¹ Er'otu 'kuri rwe tumbosa tusira ntero, rwabhikirwa pasaka ntirikiya. ² E bhashe bhakungu bhakakare ne bhandiki bhasonda inse yishura Yesu, bhushwa bhabhesenga bhasubhahang'e bhea. ³ Nakuba, mushumbu ntwa makime kuri Yuda, e wabhikirwa Isikariote, wabhesenga uma mo mwanso we kumi na bhabhi. ⁴ Yuda wenda korukirane ne bhashe bhakungu bhakakare ne mwami we bharangi mu bhususe bwe rimuninkana. ⁵ Bhabhunduke na ngoa, na bharisiana e bhusemuninka bho e bhehe. ⁶ Warekiya wa marisiya, wasonda ntambi yakonda yereninka bho Yesu munkati ne nteko. ⁷ E rotu rwe tumbosa e tusira e ntero, nti bhasondange ishura mburi ya Pasaka rwiya. ⁸ Yesu watuma Petero na Yakobo, webha mbu: mwendi katutunganyie e Pasaka, kongo twarisayo. ⁹ Bhamwire: kuni kusondange ongo mbu twendi katunganyanya yo? ¹⁰ Wasako bho: mukai, e ntambi mukukiya mukime mo r'obhungu mukukumanana na wabhume uma ntwa riya ireya ra mecha, mumwemisanga mo numba e musekimewe. ¹¹ Na nti mwere mine numba: Nyerekuritu wa kw'ire: kuni ngi kuri bhuari e kwamurire bhate e Pasaka ne bhemisa bhani? ¹² Na wabhushea numba nkiri ya ko kwiyo, iri na bhutanda himpo nge hasetunganyie bhanu e Pasaka. ¹³ Bhenda, bhakumana e bhinwa bhitimbyo e byerirwanga bho, bhatunganya e Pasaka. ¹⁴ E ntambi yarekiya yameya, bharika mo bhutanda, e santumwa sae nae. ¹⁵ Were bho: nashima nguru irisa e Pasaka ninu kubhusondori ninubhe. ¹⁶ Bhushwa, narebhushisha, nta risiyo tu byo, iya mo r'otu 'ndo rwaabhesayo ani n'inu mu bhubhake bwa Ongo. ¹⁷ Watinge er'osara wakasanyie ro, webha; mutingi e rusara runo, na mubhanyane ro bhanu mu bhanu; ¹⁸ Bhushwa, narebhushisha, ntomuyo tu mu byuma bye muti uno, iya ne rotu ndo rwiyayo e bhubhake bwa Ongo. ¹⁹ Watinge kambosa, na warekiya wamakasanyie ko, wanoa-noa ko, waninka bho, niyebha: uno nge mubhi wani, e wasibhurwanga bhushwa bhanu, mukiyanga buno murinianikira. ²⁰ Watinge tu e rosara, warekiya wamakasanyie, waninka bho, ni yebha: e rosara runo ngi ndani nchasha ye nchama yani, ngi yasekubhuka bhushwa bhanu. ²¹ Eo mukai, e rikasa rangue e usenisibhura riri hima nani mu bhutanda bhuno. ²² E mwana we mwea, usenda itukana ne bwatiranyiwanga cho, ina bhonso mo mwea ngu e wakoka ro. ²³ Na bhabhucha ishishana, inye mu bhate ng' wakora kino. ²⁴ Hasaa munkati nabho kashootano, inye mu bhate wamubha e mukakare? ²⁵ Yesu wirebho: e bhabhake bh'e byuo bhasibyo, n'e bhabhusimanire bhabhikirwange mbu bhari n'isasi. ²⁶ Kiro byabhunduke mbo kuri bhanu, ina e mukakare munkati ninu, wabhunduki bhuri nge mukeke ne wasima wabhunduki bhuri mukori. ²⁷ Bhushwa inye ng'emukakare, kuringu e ukorange? ntingi hoe uri mo bhutanda? nani, eo niri munkati ninu bhuri mukori. ²⁸ Bhanu, bhanu ngi murikwesumya hima nani mu myereko yani; ²⁹ Ng' yasingwa nira e bhubhake kuri bhanu, bhuri Tita wani e bwaria we bho kuri ani. ³⁰ Kongo murisa n'iyomo mo bhutanda bwani mo bhubhake, na kongo murikayo mo bhitumbi bye bhubhake, mwikera mansa se nganda ikumi na sibhi sa kwisiraeri. ³¹ E mwami webha; Simoni, Simoni, mushumbu wamabhuhuna, bhushwe wabhufufure bhuri mupunge. ³² Ina namakuheme, kongo erisimira rabhe kiro ratetera, na mongo, ukukiya umabhunduka uku sakeyo bhanakinu. ³³ Petero wamwire: e Nyerekuritu, niri hano mwiyenda nabhe ari mu ngoro ar'ikwa. ³⁴ Yesu webha; Petero, nikw'rengi, e nchongore itabhikiri run'otu na neki ntunituna meta ashatu mbu nti ongo unisi. ³⁵ Were tu bho: narekiya nabhutuma nti bhanu musira inku, na musaro, na bhirato, murukanga kikai kitikiti? bhamusako mbu kusira. ³⁶ Na wire bho: e kashangi kano, kinsi e uri na'nku watingi yo, nangu