¹ Kuruma naha , Yesu wenda mo sambungu mwitura e mwasi wakonda we bhubhake bwa Ongo. ² Abhesenga ubhungange n'e bhafuku bhae ikumi na bhabhi n'e bhomina mbi bharamyanga we e mashumbu n'e makoni: Maria Maderena ungu watunjiwanga mo mashumbu arinda, ³ Jane. mukari wa Chusa, muhani wa Herode, Susana na bhampe bhingi imbi bhasakirwanga na Yesu. ⁴ Kikembe kikiri cha mutimbanga, bheya bhatuka mo sa mbungu barika kumushi nae, webha e mushumo uno: ⁵ Mweki wa mirime uma wendanga keeka e'mirime yae bhukianga e; mumirime, mima ya rara mo munse, yanantwa, na nimpe yariwa n'emironge. ⁶ N'impe ya rare m'otandare, yoonga mwiruka mecha n'eroto. ⁷ N'impe ya rare munkati n'emenke; ya shuka ina yekenyiwa n'e menke. ⁸ N'impe tu ya rare m'oto rwa hunda; yashuka n'ibhuta byuma bhingi. Ikinda iebha mbo Yesu webha mu murenge mukiri: kinsi ng'uri na mate irukira, worukire! ⁹ Bhafuku bhae bhamushisha bhuni bwebha e mushumo ngo. ¹⁰ Wasako bho: muninkwa esibha e bhishisharo by'e bhubhake bwa Ongo; eina mu bhampe, bhahanisiwange byo mu mishumo bhushwa bhari na meeso na bhatanga kae, na bhari na mate ina bhatangorukira. ¹¹ Murukire bwebha e mushumo: E mirime nge bhinwa bya Ongo. ¹² Bhari mu munse nge bhimbi bhorukirange. Ina mushumbu utunjange e kinwa cha Ongo kumunda n'e mitima yaabho kongo bhatasimiri n'ioshukara. ¹³ E bhari murutandara nge bimbi bhorukirange kinwa cha Ongo na ngowa, iina kisira miri kumunda naabho, isimira ra matumatu; n'ikuruka kuruma mu mereko ya mushumbu. ¹⁴ Inji ya rarenga munkati n'e menke, nge bhimbi, bhorukira e bhinwa bya Ongo, byatuka tu mwiekenyiwa na bhonso bwa mirao ya bhutumba n'imoere bhikai bye chuo, n'iruka ibhuta byuma imbi byako. ¹⁵ Inji ya rarenga mu r'oto rwahunda, nge bhimbi, bhorukira e bhinwa bya Ongo mu mutima wakonda, bhetingire mubyo n'ibhuta byuma kir'otu. ¹⁶ Kusira mweyangu, wamasacha e kasuku , wabhumbi ko kumunda na kikai, na utakoch'ibhika ko kumunda n'e ntange; iina nt'waria ko habhasirwa na kikai, kongo mbi bhakimengi bhasung'e chaka. ¹⁷ Bhushe kusira inchi chabhiswa kitatabhukori n'e kinwa chabhiswa kitarukiyo isungwa mu chaka. ¹⁸ Mwitondeke mo bhinwa byorukirange bhaanu, bhushwa bhase ninkayo ung'uri na kikai n'ibhaka ung'usira n'akiro byanikirange ishee we. ¹⁹ Nina na bhatoo bha Yesu, bhabhesenga nti bharaa imusunga, ina bhatakoche bhushwa ne kikembe kikiri che bhea. ²⁰ Bhamushisha: nsoko na bhato bhabhe bhari hambuka, bharaa ikusunga. ²¹ Iina wasoko: koyo na bhanakitu ng'imbi bhorukirange bhinwa bya Ongo n'ikora bwebhange byo. ²² Otu ruma Yesu wakambe mo kitange ne santumwa sae. Washisha bho: twete mo rump'otuko rwe nyansa., bheenda. ²³ Munkati ne ruendo, Yesu w'itinga toro; kwabhucha mibhimbi mu nyansa, e kitange charisa mecha; bhabhese mu bhoobha bw'ikwa. ²⁴ Bhasheere kumushi nae n'imusimo bhamw'ire: Mukota, mukota twashirira. Wasumuka, wafin'e mibhimbi n'e mecha a hehera. ²⁵ Washisha bho: er'isimira rinu riri kuni bhishisha mo bhoobha n'ishishana: ungu mweya wa bhuni, ung'ufinengi n'ekampungu n'e mecha byamorukire? ²⁶ Bhakime mo chuo cha bhaGerasi inchi chatekerana na ku Galilaya. ²⁷ Mor'inanta mor'oto rw'emwiri we nyasa, Yesu wasunga kubhusondori nae mwana w'ubhungu nti urimo mashumbu. itukire