¹ Mwa ibyo bishazi,mugaja gwa bigiriza gwanirikila,hali minungunu hashambira Bayahudi Bikiyunani hanyanya lya Baebrania kulya bakana babo bakibagirwa mwi ngolezi ya kila na lusiku. ² Yizo ndumwa zana buza bigiriziwa bingi,banyadeta,bitasimizi twehe kusiga kinwa kya Mungu nyuku kola ku lungetenge. ³ Kuko bene wetu,mubondole bandu balinda mukati kenu,buku deterwa bija,abijwire mtima mweru,nyu bwenge lyo tubabike lya lino igambo. ⁴ Nya nyetu tuga gendelela mu kuhuna nyuku kolela yikyo kinwa. ⁵ Yikyo kinwa kyanaba kija mwa masu gu mushambiro goshi,bana bondola Stefano,mundu wali kwijwire bwemere nyu mtima mweru,nya Filipo,nyaProkoro,nyaNikanori,nyaTimoni,nyaParmeno,nya Nikolao wukusola wi Antiokia. ⁶ Banya ba bika imbele lyi ndumwa,bamali bahunira banya ba bikira maboko hanyanya lyabo. ⁷ Mwazi gwa Mungu gwanijula,nyu mugajo gwa bigiriza gwana luga bwenene mu Yerusalemu,bandu bingi ba bagingi banya kenga iyo mbikilizi. ⁸ Nya Stefano ali kwijwire lukogo nyu buhashe,ali ke gira bisomeza nyi bitangaza binene mwa bandu. ⁹ Ti bandu baguma bi singogi ilyali ke buziwaa Sinagogi lya baishikanderia,nya lya yabo ba kilikia nya ba Asia,banyalyoka banyake buzanya nya Stefano. ¹⁰ Ti batakahasha kuhimana nubwenge bwage nyuye mtima mweru uwali ke deta naliye. ¹¹ Bana funda bandu ba bili binwa abale ke deta,twuva uno mundu agwete agaduka Musa nya Mungu. ¹² Bana bika mwa bandi nyu mu bashaja nya basarazi,bana mugendera bana mugwata,banamutwala imbele lyu lubunge. ¹³ Banimaza basubura bu bushumi abali kedeta,uno mundu atalesili kudeta binwa bibi lya handu hashukwe na hanya lyi migako. ¹⁴ Kulya twa muva agwete aga detako uye Yesu mundu wi Nazareti aga hagona hano,nyuku hindula migako tukahewa nya Musa. ¹⁵ Bandu boshi a bali budetere mwayulu lubunga bana mubona malanga ga malaika.