¹ Mo kindi cha roso, che kasembe, mukomakoma nguru bh'enda h'esinda, nti bhari na rungo ingi e'abhesanga amachura bho; na bhampe bhatindike bho. ² Bhakumana erikoi nti rakushikwa kore n'erisinda. ³ Bhakime, eina bhatakumani e mubhi wa Mukota Yesu. ⁴ Bharuka mbu bwamebha bho, e myanikiri yarungutana bhushwa nchi kinwa, bheya bhabhi bhasungwa nti bhasimine kumushi n'abho nti bhambara nchangi sasanyaa. ⁵ Bhabhesa nti bhasubhaha nguru, bhakukumika e meso e kwansi, imbo bheya bhabhi bh'ere mbo bhomina: bhuni ngw'asonda bhanu mweya uri ho munkati e bhakwi? ⁶ Nt'uri hano, eina wamafuka. muanikiranga mbu e bwebhangae wabhesanga utangatuka ku Galilaya, ⁷ W'ebha: e mwan' emweya wahw'itingirwa mo minwe s'e bheya b'e bhibhi n'ikonorwa, n'ifuka er'otu rw'eashatu. ⁸ Bhasubhukia imbyo bhinwa byae, ⁹ Bhakuruka ituka e kw'esinda, bhatura nji myasi kuri esantumwa sae ikumi na nima, n'e bhampe bhati. ¹⁰ Maria Magdalena ba na Yohana, na Maria nina wa Yakobo na bhampe bhomina hima n'abho, ¹¹ Bh'ire e santumwa imbi bhinwa. ¹² E bhinwa by'abho byasungwa nti bya bhusa k'uri bho, bhatasimiri bho. Eina Petero wasimana n'ikanyire ekw'esinda, w'ekukumika n'itaa e meso kumunda er'esinda, wasunga ho esa nchangi esa muibirirenga m'ubho, wakuruka nti ushisharange m'umbi e byamasunga we. ¹³ Indotu, bheya bhabhi bhabhesanga nti bhendange m'obhungu rubhikirwange mbu ku Emau, rurikire mu bwende wa ntambi sibhi. ¹⁴ Bhabhesa nti bhashambarange bhesine m'umbi bhinwa bhiti e byakwetanga . ¹⁵ Bharekia bhebhanange bh'esine, Yesu w'esine wasaire bho nikw'emisanya nabho. ¹⁶ E meso abho abhesa nti aribha, bhatamuteereri. ¹⁷ W'ere bho: Bhinwa nki byebhange bhanu imbu bw'endange bhanu? Bhasimana nti bh'asubhuka nguru. ¹⁸ Uma m'umbi bhabhi, erina rae Kleopa, wamw'ere: ong'wesine ngi mweni ku Yerusalemu, mw'ifund'isibha ebya kw'etako mu ano matu? ¹⁹ Were bho: Bhinwa nki? bhamw'ere; E bhinwa bya Yesu munasareti, w'abhesingi nti mw'anuri, nt'uri na maa ikora n'iebha mo makako a Ongo n'ebheya bhati. ²⁰ Imbu ewakukiya bhashebhakungu n'e bhakakare bhitu, bhamukere e rubhansa n'imuya. ²¹ Na bhate tw'abhesingi n'e mwenyihiro w'eriramya e baYahudi m'obhukohe; Na run'otu iye matu ashatu ngi eta itukire e bhinwa mbi byabhesa ko. ²² Na bhomina, bhaku ritu nti twateerera bho, bhakutusarimya, bharamuke ekw'esinda. ²³ Bhatasungi e mubhi wae; bhakuruka nti bhaturang'e mwasi mbu bhamasairirwa na ngashani, bhebha mbu nt'uri tu mw'esinda, wamafuka. ²⁴ N'ambi bhampe bhabhesanga hima n'itu, bh'enda kakae m'und'esinda bhuri mbi e wakw'ebhanga mbo bhampe bhomina, eina iwe nti bhakumusunga. ²⁵ W'ere bho: E bhanu bhirunge, bhe mitima yar'itohyaa mor'isimira imbi e bhiti ebyebwanga n'e bhatahwa. ²⁶ Abhesenga nti rakomenwa Yesu wanubhe bhusha mbi bhinwa kongo wakime mo bhongo bwae? ²⁷ Wabhucha ikae mo karisi ka Musa n'e bhatahwa e bhati, wasonsomor'ebho m'undo rwandiko, mo bhinwa bye kuri we. ²⁸ Bhabhesa nt'iye bhari kwihi n'ando ubhungu rw'endange mo 'bho wasond'ikunduka bho. ²⁹ Bhamushisha mbu: Rika hima n'itu, imbu e bwamasir'ebhutu. W'akime irika hima n'abho. ³⁰ Bharekia bhas'ond'irisa, watinge ekambosa, wakasanyie, n'ibhunguraa ko, waninka bho ko. ³¹ E meso abho obhoka, bhamusibhirira, wariribhana, bhatamusungi tu. ³² Bhashishana: E mitima itu ntyakwisarimanga ho wakumanananga wakumanananga n'itu munkati ense n'ituhana e rwandiko? ³³ Bhasimana n'ienda munjo ntambi, bhakuruke ku Yerusaremu; bhakumanana n'esantumwa ikumi na nima, nti bh'ari hima, ibho n'ambi e bhabhesenga n'abho. ³⁴ Bhebha: eira Mukota wamafuka, Simoni wamamusunga. ³⁵ Nabho bhasubhukia emyasi y'e bhinwa e byasunga bho munkati ense, n'ambu e bwamamusibirira bho, wakukia wakasanyie e kambosa n'ibhunguraako. ³⁶ Bharekia bhebhange mbi bhinwa, Yesu w'esine wasimana munkati n'abho, w'ere bho: Bhuhoro k'uri bhanu. ³⁷ Bahbhesa na mushiki, bhasubhaha, bhahaka mbu bhakumanana na kifasi. ³⁸ Yesu w'ere bho: inki chasingwa mukwa mushiki na bhushw'anki chasingwa mubhesa na koha mo mitim'inu? ³⁹ Musisirise e minwe yani n'e bhisando, kongo musimira mbu an'esine uno, munisisirise, bhushwa mbu e mitima isira mubhi na makua, imbu e bwansunga bhanu nabhesa nabyo. ⁴⁰ Warekia w'ebha mbo, washeabho esaminwe n'ebhisando byae. ⁴¹ Bhabhesa nti nti bhasimira bhushw'esangoa, bhashishara, w'ere bho: bhanu muri na bhiyo hano? ⁴² Bhamuninka chunda ch'anchwi ch'ahwa , na bhuki bhukeke. ⁴³ Watinge n'ibhucha irisa mo makako abho. ⁴⁴ Warekia wamaheya irisa: Ngi bhimbi bhinwa byani byabwere ng'ani, nabhesanga n'iri ko kwinu mbu e bhinwa mbi e bhiti byebwanga bhushw'ani mo myomba ya Musa, n'e bhatahwa, na mu Saburi byabherererayo. ⁴⁵ E myanikiri yabho y'obhoka kongo bhasibhirira imbu e bwebha erw'andiko. ⁴⁶ W'ere bho: ng' wandikwanga cho bhumbo , mbu Kirisito wanubhi n'ifuka mor'otu rw'eashatu. ⁴⁷ N'ebhabhi e bhati bhasasirwayo bhakiyayo bhahanwambyo bhinwa morina rae, n'ibhuchie ku Yerusaremu. ⁴⁸ Na bhanu ngi mukubha ekari ho w'ambi bhinwa. ⁴⁹ Ngi bhumbo bwaarebhek'ani k'uri bhanu e ndani ya tita eina murindirenga kuno ku Yerusaremu, iya nampe maa asekia abwehie ituka ekwiyo. ⁵⁰ Wasaa na bho h'ambuka n'itindike bho ku Betania; wasimanya e mabhoko, wakasanyie bho. ⁵¹ Warekia wamakind'ikasanye bho, w'ikoka n'abho, wakukumwa e kwiyo mu mwanya. ⁵² Na bho bhamwindame bhakuruke ku Yerusalemu nti bhari na ngoa singi. ⁵³ E matu eati bhabhesa nti bhari mw'irameso, mw'itata Ongo n'imukasanyie.