¹ Kisha nde toshimbe, sho takeye da tsheke yakelame Malata. ² Wane wele kema la tombo waleko lo sguudiya ololo wafona yema tshiki; waleko lo tombe tsho tshee lo dja ya woke, wakahetsha loote wa vula kekalokaka ndo atshi tshitshi efula. ³ Paulo akatongona leemba la koni ndo akadje lo dja, loombe lakatombe loko lo waladi la dja ndo mamate lo lonya lande. ⁴ Saa kekeni wane wele kema la tombo nyama mamate lo lonya lande, wakatane amotshi lakina: mete mete one oto aleko ondjakatani, loote losembwe halilangi mbotshika sena, kisha nde mbika loduwa. ⁵ Paulo akasokola nyama lo dja, ndo komboka kodikambo da koolo. ⁶ Ato wako wakakongaka lo menda ndjala la ngenge kana ko lo nyoyi kako; koko, kisha mbokonga edja efula, menda da kodikambo da koolo dakokome, wakengola lokani ndo wakate da nde atshi zambizambi. ⁷ Atshi, lo suke, kete ketshiko oto otoyi la lo tsheke, lokombo lande Pubiyusa, lakatolongola ndo topangisha shii shato lo yoho ya longenyi efula. ⁸ Shende la Pubiyusa atshi laso lo kitanda, lahemo de demba dja ndo lokedi; Paulo, akatshu lende, akalombe, akawahe anya, ndo mbokonola. ⁹ Loko leteyi, ekoni wekina wakaye oma lo tsheke, ndo wakakalangana. ¹⁰ Wakawosha kinemo kefula, ndo, lotshwelo waso, wakatosha danga datshiso kema la lazima. ¹¹ Kisha mbetsha wedi esato, takoto lo wato wa Alexandele, waketsha owo lo tsheke, ndo wakatembaka lo mbeya ase Diyosikura. ¹² Takakomi le Syrakisa, takatshikala shii shato leko. ¹³ Oma lanoo, lo ndjela leeke, takakomi le Reggiyo; ndo, lopepe la midi lakapepe la wediapendju, takatshe shii hyende lo lokendo polo le Puzola, ¹⁴ Lene akatatani analengo wane wakatolombe da tshikala shii esambele lawo. ndo okone kekatatshu le Roma. ¹⁵ Oma le Roma wakaye lohomanelo waso, polo le Foroma ke Apiyusa ndo le asato wa le Tavernasa, analengo wane wakoke wateketa loote waso. Paulo, lo mbaena, akasha Zambi losaka, ndo atshi la lohetete. ¹⁶ Saa kekatakomi le Roma, wakate Paulo dande tshikala lekande, la soda lakolamaka. ¹⁷ Lo shii shato, Paulo akele epalanga wase Yuda; ndo, saa kekakahomanya, akawate ene eteketa: ato analengo, aha latshe koyango le wodja kana le ashidi wa washeso, lakoto lo muyololo le Yerusalema ndo towama leko lasa anya wase Roma. ¹⁸ Kisha mumbolami wembola, wakalange kimomi, loote kodikambo dakakoke dakoka ndjakami. ¹⁹ Koko ase Yusa kombotwane, ndo lakele la kudu Sezara, kondjala koyango da koolo da shita wodja wami. ²⁰ Dako dele lakalombe da nyena ndo nyote; ne da loote ke ekongelo kase Izariyele kemomolota sheni. ²¹ Wakokadimula: sho konongola oma le Yuda kanga barua otoyi loote waye, ndo kanga onalengo otoyi lakate kana mbuta ke koolo loote waye. ²² Koko sho nangaka mbeya omaleye kene kekaniyaye, ne da sho mbeyaka da one oloyi mbutaka fashi tshee datanelo. ²³ Wakawosha loshi otoyi, ndo efula wakayakaka ndjowenda lo loodu lande. Paulo akawateka da Dolelo da Zambi, asha oshuuda, ndo atoni, oma lolembe wa Mose ndo Ambutshi, da mbaokiya lo kene kendana la Yeso. ²⁴ Amotshi wakokiyamalo kene kekandataka, ndo akina kombetawo poo. ²⁵ Oko wakawakaloyaka aha la mbotwane, Paulo akakotshaka paka eteketa: lo mete kele nyuma kekila, akatekete washenyu oma le Ombutshi Ezayi, ²⁶ Akate: tshoka le wodja wone, ndo nyu hanyoke poo; nyakenda la washo wanyu, ndo nyu hanyena poo. ²⁷ Ne da otema wa wodja wako waya koyango; wakakeketshe atoyi wawo, ndo wakadihe washo wawo, hawoke latoyi wawo, hawoke lotema wawo, hwaokadimo, ndo kele handjakonola. ²⁸ Nyeye okone da panda ke Zambi kekatomama le apagani, ndo wakolonga. ²⁹ Saa kekandate osoku, ase Yuda wakatshu, wadjana taamu lasawo. ³⁰ Paulo akatshikala miaka ehende wetondo lo loodu lakandaluweka. akalongolaka wane tshee wakayakaka lendjowena, ³¹ Asambisha Dolelo da Zambi ndo afundisha kene kendana la Owandji Yeso Kristo, lo lotshungo tshee ndo aha la didjima.