¹ Na buhema bakungu-mbi bari munkati niinu, aninguu mukungu hiima nabo, mushuhunda weminubo ya kirisito, na mushirika webwine-mbu busehobo rwayo. ² Murishe kikembe cha ôngo kiinki kirikire munkati niinu, muribasimanire, nti mu kaaro, rakini mumashimane, buri ôngo sasa, wara nti mu behebya mikonsi, rakini mukarawa kahunda. ³ Wara angi itawara ungarisi wanikwanga baanu, rakini mubesi michumo yiitinge ( Ya hunda) munkati ne kikembechaa. ⁴ Ne tambi emurangi mukakare wasugwa, muupokere karuku keebwinenki nti kabihabiha. ⁵ Buumbo-buumbo baanu misike, musimire ( Mwihiche) kuri ebakungu. buumbo baanu bibati mwimine muri kwihoheya mwisha mukoreranii, mwisha ôngo wakurenga oongo muhao, rakini waninka biimbi bihiheya chumo. ⁶ Mwihohe kwansi ne mine ye kaara ka ôngo, iri abutate baanu muntambi sae. ⁷ Mubike eminubo iinu hiati kurikire wee, mwisha iwe waburamya baanu. ⁸ Mubesi na kiasi niikae, murenda niinu mushumbu, buri ngoyi ibirange utimbatimbange usandange mweya mwisha wamine. ⁹ Na baanu mushindane nawe munkati ne risimira rinu, murisiba kuba eminubo yaenjo ngi yatimirika kuri banakinumbi barikire muchuo. ¹⁰ Na ôngo we chumo iiti uungu wabubikaranga baanu murikime mu bwine bwae bwa hende munkati na kirisito, muma nuba musantambi nkeke, iwwe kisiine waaburonja baanu ni ibusimanya baanu ni ibuninka baanu kaara ( Maa). ¹¹ Kukwae kuri mamuraka ( Bunkakwe) hata hende na hende amina. ¹² Mu mine ya sirivano, munakinu washururuka, buri buumbu namuhansa, nama buandikire baanu mubinwa bikeke, ntini buhange ni ishundia mbu inongi chumo yeriira ra ôngo, musima nti mutunganana kumunda nae. ¹³ Iwe uri munkati naku baberi, murondorwa hiima niinu, wabukeya baanu na mariko buumbo, mwaana wani. ¹⁴ Mukiyane mumashimane. bahoro bubesi kuri baanu bibati murikire munkati na kirisito.