¹ Na shima munivumiriye mu buashasha bukeke, rakini munivumireye! ² Busha niri na mono kuri baanu, na mono wa ôngo; Mwisha na bukunisha baanu kuri buume uma mwisha nishiye mukota bikira. ³ Rakini nasimba, buri nsoka watimanga hawa muri sasa raye, emyanikiri yinu ya bihabiha na musiya erisana rinu remutima ni atakata ku mukota. ⁴ Mwisha umpe mweya wamehiya kubusondori nabe ukuhanange umpe Yesu uungu ntitwa mubiri, ama kuti nti mukupore umpe mutima ama himpe myasi ya hunda impe, iingi nti mushimayo, nti mukora ishu. ⁵ Mwisha, nihakange mbu ntinakurukirwa ata kakeke esantumwa batakore. ⁶ Rakini na ani nti nosi iemba ishu, rakini nti buumbu itukana ne bwenge, na baanu mutusunga buumbu munkati ne binwa bibiti. ⁷ Wara na kukora nsambi murikihicha ani kisine mwisha aanu mutarishwe, busha na kubuhana binwa bya ôngo. ⁸ Nakushumere ampe numba sa ôngo, ni pokere muhare mwisha ni butumikire baanu. ⁹ Naani muntambi akosi siri hiima ninu, murihema nti nakuremeya mweya, mwisha banakitu biimbi bakumakedonia bakupore kuri shima rabo na akosi banininkange biimbi bya shima ani, nti nakubese muriyo kwa mweya. ¹⁰ Itukana na mukota kusira eriira riri kumunda nani, kusira mweya waangirangi umpe kwitata murubungu raku Akaya. ¹¹ Mwishanki? Mwisha ntabushimanga? ôngo osi. ¹² Rakininekinwa kirorange ani, nge kinwa kyasekora ani, kiro nazuiswa mufasi yabo biimbi basondange nafasi, hata itukana nge kinwa, bitatange buri baate. ¹³ Ebeya mbi ntumwa sa manko, bibundurange buri ntumwa sa mukota Kirisito. ¹⁴ Wara ntibishanga za, mwisha nyamusairi iwe kisine wibundura maraika wa chaka. ¹⁵ Basi nti binwa bishaa, kuti esantumwa sae sibundura ntumwa siira mwisha wabo wasebese ituka ne murimo wabo. ¹⁶ Nemba tu, mweya wata haki mbu ani mutetera, ata mwemba buno murisimbu ani mutetera, nisunge kuba ani mutetera. ¹⁷ Kinwa kyebange ani ntangebacho buri kinwa cha mukota, rakini buri mutetera, rakini buri muho wa kwitata. ¹⁸ Bakini beya bingi bitatange mu namna ya mumbi, naani nitatange buumbo buumbo. ¹⁹ Mwisha muvumiria biarara, baanu mbi muri na bwenge. ²⁰ Mwisha muvumiriya mweya uburiyange muritumwa, kuti wabumina baanu, kuti ubusimbengi baanu, kuba mwitatange, kuti ukamange mbaso sinu. ²¹ Nebange busha biimbi, kuba akosi baate batetera, rakini mwishanki emweya washima kwisunga, niisunga buumbo buumbo. ²² Ibo Baebrania? Ani buumbo buumbo, ibo Bsiraeri? Ani buumbo buumbo. Ibo babura bwa Ibrahimu? Ani buumbo buumbo. ²³ Ibo bakori ba mukota? Nebange buri mushire, ani nguru, muri nuba nguru sana, muri kamwa saidi, muri minwa nguru sana, muri sonda ikwa nguru sana. ²⁴ Kuri Bayuda na kukamwa mpimbo isano mweta makumi anye anga na nima. ²⁵ Metashatu na kukamwa mpimbo, meta nima nakukamwa makoyi, meta ashatu nakunenka mukitange, mumwishi na mutu nti narika munyasa. ²⁶ munkati na rwendo atu mingi, munkati na bikumba byesandusi, munkati ne bikuba byebibi, munkati na bikuba bya banakitu, munkati na basike bitu, munkati nesambungu, munkati ne mburara, munkati na banakitu be mushukishuki. ²⁷ Munkati ne minubo, munkati ne murangi, matu miingi, munkatine rwaka na mbusa ya mecha, munkati ne rimina, munkati ne keme ne risiya munkanga. ²⁸ Na hema ne binwa bya kubutara, kuri binwa mbi byani ekenya ani kira otu, ngi inuba reriranga ani kira numba ya ôngo kikati. ²⁹ Inye nge nti mutetera? Na ani nti mutetera, inye wasibucha, na ani ntasibuki? ³⁰ Kuti kwitata, nase kwitata mu binwa bye butetera bwani. ³¹ Ôngo, ishe wamukota wiitu Yesu Kirisito, warikanirwa osi nti nemba manko. ³² Munkati na ku Damaski mwami wa ku Areta, wakuchu rubungu raku Damaski mwisha watinge. ³³ Ina natukire mu dirisha, na hita murupango kumunda na mutundu, na mumine naye.