¹ Mo ntangiro abhesenga nti kinwa, n'e kinwa chabhesanga hima na Ongo, n'e kinwa chabhesanga nti Ongo. ² Chabhesang'eraroso hima na Ongo. ³ E bhikai bhiti byaronjiwanga nacho, na kusira mo byakierwanga hasira cho. ⁴ Mu 'cho ngi mwabhesang'e bhuingo, n'e bhuingo bwabhesa chaka ch'e bhea. ⁵ E chaka chasaka mo mwerimya, n'emwerimya nt' wakocha cho. ⁶ Kwabhesanga kuri wabhume uma ntumwa ya Ongo: e rina rae ngi Yohana. ⁷ Wiyanga bhuri kariho, mw'ibhereresha e chaaka kongo bhati bhasimira kuriwe. ⁸ Nti wabhesanga nge chaaka, iina wiyanga mw'ibhesa kariho k'e chaaka. ⁹ Kino chaaka chabhesanga nge chaaka che riira, mu riya racho mu chuo chashea chaaka kuri kinsi mwea. ¹⁰ Chabhesanga kiri mu chuo ,ne chuo charonjiwanga nae, ne chuo nti chamusibhanga. ¹¹ Chianga kuri bhana rwae, na bhana rwae nti bharisimira cho. ¹² Ina kuri e bhati mbi bharimurisia,imbi bharesimira e rina rae waninka bho bhunkangwe bw'ibhese bhana bha Ongo nti 'mbi bhabhutwa. ¹³ Nti mu nchama, nti'mbi bha bhutwa mw'isase ra mubhi nt'isase ra mwea, ina ra Ongo. ¹⁴ E kinwa charonjiwanga mubhi, charika munkati n'itu, charisa nchumo ne riira; twasisirisa e bw'ime bwae, e bw'ime bhuri bwe ngomo ya Ongo bwatuka kwa tita. ¹⁵ Yohana wabhesa kariho kae ,wakuwa: ng'webhanga 'ni ingu usiya kuruma nani wanisondorenga bhushwe wabhesanga wansondore. ¹⁶ Na twamusheenga mo r'erisana rae mu nchumo ne nchumo. ¹⁷ Bhuushe myomba yaninkanwanga na Musa e nchumo ne reiira bhiya na Yesu Kirisito. ¹⁸ Anga mwea warisunga Ongo echa ngomo urikire mubhukubha bwa Tita, na iwe ng'war'emusibhisha. ¹⁹ Kae b'webhanga Yohana , e tambi e bhayahudi bharekiya bh'eya itukire ku Yerusalema, e bhashe bhakungu bhe mpero na Bharawi mwimushisha ongo ngi nye? ²⁰ Webha na ntwatina , webha nti ngi Kirisitu. ²¹ Bhamushisha: mbe inki? ongo Eriya? nae webha: nti ani iwe, ongo mutahwa? webha mbu anga. ²² Bhamuere: ongo ngi nye? kongo twasubhiye mumbi bhakututuma bhuni webha ongo? ²³ Webha, ani murenge ukuwange mo bweeru: ronja ense ya Tita e webhanga Isaya e mutahwa. ²⁴ E bhatumwanga bhabhesanga nti bhafarisayo. ²⁵ Bhamushisha tu: bhushanki ongo rubhikange, kubha nti ongo Kirisitu ari Eria ari mutahwa? ²⁶ Yohana wasubhie bho: ani nirubhikange mo mecha, ina munkati niinu, hari uma nti bhanu mumosi, wiiya kuruma nani. ²⁷ Nta mukoch' iyobhora e muri we bhirato byae. ²⁸ E bhinwa mbi byetanga ku Bhetania itaya na Kuyorodani,himpo habhesanga harubhikenga Yohana. ²⁹ Minekakoma, wasunga Yesu wiiya kuriwe, webha: kae chana che mburi cha Ongo, e ki tunjange e bhibhi bw'e chuo. ³⁰ Iwe ngi webhanga ani: kuruma nani kwiya mwea ewanisondorenga, bhushe wabhesanga kubhusondori nani. ³¹ Nabhesanga nti nimusi, iina wishea ku israeli bhushe niyanga karubhika mo mecha. ³² Yohana watura e mwasi ho: nakusunga e mutima wasika,bhuri kampite wasike kuriwe. ³³ Nabhesanga nti nimusi, iina iwe ng' wantumanga irubhika mo mecha, iwe wanishisha: ing' usesungayo ongo e Mutima wasika ku riwe,ngurubhikange mo Mutima mushasha. ³⁴ Nanasunganga, ungu wabhesanga webhange ani iwe ngi musike wa Ongo. ³⁵ Minekakoma Yohana wabhesanga nturi hompo na ntumwa sae sibhi; ³⁶ Na, warekia wama sindera Yesu nt'wetange,webha: kae e chana che mburi cha Ongo. ³⁷ E santumwa sibhi serukira e bhinwa mbyo, bh'emisa Yesu. ³⁸ Yesu wakae kuruma, wasunga nti bhamubhungurange, washishabho: bhanu musondang'inye? bhamusubhiye: Rabi (nge rieba muhani), kuni kurikanga ongo? ³⁹ Mwie, washisha bho, mukai. Bhenda, na bhiiya harikanga we; na bharika kumushi nae e rotundo. Sabhesanga bhuri byunda bya ntamb'ikumi. ⁴⁰ Nderea, musike abho Simoni, wabhesanga uri mo bhabh'imbi e bhorukirang' e kinwa cha Yohana,e bhabhunguranga Yesu. ⁴¹ Abhesanga iwe wa kumananga wa roso musike abho Simoni, wamwire: twakusunga rukombora (nge ri ebha Kirisito). ⁴² Na wariabho kuri Yesu, wamukae webah: ongo ngi Simoni musike wa Yona ukubhikirwayo Kefa(ng'iebha mbu okanga). ⁴³ Mukakoma, Yesu wahuni ienda ku Ngariraya, wakumana Firipo. wamushisha: nimise. ⁴⁴ Firipo wabhesanga nti wa ku Betsaida, nti werubhungu rwa Nderea na Petero. ⁴⁵ Firipo wakumana Natanaeri, wamushisha: twakusunga ingu e watiranyiwanga na Musa mu myomba ne bhutahwa bwe bwanga, Yesu wa Kunazareti, musike wa Yosefu. ⁴⁶ Natanaeri wa mwire: Kunazareti kwa mutuka cha konda? Firipo wamusako: iiya, w'esungiri. ⁴⁷ Yesu ,wakia wasunga Natanaeri wiiyange, webha kuri we: sunga e mwisraeri ingu kumunda nae kusira bhubhisha. ⁴⁸ Ongo 'nisi? wamushisha Natanaeri. Yesu wamushisha kubhusondori, Firipo wakubhikire, nti Ongo uri kumunda ne muti, na kukusunganga. ⁴⁹ Natanaeri wasubie, wamushishae, muhani, ongo musike wa Ongo,ongo mubhake webhaisraeli. ⁵⁰ Yesu wamw;ire, bhushe na kukusunganga hasikw' emuti, usimira ukusunga bhishiraro byarenga mbi. ⁵¹ Wamushisha: moreira, ukusunga e bhutu nti bwamoboka n'esangashani sa Ongo nti bhatayange na bhahitange kuri e mwana we mwea.