karekare nti utambaranga tu nchangi, ntingiye urikanga ekumasinda. ²⁸ Mwisunga Yesu, witaa mubhisando byae n'ieba: kinki ngi kiri munkati ani, nabhe Yesu musike wa Ongo ungu we kwiyo? Nakuhema ang'inibhabhaya. ²⁹ Bhushwa Yesu nt'ufinengi e mashumbu atuke mo mweya ngo wamanubhanga muimumina miri na byuma mo mindi, ina nti ukekeranga byo, n'ihahurwa ne rishumbu mo bweeru. ³⁰ Yesu wamushisha: ongo ngi nye? rej'ioni, bwasakonga e. Bhushwa nti e mashumbu mingi abhesanga kumunda nae. ³¹ Bh'emina ihema kuri Yesu, utarekeringi bho kwirunga. ³² Murou mpo nti hari eimba ra tuhuwa rabhunda. Er'eshumbu rahema Yesu watae bho mo riimba re tuhuwa. Wamusimira. ³³ E bhashumbu bhamutuka mo, n'ikime mo tuhuwa n'e riimba rakanyaha mu nyansa, raminwa n'e mecha. ³⁴ E bharangi bhasunga mbo, bhabheka n'itambya e mwasio mo rubhungu ruti na mo tunsari. ³⁵ Bheya bheenda kasunga mbi byameta, bheya kumushi na Yesu, bhasunga e mweya ngo abhesenga uri ne mashumbu warika hamindi ya Yesu, wambara , na witunganya; bhakimirwa na bhoobha. ³⁶ E bhasunganga 'mbi byetanga, bhaturae mwasi bwamarama e mweya w'er'eshumbu. ³⁷ E bheya bhati baku Gerasi bhahema kuri Yesu watuke munkati nabho mwisubaha. Yesu wa kambe mo kitange wa kuruka. ³⁸ E mweya ngu waramiwanga e rishumbu, wahema Yesu bharike nae hima. Iina Yesu wa mubhecha w'ebha: ³⁹ Kuruka mu mwabhe, na tura bhiti byamakukore Ongo. Wiire n'isansa e mwasi morubhungu ruti e byamamukore Yesu. ⁴⁰ Murikuruka ra Yesu, wakumana kikembe kikiri cha bhea chakumurindire. ⁴¹ Wasunga mukakare wa bhakungu uma ngi Yairo. witaa mu bhisando bya Yesu, wamuhema wakimi mo mwae. ⁴² Bhusha wabhesenga na mwisi wae cha ngomo, wa myaka ikumi na ibhi na nti mukoni w'ikwa. Murienda nko, utendi tete bhushwa ne kikembe che bhea. ⁴³ Himpo, nti hari momina uma urokange nchama mu myaka ikumi na ibhi; nti wamataa bhehe bhiingi mu mashake na nti warirama. ⁴⁴ Weya kuruma na Yesu waturana mungombe ya Yesu. e nchama ya kabhabha mukashangi nko, mu mubhi wae. ⁴⁵ Yesu webha: inye wanturana mo? e bhati bhituna, Petero naambi bhabhesenga nae bhamushisha: Mukota, kikembe chakutimba n'ikusondore, na nt'weba tu: inye ngwakuturana mo? ⁴⁶ Iina Yesu wasako; kuringu wamanturana mo , bhushwa norukira isanguhirwa mo maa. ⁴⁷ E momina wisunga nti wamasibwa , witaa mumakako nae n'ikuwa munkati n'e kikembe chakusingwa waturana mo ngombe ya Yesu n'irama munko kashangi. ⁴⁸ Yesu wa mushisha; mwisi wani; Er'isimira rabhe ramakuramya, enda mubhuhoro. ⁴⁹ Ntiukiri webhange, kwatuka mweya kwa shebhakungu Yairo n'imushisha: mwisi wabhe wamakwa; ang'inubya tu Mukota. ⁵⁰ Iina Yesu irukira tu mbo, washisha shabhekungu: Ang'isubhaha, simira ho, na mwisi wabhe waserama. ⁵¹ E ntambi yeyangabho mo munumba, wahangire kiro mweya wakime nae mongo kuba nti Petero, Yohana na Yakobo n'ishe na nina we mwana. ⁵² Bharengi na kwiyonga murikwa re kikumi. Yesu webha: ang'ire; nti wakwa, ina urere. ⁵³ Bhamucharika bhusha bhosi e mweya wa makwa. ⁵⁴ Iina wamutinge mumine n'iebha na murenge mukiri: mwanunke, simana. ⁵⁵ N'emutima we kikumi wa kuruka tu mu mubhi n'isimana mo kashangi nko, Yesu washisha bho bamuninke biyo. ⁵⁶ E bhabhuti bhe kikumi bhashishara; Yesu washisha bho kiro bhature mweya byamasungwa.