¹ Ilyi olo lusindo lwawa, Paulo era kutchuma babir'e baanda era kubaana, era kulaana nabo, businda era kuenda aye e Makedonia. ² Naye ilyi aba era arengaa eye n'ekubashishilyisa kwa myasi inene, era kuyika e Buyunani. ³ Na ilyi aba era ekalaa eye myesi ehatchu, ne Bayaudi bera kumuyilyira e lupalyi, ilyi ahond'ekuya e Shamu kurengera e nyandja, batcha era kuhonda e kualuka kwa ndjira y'e Makedonia. ⁴ Abo bandju bera kukulyikirana naye, Sopatro w'e Beroya, mwenye Piro, ne Aristarko ne Sekundo, bandju b'e Tesalonike; ne Gayo mundju w'e Derbe, ne Timoteo,ne Tikiko ne Trofimo bandju b'e Azia. ⁵ Si abo bandju babaa bera bahondolaa bera kumulyindjira e Troa. ⁶ Tchubano tchwera kwimanga e nyuma s'e siku s'e mikati itabikirwe mwo ngeso, tchwera kutenga e Filipi, tchwera kubabuana e Troa, luendo lwa siku e tanu, tchwera kwikal'eye siku elyinda. ⁷ Na elusiku lutanzi lw'e yinga, ilyi tchwaba tchwabuanene ilyi tchulya e mukayi, Paulo era kubeyilyisa, n'ekuhonda kubalama e lwekabilyi, na ye era kuenderesa e myasi yaye kuyika e kakatchi k'e butchufu. ⁸ Kwa baa matara mengi mweye nyumba tchwabaa tchukundamene mwo. ⁹ Mutabana muuma, esina lyaye Eutiko, abaa ekere kw'e dirisha, era kusimbwa n'etchulo busibu, na ilyi Paulo aenderera busibu e kwiyilyisa, oyo mutabana era kurengwa ne tchulo tchwaye era ku towa kutenga kw'e dari lya kahatchu; era kwimusi bwa afire mira. ¹⁰ Paulo era kwandaala, era kumukumbaalyira ko, era kumutola, era kuteta, "Mutayira lubi, kwa bushi e kalamo kaye katchilyi mwanda saye." ¹¹ Era kuhuba kwiruka e ndonga, era kulya e mukati, era kulusha kuanyira nabo kuyika misha ngya-shangya, na era kuenda. ¹² Bera kureta oyo mutabana, asene, bera kushishilyisibwa bushi shilyise bunene. ¹³ Si tchubano tchwera kuhondola kuya mwa bwato, tchwera kuya e Aso, ilyi tchutola Paulo eyera; kwa bushi kw'atetaa, yeyine, era kuenda kwa maulu. ¹⁴ Ilyi atchubuane eye Aso, tchwe ra kumutola, businda tchwera kuyika e Mitilene. ¹⁵ Tchwera kuteng'eye, na e lwe kabilyi tchwera kuyika ofi ne Kio. E lwe kahatchu tchwera kuyika e Samo, tchwera kwikala e Trogilio, e lwe kane tchwera kuyika e Mileto. ¹⁶ Kwa bushi Paulo abaa ahondjire kurenga e Efeso mwa bwato, ilyi atelyisaa e Azia; kwa abaa alyi lubiro, ayike e Yerusalemu e lusiku lw'e Pentekoste, nga byashi kene. ¹⁷ Kutenga e Mileto Paulo era kutchuma e bandju e Efeso, era kubalangira e bahosi b'e kanisa. ¹⁸ Ilyi bayik'emwaye, era kubabira, "Mu beyine mumenyire kwa kutenga e lusiku lutanzi nabirataa ano Azia, oko nabaa e mwenyu e mango mwoshi, ¹⁹ nyendee nakorera e nawetchu kwa bulonvu bwoshi, n'oko malyira, n'e matangulo manyiyikiraa kwa nyifindjo sibi s'e Bayaudi; ²⁰ Mumenyire kwa nda tchiberulaa kubahubanganyi sa mwasi woshi ola ubashingenene, si nabeyilyi saa kanangana, nyumba kwa nyumba, ²¹ nera kwende nabira e Bayaudi ne Bayunani bamweme re Ongo, n'ekumwemera e nawetchu Yesu Kristo. ²² Na batcha, mulolae, nashimbir'e ndjira y'e ku ya e Yerusalemu nyina hwekirwe mwa mutchima, ndamenyaa ebinga nyiyikira eyera, ²³ ata muka mweru musikwa musi yi wanyihubanganyisa n'e kuteta kwa emilyisi n'e malyibuko binyilyindjilyire. ²⁴ Si nda andjire e kalamo kanyi nga kandju k'e kunalyi e mwanyi nga kumala e luenzi lwanyi n'emukolo nangilyiraa emwe nawetchu Yesu, kuamilyisa e mwasi mubuya w'elukoo lwa Ongo. ²⁵ Na batcha, mulolae, nyono nyimenyire kwa mwabo muboshi muneyilyisaa e bwami bwa Ongo, nera kuya eye n'eye, mutakatchinyibona ko kandji. ²⁶ Kwa batcha nyibahubanganyisise boshi e lusiku lwa kulwarero, kwa nyono ndete butchindjibuke kwa mikira ya mundju woshi. ²⁷ Kwa bushi nda tchanzaa e kubahubanganyisa e mwasi w'ekulyi wa Ongo. ²⁸ Mutchilange e mitchima yenyu, netche tchi kembe etche muka mweru ababikire kuba balanzi ilyi muala kulyisa e kanisa ka Ongo, ako aulaa kwa mikira yaye yeyine. ²⁹ Nyimenyire nyono kwa enyuma s'ekutenga kwanyi e tchubwa tchukalyi tchwomwerungu tchungesh'emwenyu, tchutababa lyire e tchikembe. ³⁰ Na nyimenyire kwa mwa kakatchi kenyu kungeluk'e bandju bekutet'e mabi, ilyi babuluta e baanda babemangire. ³¹ Kwa batcha, mulalyirae, munakengere kwa myaka ehatchu, e butchufu n'e mushi, ndarekaa e kwanula ngasi mundju kwa malyira. ³² Batcha, nyibabikire mwa maboko ma Ongo, n'oko mwasi w'elukoo lwaye, lungabebaka n'ekubawa ekwima alauma nabo boshi batchesibwe. ³³ Nda tchanyiraa e faranga ilyi e milyinga, ilyi ndjimba sa mundju. ³⁴ Mubeyine mumenyire kwa e maboko manyi makolyire kwa kutchifindja kwanyi ne kwa bala babaa alauma nanyi. ³⁵ Mwa kakatchi ka byoshi nabalosise kwa ekusesa e kasi batcha, kubemire e kutabala e batatchashi re, n'ekukengera e myasi y'enawetchu Yesu, okw'a tetaa yeyine; "lyily'erayi e kwana kulusha e kwangi lyira." ³⁶ Ilyi amala kutet'ebye, era kukom'emafi, era kwema alauma nabo boshi. ³⁷ Boshi bera kulyi ra busibu, bera kumukumbaalyira Paulo kw'eosi, bera kumulamba-lamba. ³⁸ Banasinanyire busibu kwoyo mwasi atetaa, oko batakatchimubo na ko kandji. Bera kumwerekesa kuyika kwa bwato.