e uri na musaro nae watingi o nangu e usira mukushu wachuye nchangi yae na wachure mukushu. ³⁷ Bhushwa, ni bwerengi, rakomenwa e kinwa echatiranyiwanga kibherereshwe kuri ani: wamarierwa mo mwanso we bhabhi, ne byandaisha iyo bhiri kwihi niya. ³⁸ Bhebha; e Nyerekuritu, sunga mikushu ibhi. na Wire bho: bhurombo. ³⁹ Warekia wamatuka, wenda, itukana ne mwenjo wae murou rwe miseituni, ebemisa bhae bhamutucha. ⁴⁰ E ntambi wiyanga mpo, wire bho; muheme, kongo kiro mukime mu myereko. ⁴¹ Wetunda kore nabho mu bwende bwirekera ikoi, na wanda e maru, wahema, ⁴² Webha: tita umashima, nkuturi e r'osara runo ina e risasa rani kiro rabhese, ina e rabhe. ⁴³ Nampo ngashani nima yasaa mo mbingu mu imuninka maa. ⁴⁴ Warekiya uri munsanganda ne reke, wahema ringi ne ntu bhano sae sabhunduka bhuri nchama, ikirengi muroto. ⁴⁵ Warekia wama kindi ihema,wasimana, wenda kuri e bhemisa bhae, wakumana bho nti bharere. ⁴⁶ Wire bho: bhushwa nki bhanu murere? musumuke na muheme, kongo kiro mukime mu myereko. ⁴⁷ Nambu e bwabhesenga bwebhange we tu, kae, e kikembe che bhea chiya, nangu e wa bhesenga webhikirange mbu ngi Yuda, uma mu rekumi ne bhabhi, wenda kubhusondori na cho, wiya kwihi na Yesu mwimukoke. ⁴⁸ Na Yesu wa mwire: Yuda, mwinikoke bhuno ngi chasingwa usibhura e mwana we mwea! ⁴⁹ E bhabhesenga na Yesu, bhakae imbi e bhisesaa bhebha; Nyerekuritu, tukasubho ne mikushu? ⁵⁰ Na uma mubho wakaso e mukori we shebakungu mukiri, wamukera e kote kw'e kwabhume. ⁵¹ Ina Yesu, watinge e kinwa,webha : reke, shirempo na warekiya wamatinge e kote kwe mwea ngo, wamuramya. ⁵² Yesu webha tu kurie bhakakare bhe bhashe bhakungu, e bhakiri bhe bharangi bhe rirameso, ne bhakungu mbi bhiyango kuriwe: bhanu mumiya bhuri bhakwani na myere na nkoma. ⁵³ Nabhesenga niri ninu e matuati mo rirameso, na nti mureniria mo mine. ina kano nge kashangi kinu ke bhunkangwe bwe mwerimya. ⁵⁴ Bharekiya bhamatinge Yesu, bhamwenja, ni mwisha mo numba ye shebhakungu mukakare. Petero wemisa bho kansoka. ⁵⁵ Habesanga kasha munkati ne bhutara, na bharika, Petero warika munkati nabho. ⁵⁶ Mukori uma wa momina, wamusunga nt'warika kwihi n'e kasha, wamusindera nguru, webha; e wabhume uno wakubhesanga hima n'bho. ⁵⁷ Ina wetuna, webha: e momina, nti nimusi karankusu. ⁵⁸ H'eta ntambi nkeke, warekiya wamamusunga, webha; ongo uma mubho mo bhea mbo. na Petero w'ebha: wabhume, nti ani. ⁵⁹ Harekia kuruma na ntambi nima yemeta, umpe wasindiya, webha: eira e wabhume uno wakubhesanga nturi nae, bhushwa iwe mu Gariraya, ⁶⁰ Petero wasako; wabhume,nti nisi e byebhange ongo, mukashangi nko, nt'ukiri webhange e nchongore yabhikira. ⁶¹ Nyerekuritu, wabhunduka, wasindera Petero, na Petero wanikira e bhinwa bhiti byamwerenga Nyerekurwabho, kubhusondori e nchongore ibhikire runotu ukubhunduke ntu nt' umantuna meta ashatu. ⁶² Warekiya wamatuka mpo, ware nguru. ⁶³ E bhabhume bhabhesenga bhatinge Yesu bhamusea, ni mukama, ⁶⁴ bhamubhumbe e mbaso, ni mushisha bhuno: shea 'ngu e wamakukama. ⁶⁵ Bhamwire bhinwa bhingi byo'chechu na nkambao. ⁶⁶ E ntambi y'e mukoma-koma yarekiya yameya, e rushu rwe bhakungu bhe bhea, e bhakakare bhe bhashe bhakungu ne bhandiki, bhakumanana, bharisha Yesu mu rushu rwabo. ⁶⁷ Bhebha: kuti ongo ngi Kirisito, tweri bhate,Yesu wasakobho; namabwire, mutumukochi isimira. ⁶⁸ Na, namabhushisha, mutumukochi isako. ⁶⁹ Itukirempo e mwana we mwea wenda karika e kwabhume kwe bhunkangwe bwa Ongo. ⁷⁰ E bhati bhebha; ongo kwe ngi Ongo? na wasako bho: mumebha, angi we. ⁷¹ Itukampo bhebha: ntwaasonda tu kariho? twamamwerukire bhate bhesine mo bhunu bwae.