¹ Yesu era kubira e baanda baye: Kulyi kusibu kwa kutabaa e masitaso; si e bwanya bwola wamaretchire! ² Kushingenene kuye e kumu hwekera omwe osi lyaye e koyi y'e kuowera, n'eku mukabula mwa nyandja, alyi e kusitasa muuma mwa bano baeke. ³ Mutchilange mu beyine, nga mwenye wenyu angayira e tchaa, umuendere, akatchiaya, umuba balyire. ⁴ Na ilyi anga kuyilyira e mabi kalyinda mwa lusiku luuma, n'ekualuka kalyinda era ulyi, ku teta: Nakwemir'ebwondjo, umubabalyire." ⁵ Ebaanda bera kubira Enawetchu: Utchuhulyi re e bwemeree. ⁶ Na Enawetchu era kuteta: Nga mungaata e bwemere bulyi nga tchifuma tch' e Haradali, mungabilyire oyo muruko: Tenga wo, uhamire mwa nyandja; na anabakenga. ⁷ Nde, mu mwabo, ola wendjire atchika, ilyi abula e bibusi, ungamubira, e mango atenga mwe hwa: Wishe fuba, na uye kwa meza m'e bilyo? ⁸ Ola utanga mubira, nyihondera ebye nalya, ubiku nganye, unanyerese, kuyika nyiute nyinamwe; na enyuma yi ungalya n'e kumwa? ⁹ Ete etche amenyire kw'oyo mukosi kwa bushi ayilyire ebye abirwaa? ¹⁰ Nenyu kunoko, e ma ngo mwayilyire ebye bababiraa, mutete: Tchulyi bakosi batashingenene, tchwayilyire ebye batchu biraa tchuyire." ¹¹ Yesu, erakuya e Yerusalemu, era kurenga e kakatchi k'e Samaria n'e Galilaya. ¹² Na ilyi engira mu musi muuma, bandju ekumi b'ebibenzi bera kwisha kubuanana naye. Bera kwimanga bu re naye, bera kwimusa e murenge n'ekuteta: ¹³ "Yesu, mwiyilyisa, utchubere bwondjo!" ¹⁴ Na, ilyi abalola kwo, era kubabira: Mwende kutchilosa emwe badjindji. Na ilyi baba batchilyi baenda, bera kulola kwa bafumire. ¹⁵ Muuma mubo, ilyi alola oko afumire, era kualuka, n'ekuto nga Ongo kwa murenge munene. ¹⁶ Era kukumbaala kwa busu bwaye e muhondo sa Yesu, n'e kumweresa e ngulu. Abaa mu Samaria. ¹⁷ Yesu era kutol'e mwasi, era kuteta: Ely'ekumi lyitafumire lyoshi? Nabo bandji mwenda, ngayi bayire? ¹⁸ Kute ono muenyi yeyine yi weshire n'ekwana e mutongo ilyi ngulu e mwa Ongo? ¹⁹ Na era kumubira: "Emuka, uende, e bwemere bwa we bwakufumise." ²⁰ E Bafarisayo bera kubusa Yesu, mangotchi e bwami bwa Ongo bukesha. Era kubahusa: E bwami bwa Ongo butesha kwa kuloreresa. ²¹ Batakateta: Walyi wano, ilyi walyi wawo. Kwa bushi, lolaa, e bwami bwa Ongo bulyi alauma nenyu." ²² Na Yesu era kubira e baanda baye: E siku sesha, ese mukahonda e kulola ilyi kubona lusiku luuma lw'e mwana w'e mundju, na mutakalubona, ²³ Bakababira: Alyi wano, alyi wawo. Mutayaa ye, ilyi ekubilyitchir'eye. ²⁴ Kwa bushi, ngokula e muraso ende arenga kutenga e tchande tch'e nguba, kuyika e tchindji tchande, kunoko kw'e mwana w'e mundju akaba olo lusiku lwaye. ²⁵ Si bishingenene tanga alyibusibwe busibu, n'ekukabulyirwa n'etchine tchibutchi. ²⁶ Ebye byabaa e siku sa Noa, bi bikanaba e lusiku lw'e mwana w'e mundju. ²⁷ E bandju bendee balya, n'e kumwa, bendee bahwera n'ekuhwesa e bana babo, kuyika e lusiku Noa engiraa mwa bwato ( safina ); e tchonzi tchera kwisha, n'e kubamala bwoshi. ²⁸ Ebyabaa e siku sa Lutu, bi bikanaba olo lusiku. E bandju bendee balya, bamwa, baula, bausa, bayinga, bebaka; ²⁹ Si e lusiku Lutu ate ngaa mwa Sodoma, e nvula y'e mulyiro w'engulu mira yera kutenga e mbingu; n'ekubasheresa bwo shi. ³⁰ Batcha, kubikanaba olo lusiku lw'ekwisha kw'e mwana w'e mundju. ³¹ Kwolo lusiku, ola ukaba kwa burafe ( bw'e nyumba ), na ete e bikayi byaye mwa nyumba, atakandaala e kubitola; n'ola ukaba ulyi mw'ehwa, atakaala kualuka e nyuma. ³² Mukengere muka Lutu. ³³ Ola ukahonda e kufumya e kalamo kaye akakateresa, n'ola uka kateresa kwa bushi nanyi akakabona. ³⁴ Nyibabilyire, mwobo butchufu, bandju babilyi bakaba balyi mwa ndjingo nguma, muuma akato lwa n'e undji akarekwa; ³⁵ bakasi babilyi bakaba baowa alauma, muuma akatolwa n'e undji akarekwa. ³⁶ Balume babilyi bakaba mwehwa, muuma akatolwa n'e unji akarekwa. ³⁷ Ebaanda bera kumubusa: "Ngayi bika bera, Enawe tchu?" Na era kuhusa:" Ala e birunda bikaba, awola w'Enzo sikakundamana."