¹ Unao e ndjumwa n'ebenyewabo babaa e Yudea, bera kunva kwa e bat'emere nabo baangi lyire e mwasi wa Ongo. ² N'emango Petro eruki re e Yerusalemu, e bashingenene beshirwe bera kuend'ebwaka naye; ³ mwa kuteta, wengilyiraa e mwe bateshirwe na wera kulya nabo! ⁴ Si Petro era kutangira ababira kwa byabaa, era kuteta, ⁵ nabaa mwa musi w'e Yopa, na ema ngo nabaa nendjire nema, nera kulola na nera kubona ebibonekeresi: Tchikayi tchishushanyisi bwe na lutchimba lunene tchenere ebimbi bine, kuteng'embingu kuyikaa nyilyi. ⁶ Mwa kutchumbikisa olo lutchimba, nera kuloreresa, n'ekulola enyama soshi s'oko tchitaka, e somwe rungu, e ndjoka, n'emilonge y'embingu. ⁷ Na nera kunva emurenge wendee wanyibira: Emuka Petro, wite unalye. ⁸ Si nera kuteta: Nanga, enawetchu, ebitatchere ilyi ebibi, bitafiraa kuya mwa bunu bwanyi. ⁹ Noko bwa kabilyi oyo murenge era kunvikan'embingu; ebye Ongo atche sise, utabilolaa nga bisingire. ¹⁰ Ebyera byera kuyika kahatchu; businda byoshi byera kuhubir'e mbingu. ¹¹ Unao, bandju bahatchu batchumirwe kute nga e Kaisatia kuya era nyilyi, bera kuyika kwa lunvi lw'enyumba nabaa nyilyi mwo. ¹² Emuka era kunyibira kuenda nabo busira kutchianyisa. Bano bandju usene banyerekesaa, na tchwera kwi ngira mwa nyumba ya Kornelio. ¹³ Oyo mundju era kutchubalyikira kute abonaa mwa nyumba yaye malaika kumuyikira n'ekuteta: Tchuma e Yopa, na urete Simoni, ubalangirwa Petro; ¹⁴ Yi unga kubira ebindju ebye ungafumisibwa kwo, woyo n'enyumba yawe. ¹⁵ Emango natangire nateta, muka mweru era kubandaalyira, ngoko netchu kwa mutondero. ¹⁶ Na nera kukengera ono mwasi w'enawetchu: Yoana abatisaa kwa meshi, si, mwabo, mungaba tisibwa kwa muka mweru. ¹⁷ Kwa bushi Ongo aberesise lwembo luuma nga tchubano tchwemeraa Yesu Kristo, kute nyono nyingalayilyire Ongo? ¹⁸ Enyuma s'eku nva e byera, bera kusira na bera kukusa Ongo, n'ekuteta: Ongo eresise ebatemere nabo ebutchunguke, ilyi babona e kalamo. ¹⁹ Ebahandjibwaa kuteng'emalyibuko ma Stefano bera kuya e Foinike mwa kisiwa tch'e Kipro ne Antiokia, kushambala e mwasi kwa Bayaudi beyine. ²⁰ Kwera kuba bauma mwa bandju b'e Kipro n'e Kurene, mwa kwisha e Antiokia, bera kwerekera e Bagriki n'ekubalyikisa e mwasi w'enawetchu Yesu. ²¹ E kuboko kw'ena wetchu kwabaa alauma nabo, natchikanda tchinene tcha bandju bera kwemera n'ekualukira e nawetchu. ²² Elubi lwera kuyika mwa matchi m'ebe kanisa k'e Yerusalemu, na bera kutchuma Barnaba kuyika e Antioka. ²³ Emango ayikire, n'ekubona elukoo lwa Ongo, era kushaaluka, n'ekubeema boshi ekuba n'emutchima utchibikire kw'enawetchu. ²⁴ Kwa bushi abaa mundju mubuya, wihure muka mweru n'ebwemere. Na luamba lunene lwera kutchibika kw'enawetchu. ²⁵ Barnaba era kuya e Tarso, kuya kuhonda Sauli; ²⁶ Na, emango amubwene, era kumureta e Antiolia. Mwaka muuma e nyuma, bera kwende baya mwa mikundamano y'ekanisa, na bera kwiyi lyisa bandju banene. Na e Antiokia, kwa lyitanzi tanzi ebaanda babalangirwaa baKristo. ²⁷ Mwako kashangi, ebarebi bera kwandaala e Yerusalemu kuya e Antiokia. ²⁸ Muuma mubo, ubalangirwe Agabo, era kwimuka n'ekuteta kwa muka kwa kungaba businya bunene mwa butala. Bwera kuyika mwa bishangi bya Klaudio. ²⁹ E baanda bera kutchuma, ngasi muuma ngoko aalyire, ku benyewabo balamaa e Yudea. ³⁰ Bera kubiyisa kwa bahosi, kwa maboko ma Barnaba n'e ma Sauli.