¹ Pauro, ntumwa ya Yesu Kirisitu mwisase ra Ongo mo bhashuururwa bha ku Efeso na mubhasimiri ba Yesu Kirisitu: ² Muninkwe nchumo na bhuhoro ituka kuri Ongo tita witu na Nyerekuritu Yesu Kirisitu. ³ Wakasanirwe Ongo, tita wa Nyerekuritu Yesu Kirisitu, ung' uwatukasanenga mukinsi bhususe bhuti bwa Mukisa we mutima mo bhutaka bw'e mbingu kumunda na Kirisitu. ⁴ E kuri we, Ongo waturondoranga bhusondori echuo ibhesa ho, kongo twabhesa bhashuururwa na bhakonda. ⁵ Twa rairwanga tubesi bana bae kuri Yesu, mo nchimi yae yahunda mor' isasa rae, ⁶ Mor' ianikir' ebusime bw' enchumo inji yatusakenga mo we mo washima we. ⁷ Kuriwe twaroshukara mo nchama yae, e musasiro w' ebhibhi, mo bhuingi bw' enchumo yae, ⁸ Inji ya sanswanga na Ongo, mo bwingi kuri bhate mu kinsi bhususe bwa bhuteesa na bwenge. ⁹ Watushea e nama y' erisasa rae, etukana n' ebyashimangae mo bhuhunange we wesine. ¹⁰ Mwikora byo ematu asekia abhererera mw' ekumanyanya ebhiti kumunda na Kirisitu, imbi bhiri mo mbingu n' ambi bhiri mo chuo. ¹¹ Kuri we twamabhunduke nabhate mo bhis' emwandu, bhuri mbu bwarairwanga bhate iemisanya n'e bwaronjiwang' erisondori na 'ng utondekange 'mbi bhikai bhiti etukana n' emahano er' isasa rae. ¹² Kongo twakora mw' esubhukia ebwime wae, bhate twenyihirenga eraroso kumunda na Kirisitu. ¹³ Kuri we na bhanu hotu, kuruma n' eriyorukir' ekinwa ch' er' eira, e mwasi wakonda we nchukayo yinu, kuri we mumasimira n' erierwa nsimiko n' e Mutima wakonda warairwanga. ¹⁴ Iwo , nge kikima che mwandu witu, mor' ikururirwa raambi bhirondorenga mor' esubhukiya ebwime bwae. ¹⁵ Ng' iasingwa n' ani hotu mor' iyorukira bhebhange mor' esimira rinu kuri Nyerekuritu Yesu; n'e nchime yinu kuri ebhashuururwa bhati, ¹⁶ Ntangasiy' er' ibhutata, nibhutikongi mo mahemo ani. ¹⁷ Kongo Ongo wa Nyerekuritu Yesu Kirisitu, tita w' ebwime wabhuninke mutima wa bhuteesa n' isheiwa mo bwenge bwae; ¹⁸ N' ibhukando e meso e Mutima winu, kongo musibha uning' emwenyihiro urikire mor' ebhikira rae, bhuning' e bhutumba bw' ebwime bw' emwandu wae, wabhikewe ebhashuururwa. ¹⁹ Na 'nki kuri bhate mbi twasimira ebhukiri bhusira hende bw' ebhunkangwe bwae, 'mbu bhusungwange 'shu mo bhongo bw' emaa ae. ²⁰ Warebheka kumunda na Kirisitu, muimufura munkati n'ebhakwi, n' imurikecha mo kwabhume nae mo bhuari bw' ekwiyo. ²¹ Ikangam' emahime ati, ebhukakare bhuti, ebhunkangwe buti, n'e mina ati ingi aminenkanwa nti mokiranga kino ho, eina na mo kiranga kiseya tu. ²² Wariang' ebhiti hasikwa n'e bhisando byae, n' emuronja bhuri mukakare w' er' irameso. ²³ Ng'e mubhi wae, mung' waris' ebhiti, kumunda ebhiti.