¹ Yesu wasonja e rikumi n'ebhabhi, waninka bho maa na bhunkangwe bwifine n'ibhecha mashumbu na kaara k'iramya makoni. ² Watumabo itura e mwasi wa konda wa Ongo n'iramya e bhakoni. ³ Watonde bho; ang'isubhira kikai muruendo; akiro nkoma, musaro, kambosa,bhehe n'angi bhese na ngombe sibhi. ⁴ Mukira numba yakime mubhanu, murikangamo na ngi mwatukire bhaanu. ⁵ Na kubha nti bhabhukoke, mutukanga mu 'ndo obhungu nti mutito mukungu we bhisando binu mwishea e bhubhi bwabho. ⁶ Bhenda ubhungu m'ubhungu mwitura e mwasi wakonda n'iramya bhea musambungu siti. ⁷ Herode worukira mbi byetange, waruka mwanikiri. Bhusha bhima nti bhebhange mbu Yohana wakufuka muumbi bakwanga. ⁸ Bhampe mbu Eriya wa kusungwa, na bhampe tu mbu uma mo bhatahwa bhakare wakufuka. ⁹ Ina Herode webha: na keranga emuntwe wa Yohana, ungu ng'inye nirukirange byebwange kuriwe? washima wa musunge. ¹⁰ E ntumwa sa kuruka, muiture Yesu e bhiti bya kukorwa. Wenda nabho kumushi mo ruharo rwa ku Betsaida. ¹¹ Kikembe cha bhea chamusunga, cha mwimisa Yesu wakoke bho, n'iture bho e mwasi we bhubhake bwa Ongo; waramya mbi bhashimanga waramye bho. ¹² E bhutu bwasond'isira, entumwa sae samushisha: kuruch'e bhea kongo bhenda murubhungu na mu tunsari bhasonde nkambi na bhiyo, bhushwa hano bweru. ¹³ Yesu washisha bho: bhanu muninkebho bhiyo. Ina bhamusako: turiho na tumbonsa tusanu na bhikwa bhibhi; muribha twamuchurange byarisa bhate n'ibhanyie e bhea bhati. ¹⁴ Himpo nti kuri ngerero ya bhea bhihumbi bhisanu sa bhabhume. Yesu washisha e santumwa sae, murikeche bho kikembe cha bhea makumi asano. ¹⁵ Bhakiambo, bharikecha bho. ¹⁶ Yesu wating'etumbosa tusano n'e bhikwa bhibhi, wararama ekwiyo n'ikasanyie byo. wakeka-keka n'ibanya waninka e ntumwa sae bhanink'e bheya . ¹⁷ Bharisa n'isukuta n'e byombo bya risiya mitundu ikumi na ibhi. ¹⁸ Otu ruma Yesu, wishika ne santumwa sae kahema, washisha bho: bhebange mbu ani ngi nye? ¹⁹ Bhamusako: Yohana murubiki, bhampe, Eliya; bhampe mutahwa wakare ng'wakufuka. ²⁰ Na bhaanu, waashisha bho, mwebha ani ngi nye? Petero wasako: Kirisitu wa Ongo. ²¹ Yesu watinisha bho rasuma kiro bhashisha mweya. ²² W'ebha tu, rakomenwa e mwana we mweya wanubhe nguru; wasebhawa n'e bhakungu n'ebhandiki, wasekwa n'ifuka mu matu ashatu. ²³ Weba tu n'e bheya bhati: kubha kuring'usondange inemisa; witune iwe wesine n'iriya e riango rae na wanemise. ²⁴ Bhushwa ing'usondang' iyoshukaya e mutima wae; wariminya o ; ina ewamariminya o bhushw'ani, nti washukaya o. ²⁵ Ngoa nki ishee e chuo kiti, n'iruka e bhubhake bwa mo mbingu? ²⁶ Bhusha kinsi ngu waankwiri nkene ne bhinwa byani e Mwana we mweya wamukwiri nae nkene mu rotu rwe hende, na mo bhusime bwishe ne sa ngashani sa shurukara. ²⁷ Nabhuire cho muriira, bhima mumbi bari hano bhatakwiyo na nti bhasunga e bhubhake bwa Ongo. ²⁸ Matu munani eta, itukire webhancho kinwa, Yesu watinge Petero, Yohana na Yakobo n'itaya nabho mu rou ienda kahema. ²⁹ Munkati ne rihema e mbaso ya Yesu yabhunduka bhumpebumpe; n'echangi yae yasana bhuri murekani. ³⁰ Bhasunga bhabhume bhabhi bhashambarange nae nti Musa hima na Eriya. ³¹ Bhisheya mo bwime, bhebhange mor'ienda kakindanyie ku Yerusaremu. ³² Petero na bhana chae bhitinga toro, iina bhabhambuka tu, bhasunga chaka cha Yesu na bhabhume bhabhi