¹ Ani Pauro, nakuhema baanu muri hehya neribebera ra Kirisito, nerisungwa munkati niinu. ² Nabukonga baanu, ntambi yasekiya niri munati niinu, nakochi ibebera mwisha nibakange ibese na isuwa kuri baampe imbi batuansange ba isimba mumumbi. ³ Twama mu mumbi, twasekwana ituka na mumbi. ⁴ Kuba tusumbange na mumbi, twase kwana mu namna ya mumbi. ⁵ Mwisha kikumbura yiitu ya mumbi rakini irina kaara kuri ôngo ikisha bikai bwa bita. ⁶ Twamakisha mwanikiri na wenge na kira kikai chakusiyo chatarishwa kwiyo na wenge wa ôngo, twariya kira mwanikiri kuri bukobe wa Kirisito. ⁷ Twama bese tayari ituwanya bibi ntambi ya kwihicha kwinu yaseiya. ⁸ Musungange buri kubusondori niinu? Kuba mweya uisungange umbo iwe wa Kirisito, uebange shuu kuri iwe kesine. Buriwe wa Kirisito, baate nabo ba Kirisito. ⁹ Ntambi ino nitatange nkeke na bwami wa mukota watuninkanga ihimbo ina nti ibukisha takochi isunga nkene. ¹⁰ Tasungwi kuba nashima iburiya booba mubaruwa. ¹¹ Mwisha beebange baruwa sae sa ritoatena sasuwa, uno uebange buno wa anikire buri baate mu kinwa kuri kumunda na baruwa, kuba tusirako, buri baate mikorere ntambi turio. ¹² Mwisha ntitwereka kuiansa ao kwi susenya nambi bitatange, na ibo basira wenge. ¹³ Rakini baate ntitwitatange irenga ngerero yiitu rakini mungerero yeripimwa na ôngo, ipimwa iya kuri naanu. ¹⁴ Twatakochi iemba kubusondori irenga ngerero, kuba nti twabuhiere, mwisha twakuya kubusondori niinu mwisha twakuya kubusondori niinu ikunduke ngerero yiinu, munkati na mwasi ya konda ya Kirisito. ¹⁵ Nti kwitata irenga nkerero yiitu munkati na murimo wa beya baampe twamabese na munyihiro, kuba ntambi turi na munyihiro yiinu iongoswange, twasebimbonguru kuri baanu. Itukana na chaati. ¹⁶ Ihubiri mwasi yakonda munkati na chuo, kusira miitato naanji yakierengwa mu chaati cha mweya umpe munkati ne binwa bwama ronjwanga. ¹⁷ Ungu washima kwitata, witate kumunda na mukota. ¹⁸ Mwisha ungu wasisiya nti iwei uitatange kesine, arakini ungu utatangwi na mukota.