa ilyi eyilyisa e mwasi mubuya wa Ongo; ² oyola yi Ongo alaanyise oyo mwasi mubuya kwa bunu bw'e barebi baye mwa kakatchi k'e mandjiko matchere; ³ ku kuteta, e myasi y'e mwana waye, wabutchwaa mwa tchisere tcha Daudi, kwa ndjira y'e mubilyi. ⁴ N'e kwerekibwa kwa buashe kuba mwana wa Ongo, kwa ndjira y'e muka w'e butchesibwa, kwa kufulwa kw'e bafire, Yesu Kristo Enawetchu. ⁵ Na muye mu tchwaangilyire e lukoo n'e bukoresi ilyi e lubaa lwoshi luala e kukenga kwa bwemere, kwa bushi n'esina lyaye. ⁶ Na mwa kakatchi kabwo, mwabwo mwera mulyi bahombolwa ba Yesu Kristo. ⁷ E mwa bala bwoshi balyi e Rumi, basimirwe ne Ongo, babalangirwaa kuba batchesibwa. E lukoo lub'emwenyu n'e bwolo kutenga e mwa Ongo tata wetchu, n'era mw'enawetchu Yesu Kristo. ⁸ Butanzi nyimutongire Ongo wanyi mwa kakatchi ka Yesu Kristo kwa bushi nenyu mubwoshi, kwa bushi e bwemere bwenyu bweyilyisibwa mwa butala bwoshi. ⁹ Kwa bushi Ongo, ola nyemere kwa mutchima wanyi mwa kakatchi k'e mwasi w'e mwana waye, alyi mwamilyisa wanyi kwa nyende nabatonga ilyi kubamaana busira kutama, ¹⁰ e siku soshi mwa memi manyi, mwa kwema nyishe e mwenyu mwesine siku, ilyi Ongo angahonda e kuyikilyisa e lubalamwo lwanyi. ¹¹ Kwa bushi nyihondjire busibu e kubalola kwo, ilyi nyibawa e lwembo lw'e mutchima, ilyi muba mutchikubure. ¹² Ku kushishilyisanya kwanyi nenyu, ngasi mundju kwa bwemere bwa mulyikabo, e bwenyu ne bwanyi mu Yesu. ¹³ Si kweyine, benye wetchu, ilyi nyingaba ndabwookere kuyika batcha, ilyi nyiala e kuba n'e maree era mulyi mwabo ng'okula nyimete mwa indji milala. ¹⁴ Nyimete e mwe Bayunani n'e mwe batalyi Bayunani, nyibyete e mwe bet'ebwenge n'e batabwete. ¹⁵ Kwa bushi n'oko, era mwanyi, nyono nera nyilyi nyitchikubure ekwiyilyisa e mwasi mubuya tchiro n'e mwenyu mu mwikere e Roma. ¹⁶ Kwa bushi ndangaala kubwonera honyi e mwasi mubuya; kwa bushi bulyi buashe bwa Ongo buretchire e butchunguke, e mwa ngasi ola wemere, tanga e mwe Muyahudi, nera e mwe Muyunani. ¹⁷ Kwa bushi e kunalyi kwa Ongo kwayikilyire mwa kakatchi ka Yesu Kristo, kwa bwemere kuyika e bwemere; ngoko byandjikirwe, ewe kunalyi wanyi akalama kwa bwemere. ¹⁸ Kwa bushi e butchindjibuke bwa Ongo bwerekanyibwe kuteng'e mbingu e ndonga s'e buaye bwoshi n'e bubi bwa mwenye mundju bala bende balwisa ekulyi kwa bubi. ¹⁹ Kwa bushi e myasi ya Ongo yimenyekene yera yilyi y'e kunalyi mwanda sabwo, kwa bushi Ongo yi waberekaa eye myasi. ²⁰ Kwa bushi e myasi ya Ongo itafiraa kubwonekana kwo kutengera e kubumbwa kw'e butala yera yi bwonekene, n'e kumenyekana kwa mikolo yaye; bu bulyi buashe bwaye bw'e siku soshi n'e kuba yi Ongo; kuyika bata baa bute. ²¹ Kwa bushi n'oko, emango bamenyaa Ongo, watamutongaa nga yi Ongo ilyi e kuwa e ngulu; si bera kutereka mwa bwaka bwabwo, n'e mitchima yabwo y'e buwindja yera kuya mw'e mwisimya. ²² Bera kwende bateta kwa bu bet'e bwenge, bera kuba bawindja; ²³ bera kualula e bukuse bwa Ongo utete busheresi, kwa shushanyo ya mwenye mundju ye w'ebushe, n'e milonge, n'e nyama, n'e ye byaenda enda byoshi. ²⁴ Kwa bushi n'ebye Ongo era kubareka mwa kakatchi k'enifindjo s'e mitchima yabwo, bakulyikire esinga, tchiro bera kuyinyirana e bukenge e mibilyi yabwo ²⁵ Kwa bushi baalure e kulyi kwa Ongo kuba bisha, bera kutchikumba e tchiremwa n'ekutchemera a alyi Ongo yi we kweresibwa e ngulu e myaka ne myaka. Amina. ²⁶ Batcha Ongo era kubareka bakulyikre e nyifindjo sabwo s'e honyi, tchiro e bakasi bera kualula e mikoresi ya mira kwa mikoresi era yitalyi ya mira. ²⁷ E balume nabwo kunoko bera kureka e mikoresi y'e bakasi, ya mira, bera kubaretera e mbuha, bera kutola mwa bulamu bwabwo e lwembo lw'e kutereka kwabwo, ku kunalyi kubashingenene. ²⁸ Na ng'oko balayiraa e kuba ne Ongo mwa kakatchi k'e bwenge bwabwo, Ongo naye era kubareka bakulyikire e nyifindjo ilyi e bwenge bwabwo buta shingenene, ilyi bayira e bita bashingenene. ²⁹ Behure n'e bubi bwa ngasi lubero, e bubi n'e nyifindjo s'e kuyira e kubi; behure n'e bukalyi, n'e bwitanyi, n'e mufula, n'e kuayisa; bandju b'e nyifindjo sibi, bandju ba kutetana tchwa myasi myasi. ³⁰ Bandju bakwekerana e bisha bauma kwa bandji, bandju bakuaya Ongo, bandju ba tchirumerume, bandju ba kutchunva mwa mitchima yabwo, bandju ba kuhonda e kuyira beyine e bubi, ilyi b'ekutondera e bubi, bandju batakengire e babusi babwo. ³¹ Bandju batete bwange bwa kumenyerera e kandju, bandju ba kusheresa e maanure (ma Ongo), bandju bala batasimire e milala yabwo, bata bakubabalyira e bandji. ³² Bandju bala bamenyire e butchindjibuse bw'e kunalyi kwa Ongo, kwa bala bende bayira e byera bashingenene e kufa, na banayira batcha, na ata e byera byeyine, na tchiro bw'onvikene nabwo bendjire babiyira.