¹ Boonso kuri ani busha nasusanya ne byuma byasomborwa e matu e mange, e mutima ani ntwasima ina nashima ntakuruka nirise e byuma ya maata. ² E mwea wa Ongo warimina mu chuo, nakusira mwea washuururwa munkati ne bea bati, e bati banikirang emu nchama ne batu bahiange ne kabua e bikuro. ³ E mine yabo iri ho bubi, e mukakare wahema, ne bakeri be bansa bari ho ishumbiya, ne mukakare bariho itura e bubi byabo. ⁴ E mwea washuururwa nguru munkati nabo na mushurururwa nguru uri buri menke; matu yabe urangange, nerushumbiwa rabe, neyange na yase kurishie ebiruhoruho. ⁵ Angi risiana na mira abe, angi isimira ne mukakare, urange mitutu yabe mu mwea wikinde mukuba bwabe. ⁶ Bushe mwana wahusa tita, na mwisi usimana kuri nina, muhunga mu mukari wae, e murenda mwea nge we numba yae. ⁷ Ina ani emyanikiri ari kuri Mukota, nase rindire Ongo mo ishukara wani,Ne Ongo wani wase nirukira. ⁸ Angi imoa kuri ani, E murenda wani, ne ntambi nase kire kwansi, nase simana, na tambi narika mu mwerimya na Mukota wabesa chaka kuri ani. ⁹ Nase risiya e uti bwe bubi wa Mukota busha nakumukoree bubi, na wase niebere na kunirishie na kunihicha habutara kuri kasha chae. ¹⁰ Na murenda wani asesunga ro, na isubaha yase mutinge na kunishisha kuni kuri Mukota wabe na meso yani yase musunga na wase nyantwa buri keto. ¹¹ E rotu ruma ihimba e kisusu ne rotu ro e momba yase tiwa kore. ¹² E rotu ro wase iye ku kwabe ituka Asuria mu rubungu rwa ku Misiri na ituka Misiri na ku kusi natuka ne nyansa ne nyansa, nituka kuri erou ne rou. ¹³ Ne chuo yase bishiriwa bushe irika munkato nayo, bushe mukorere yabo. ¹⁴ Mpese bea bate ne bio na bihumbo, na kikembe ne mwandu yabe, e barika uma mu uma mu Karimeri, na barishiwe e bio mu Basani wa Gireadi buri matu wa karekare, ¹⁵ E rotu utuka ku kwabe mu rubungu rwa ku Misiri nase mushea e bishisharo. ¹⁶ E bea bati base sunga mu isasa rabo bati, na base tiya e mine yabo mu mitutu yabo ne matema yabo yatanga rukira. ¹⁷ Wase rora buri nsoka. Buri bikai ibururukange mu chuo na baseayo ni subaha ne boba ye Mukota na Ongo wasubaha busha ongo. ¹⁸ Inye ngi Ongo buri oongo? usasiranga e bubi? na urika habasira ne bubi wabe? Na uta rangi e busibuke matu ati, bushwa wakokoma ne buhoro. ¹⁹ Use ikebera kutu sasiranga, wase nyanta e bubi witu na mindi yae. na use taya bubi yabo mu nyansa. ²⁰ Useronjee Yakobo na Iburahimu eboonso, Itukire mo matu a karekare.