¹ Yesu wasimany' emeso, wasung' e bhatumba bhariyang'e bhisabho byabho monku y'erohembo. ² Wasunga musen'uma mushumbakari, waria morumea sibhi. ³ Webha: n' ibwirengi cho mor' eira, e mushumbakari musene ngu wamaria bhingi ireng'e bhampe bhati. ⁴ Bhushwa etukana n' er' eruya ng' wamarish'e bhati mbo e bhisabho monku y'er'ohembo, eina iwe wamariya e bhiti bhikwengi rero we mor' ibhesa 'weho. ⁵ Bhea bhima bhabhesanga nti bhebhange bhushwa n'e makoi akonda konda n'e bhikai byarishiwa mor' irameso mw' itonda er' irameso, Yesu webha: ⁶ E matu asiyayo, mo bhisungange bhanu, hatasiiyo ikoi habhasirw' ikoi nti rakakurwa. ⁷ Bhamushisha: E mukakare, inye ntambi ng' iseyayo mumbyo na mu kani kengeko ngi kasesibhireyo mobho eriya r'e bhikai mbyo. ⁸ Yesu wasubya: Mukohyanga, mutusheereshiwingi. Bhushwa bhiingi bhaseyayo morina rani, n'iyebha: Ngy' ani, n' e kashangi kari kwihi. Anga mw' emisa bho. ⁹ Mukukiyayo mw'erukira bhebhang'e bhita n' e sambangu anga mubhesa na bhobha, bhushwa r' isondekanyange imbyo byeye raroso. Eina ritabhesio neki ng'e hende. ¹⁰ W' ere bho: Chuo kisekwanayo na kimpe chuo, na bhubhake na bubake; ¹¹ Kusebhesayo turingiri tukiri, na, mu mataka m' ingi, makoni na rwaka; kwabhesayo bhishisharo na twengeko tukiri mo mbingu. ¹² Eina bhusondori e bhiti mbyo, bhabhutingeyo na bhase bhunubyayo; bhasebhuronjie yo obhansa mo marango, n' e bhumina, mukuriarwayo bhusondori bwa bhabhake na bhusondori bwa bhakakare bhushwa n' er' ina rani. ¹³ Imbyo bhise bwehieyo kongo mw'ebha bhushw'ani. ¹⁴ Mubhesanga mo mutima kiro m' weshisha inki ngi kisesako bhanu; ¹⁵ Bhushwa nise bhuninkayo bhinwa na bhutesa n' e bharenda bhinu bhatakochiyo ihangana nabyo. ¹⁶ Mukusibhurwayo na kubha n'e bhabhuti bhinu, na bhanakinu, n'e bhari kwihi n'inu, na bhira bhinu, na bhaseshurayo bhingi mubhanu. ¹⁷ Mukubhawayo n'e bhati, bhushwa n'erina rani. ¹⁸ Eina anga na ruma rw'e bhuteo bwinu ruseriminayo. ¹⁹ Mor' ikwesumya rinu mukw' oshukayayo e mitima y'inu. ²⁰ Mukukiayo musunga ku Yerusaremu kw' amatimbwa na bhakwani, musibhanga mbu erikakurwa rae ririkire kwihi. ²¹ Nampo, imbi bhasebhesayo bhari ku Yudea bhabheke mos'angu, imbi bhasebhesayo bhari munkati na ku Yerusaremu bhatuke, n'ambi bhasebhesayo bhari mo mashwa kiro bhakime mor'obhungu. ²² Bhushwa asebhesayo matu a kw' ikwane, mor'ibhererera r'e bhiti byaretiranyiwa. ²³ Bhonso mo bhomina bhasebhesayo nti bhakure n'ambi bharishang'e bhana mabhere mo matu ngo! Bhushwa kusebhesayo bhonso bhukiri mo Chuo mo bhusubhuke kuri bhanu. ²⁴ Bhasekerwayo mu mwere, bhasetingirwayo n'er'ierwa mo byuo, na Yerusaremu usenyenshawayo n'e sanganda, iya mw' oero ekashangi k'e sanganda kabhererere. ²⁵ Kusebhesayo twengeko mo mwishi, mo mweri, na mo sankekeni. Na mo Chuo mw' a bhesayo mushiki mosanganda , bhatasibiyo cher'ironja, etukana n'echanga ch'enyansa n' e mibhimbi. ²⁶ E bhea baseninkeyo mo mushiki mor'esunga e cheyange mo chuo; Bhushwa e bhunkangwe bw'e mbingu bhusetengayo. ²⁷ Nampo e Mwan' emwea wasungwayo weya mw'otundo na bhunkangwe n' itatwa rikiri. ²⁸ E bhikai mbyo bhisekiayo bya bhuch'iya musimane n'esimany'e muntwe, bhushwa nty'eriruhuka rinur'eya. ²⁹ Na w'ere bho mushumo uma: bhanu musungange e musabhibhu n'e impe miti. ³⁰ Etukire ya matito e masani, nti musibha mbu e kiranga ch'e mwishi iye kiri kwihi. ³¹ Nge bhumbo, mukukiya mumasunga 'mbyo by'eya, musibhanga mbu e bhubhake bwa Ongo bhuri kwihi. ³² N'ibwirengi cho mor'eira, e kiranga ncho kitetiyo, e bhiti mbyo nti by'eta. ³³ E mbingu n' e chuo bhisetayo, eina e bhinwa by'ani bhitetiyo anga na kakeke. ³⁴ Mukohyanga kuri bhanu bhesine, mw' esubhaha e mitima y'inu kiro yamoe er'erisa n' er'iyomo, na mo mushiki w'e bhuingo, er'otundo ruteingi bhuri nsisu. ³⁵ Bhushwa rusiyayo bhuri bhukira mo bharikire mo chuo 'kiti. ³⁶ Mukohyanga, n'ihema kinsi ntambi, kongo mubhesa na maa e hima e bhiti mbi bhiseyayo, n'esungwa musimana hamakako n' e mwana w'e mwea. ³⁷ Mo ntambi s'e mumwishi, Yesu wabhesang'uhanange mor'irameso, nienda k'ekinde mor'ou r'ubhikirwange mbu rw' e miseituni. ³⁸ N'e bhea bhati, etukire mukomakoma, nti bhenda e kuri we mor'irameso kamorukirire.