¹ Musere omu buzigire bw'ecinabuguma. ² Murhayibagiraga okukayankirira ebigolo, Bulya hali abayankiriraga ntyo ebigolo, bahandisa bamalahika barhanamanyiri. ³ Mukengere abali omu mpamikwa, nka kulya mwankabire babohee haguma nabo, n'abadwirhe balibuzibwa, bulya ninyu mugwerhe omubiri. ⁴ Obuhya bukengwe na boshi, n'encingo y'obuhya erhabagakwo izinga; bulya abagonyi n'ebitwamba Nyamuzinda ayabaheke lubanja. ⁵ Murabe abantu b'oku sima enfaranga cimurhululire n'ebimugwerhe, bulya Nnâmahanga yêne adesire, erhi: n tanka kuleka cirhu n'ehitya, ntanka nakukabulira. ⁶ cicirhuma: rhukaderha ntaka yoboha bulya Nnahamwirhu yeburhabazi bwani, gurhi omuntu ankajirha?. ⁷ Mukengere abakulu binyu babayigirizagya akanwa ka Namuzinda; mulole obuzinda bw'obuzine bwabo munashimbe olwiganyo lw'obuyemere bwabo. ⁸ Yezu Kristu, oku ali nnjo n'ene, kwo anayorha ensiku n'amango. ⁹ Mumanye mwankarhebwa n'enyigirizo za ngasi lubero n'ezi murhamanyiri olunda zarhenga; Bulya nshokano ya Nnâmahanga ezibuhya omurhima, ci arhali biryo birhalerhera ababikolesa bunguke. ¹⁰ Rhujira olutare abarhumisi b'Ecihando barhankalirakwo. ¹¹ Kali, erhi omudahwa mukulu aba amaheka omuko gw'embagwa omu ka-Namuzinda oku kulyula ebyaha, emirhumbaribirhi-ibirhi kuyocibwa eyocibwa mbuga. ¹² Okwo kwo kwarhumire Yezu naye, erhi akola acêsa olubaga n'omuko gwage, ababazibwa embuga y'olugo. ¹³ Kuziga nirhu rhuhuluke, rhuje embuga, rhubarhule ebijaci byage, rhumushimbe. ¹⁴ Bulya rhurhagwerhi en'igulu ecishagala cayorhaho, ci rhwalonza ecayisha. ¹⁵ Oku bulagizi bwage rhurhule Namuzinda enterekero y'obukuze ngasi mango, kwo kuderha emburho y'orhunwa rhuhamiriza izino lyage. ¹⁶ OKujira aminja nakwo n'okushangira ebintu n'abandi, murhakuyibagiraga; entulo za bene ezo zo Namuzinda asima. ¹⁷ Mukayumva abakulu binyu munabakenge; bulya bo balanga emirhima yinyu, banayish'iyidosibwa. Kukwanine bajire ogwo mukolo n'obushagaluke, ci arhali n'oburhe, bulya okwo kurhankabalerhera obunguke. ¹⁸ Murhusengerere emwa Nnamahanga. Rhumanyire oku rhugwerhe omurhima mwinja, n'olugendo lwirhu rhulonza lube lwimana muli byoshi. ¹⁹ Mpunyire bwenene nti munsengerere lyo ngaluka omwinyu. ²⁰ Namuzinda w'omurhûla, wafûlaga omu bafu Nnawirhu Yezu, ye Lungere mukulu w'ebibuzi, erhi nterekero y'omuko gwage gw'endagano y'ensiku n'amango erhuma, ²¹ yêne ammujire bantu nkana, lyo mukajira obulonza bwage omu minja ga ngasi lubero; yene ajire muli mwe ebimusimisize,Erhi Yezu Kristu orhumire. Irenge libe lyage emyaka n'emyaka! Neci, ntyo! ²² Bene wirhu, mmuhunyire nti muyankirire kwinja ebi binwa by'ihano; mubwine oku ntayandisiri binji. ²³ Mumanye oku mwene wirhu Timoteyo nashwekwirwe. Akayisha duba, rhwayish'immulola rhwe naye. ²⁴ Mundamukize abakulu binyu boshi n'abatagatifu boshi. Bene wirhu b'omu Italiya bammulamusize. ²⁵ Inâma ya Nnâmahanga libe haguma nînyu!