kumushi nae. ³³ Muntambi ya kiyanga e bhabhume bhabhi bhasiana na Yesu, Petero wamushisha: e Mukota, rakonda turike hano, tukomi masoni ashatu; bhuma bhubhesi bwabhe, bhumpe bwa Musa, na bhumpe bwa Eriya. Nt'wasibhanga byebhange we. ³⁴ Bwebhanga we mbo, utundo rwatuk'ekwiyo rwa bhumbe bho; n'e santumwa satingirwa na bhoobha murisunga bwakime we mur'utundo. ³⁵ Bhorukira murenge munkati n'erutundo: webha bhuno: ungu nge mwana warondorwa nani: mumorukiri! ³⁶ E murenge ikind'irukirwa Yesu wisunga wamasia wesine. E santumwa sabhebhera, sitaturi mweya mwasi musantambinso, mo bhiti byamasunga bho. ³⁷ Mukakoma, murihita e rou, kikembe cha bhea chasunga Yesu kubhusondori naabho. ³⁸ Mwasungwa munkati n'ekikembe mweya uma wakuwa: Mukota na kuhema kae kuri musike wani,bhushwa nge ngomo yani. ³⁹ Ishumbu rimu sinatange, n'ibhucha kw'irake, e r'ishumbu rimusimatange rasuma, utashei na ntambi ya kwitunja, kuruma n'imunoanoa. ⁴⁰ Nakuhema kuri e nsantumwa s'abhe, bhafini ro, nti bhakukocha. ⁴¹ Mbuto yema, Yesu wasako; nariki niinu mukashangi kari bhuni, n'ebhuriya? Risha musike wabe. ⁴² Weya kwihi nae, e rishumbu ramusund' e kwansi n'emusimata nguru, iina Yesu wakem'ereshumbu, waramya e mwana n'imukuruchie ishe. ⁴³ N'ebhati bhasimira e bhukakare bwa Ongo. na kinsi mweya wasimira mu bhiti bhironjange Yesu, webha ne santumwa sae. ⁴⁴ Kuri bhanu mworukire 'shu kino: e mwana we mweya waasibhurwa kinsinso mo mine yebhea. ⁴⁵ Ina e santumwa sitateereri e kinwa ncho; kinwa cha mushumo kuribho; bhatasibhi chebha bhuni. ⁴⁶ Ina mwanikiro uma wehie bho mo mutima, isiba inye nge mukakare mubho. ⁴⁷ Yesu wasibha e mwanikiri we mitima yaabho, watinge mwana mukeke, wamuriya ku mushi nae n'iebha nabho; ⁴⁸ Kinsi ngu wakoke e mwana ngu murina rani, nti wankoke ani 'sine; na kinsi 'ngu wanikoke, nt'wakoke ngu wantumanga. Bhushe e mwanunke mu bhaanu, nge mukakare. ⁴⁹ Yohana webha: e Mukota, twakusunga mweya uma ufinengi bhashumbu murina rabhe; twamutubya bhushwambu utangenda niitu kwetange bhaate. ⁵⁰ Ang'iimutubya, Yesu wamusubhie. bhushwa enti wabhubhaa nti uma mu bhanungo. ⁵¹ Wasunga e matu ae erituka muchuo ngie arikwihi; washima weye ku Yerusaremu. ⁵² Warebheka ntumwa sibhi kubhusondori, bhenda n'ikime m'ubhungu rwa bha Samaria, mwisiba hani hasesamirebho. ⁵³ Iina bhatashei, bhushwa wakaenga munse ya ku Yerusaremu. ⁵⁴ E Ntumwa sae; Yohana na Yakobo isunga mbo, bhebha: e Mukota, ongo sondange tuheme kasha kahite ituka mu mbingu kashike bho? ⁵⁵ Yesu wikebhera kuri bho, n'ifine bho, w'ebha: Nti bhanu mosi kinki ngi kiri kumunda niinu. ⁵⁶ Bhushwa musike wa Ongo weyanga nti bhushwa iriminya e mitima ye bhea, iina muiramya yo. Wenda murump'otuko. ⁵⁷ Mumunse a bhume uma wamushisha: e Mukota, nsekwemisa kuti kuseta ongo. ⁵⁸ Yesu wamusako: E miterere iri na byuna, ne mironge ikwengi bhirumba; Ina emwana we mwea usira hamu bhisewe e muntwe. ⁵⁹ Washisha umpe; nemise. Nae wamusako bhuno: e Mukota, nininke ntambi nendi kasa kataa Tita. ⁶⁰ Iina Yesu wamw'ire: rek'ebakwi, bhatae e bhakwi bhabho; N'ongo enda katur'e mwasi we bhubhake bwa Ongo. ⁶¹ Umpe tu webha; nsekwemisa, e mukota, iina mpese ntambi n'endi karana mo mwitu. ⁶² Yesu wamusako; kisingu wamaturana mu kakenge, wamakae tu kuruma, nti wakomenwa mo bhubhake bwa Ongo.