¹ Kwa bushi, oyo Melkizedeki, mwami w'e Salemu, mudjindji wa Ongo ulyi e mbingu, yi wabuananaa ne Abrahamu ilyi alyi mwa kufuluka, atenga kulwisa abwo bami, era kugisha Abrahamu. ² Ne Abrahamu era kumweresa tchande tchiuma tch'e kumi tch'ebikayi byaye byoshi; (e kuhubanganya ely'e sina lyaye, butanzi alyi mwami w'e kunalyi, kandji mwami w'e Salemu, kukuteta mwami w'e bwolo ilyi mutchula, ³ ate'eshe, atete nyina, atete basere, atete mutonde ro w'e siku saye, ilyi businda bw'e kalamwo kaye, si kweyine ashushanyisibwe n'e mwana wa Ongo); oyola era kulama mudjindji e myaka n'e myaka. ⁴ Na batcha, lolaa kute oyo mundju abaa muku lu, Abrahamu era kumweresa e tchande tchaye tch'e kumi tch'ebye atolaa era ende aya kulwa e malwa. ⁵ N'omwo kakatchi k'e bana ba Lawi namwo, abwo bende batola e kuba badjindji, babaa b'ete eyano kutola etchande tch'ekumi tch'e bandju babwo, kukuteta, benye wabwo, kushimba na n'eteeko ly'e maanure, tchiro angaba batengaa mwa mbindji ilyi tchibutchi tcha Abrahamu. ⁶ Si kweyine, e tchibutchi tchaye tchitaandjirwaa kwa tchitenga e mwabwo, era kutola etchande tch'e kumi kutenga emwa Abrahamu, era kumugisha oyo wet'etche tchiraane. Abrahamu yi mundju Ongo alaanyaa e mulala. ⁷ Tchiro bitanalayisise ekunalyi kwa e mutoto (ilyi kalumuna) anagishibwa n'e mukulu. ⁸ Nano u benye mundju bende babwonekana n'e kufa, bende batola ilyi kweresibwa e tchande tch'ekumi; si kweyine yi wende watetchibwa okwo asene, ilyi alamire. ⁹ Kandji byanaala kutetchibwa kwa, kwa ndjira ya Abrahamu, tchiro Lawi naye yi wende watola etchande tch'ekumi, naye era kwana etchande tch'ekumi; ¹⁰ kwa bushi abaa alyi mwa mbindji y'eshe, amwo mango Melkizedeki abuananaa ne Abrahamu. ¹¹ Na batcha, nga e kubwonekana e kunalyi kwa tengaa kwa ndjira ya Lawi; (kukuteta abwo bandju batolaa e maanure kw'oyo); kute kandji kwa baa eundji mudjindji w'emukaa; kwa shushanyo ya Melkizedeki, si atandjibwaa kwa shushanyo ya Aruni? ¹² Na batcha, ilyi obwo budjindji bungaalulwa, kutalyi kusibu e maanure namwo kualulwa. ¹³ Kwa bushi, ola utetererwe ebyera, abaa wa lushangi lwa undji mulala, kutalyi mundju w'oyo mulala ola wakoreraa e mazabau (ilyi e andju e nderekero), ¹⁴ Kwa bushi kulyi kw'e kunalyi kwa Enawetchwu atengaa mu Yuda, mulala ola Musa atatetaa mwo mwasi woshi endonga sawo mwa myasi y'e budjindji. ¹⁵ Kandji ebye tchwutetchire bilyi by'ekunalyi busibu, nga kwelukilyire eundji mudjindji ulyi nga Melkizedeki. ¹⁶ Oyola yi utalyi mudjindji w'e yano ly'e maanure malyi m'e mubilyi, si kweyine kwa misi y'e kalamwo katete businda. ¹⁷ Kwa bushi amilyisibwe batcha, "Woyo ulyi mudjindji e myaka n'e myaka, kwa muanyi wa Melkizedeki." ¹⁸ Kwa bushi, kulyi ekualulwa kw'elye ayano lyatangiraa, kwa bushi n'ebutambukare bwaye, na ekutashinganana kwaye. ¹⁹ Kwa bushi, ely'eyano lyitayikilyisaa e mwasi; na alauma n'ebye kwera kuya e bulangalyire bulyi bubuya busibu, kurengera obwo bulangalyire, tchwumusheerere Ongo. ²⁰ Na kwa bushi etche tchiraane tchitabaa busira tchilapo, ²¹ ( kwa bushi abwo bayirwaa badjindji busira tchilapo; si yeyine, alauma n'etchi lapo, era mw'ola wamubiraa, "Enawetchwu alapire tchiro atatchinyise, Woyo ulyi mudjindji e myaka n'e myaka ) !" ²² Na batcha, kwa bushi n'oko, Yesu eralyi wayikilyisise etchiraane tchilyi tchibuya busibu. ²³ Kandji abwola bayilyirwe badjindji banene, kwa bushi banzibwe n'e lufu batalamaa. ²⁴ Si yeyine, Yesu, kwa bushi alamire e myaka n'e myaka; ete e budjindji bwaye butakatenga. ²⁵ Naye Yesu, kwa bushi n'oko, anfumya ilyi kulamya bala b'eshire era Ongo alyi kurengera ye; kwa bushi esiku soshi ilyi abemera. ²⁶ Kwa bushi bya baa bitchwemire tchwube tchw'et'e mudjindji mukulu ulyi ng'oyo ola w'ekunalyi, ola utete bubi, ola utete tchiro n'ekutetchibwa kubi, ola uberulwe n'ebanya byaa, ola wabaa endonga kulusha e mbingu. ²⁷ Oyola yi utete mbusha ngasi lusiku, kuanyi wabwo bandji badjindji, butanzi e kwana e nderekero kwa bushi n'e byaa byaye yeyine, na businda kwa bushi n'e byaa byabwo bandji bandju, kwa bushi yeyine ilyi yeki ayiraa batcha lyiuma, ilyi atchana e kalamwo kaye yeyine. ²⁸ Kwa bushi eyano ilyi maanure mabikire benye mundju balyi batambukare kuba badjindji bakulu; si kweyine oyo mwasi w'etchilapo tcheshaa e nyuma s'e mano ma Musa, wabikire e mwana (wa Ongo), Yesu, yi wabere w'ekunalyi e myaka n'e myaka.