¹ Kisha laso, Paulo akatshu le Athene, ndo akakomi le Korito. ² Akatotana leko ose Yuda lokombo lande Akilasa, lo doyo Ponta, kakiye akakomi oma lo Italiya la wadende Prisisila, loote wa Klode akate ase Yuda tshee da tomba oma le Roma. akakeleka lawo; ³ Ndo, oko watshinde la lotomu lako lame, akakite lekawo ndo akatumika: watshi atshedi wa toshapo. ⁴ Paulo akawanyaka lo Sinagogi lo sabato tshee, ndo akokiyaka ase Yuda ndo ase Ngirika. ⁵ Koko saa kekakomi Silasi la Timote oma le Masedoniya, akayasha la kudu kende loteketa, enya ase Yuda da Yeso kele Kristo. ⁶ Ase Yuda laso wakawanya ndo wakatondja tengo, Paulo akahome ahondo wande, ndo akawate: dikila danyu dako lete wanyu! ndeko pepe. tate kakiye, lakotsho le apagani. ⁷ Ndo akatombe leko, akoto le oto omotshi lokombo lande Justusa, oto loka Zambi woma, ndo lele loodu lande lakadjangema lo Sinagogi. ⁸ Koko Krispusa, owandji wa Sinagogi, aketawo le Owandji la djama yande tshee. ndo efula ke ase Korito, wane wakoke Paulo, waketawo ndovo, ndo wakabatizama. ⁹ Owandji akate Paulo lo doo lotsho: tokake woma; koko teketa, ndo tonohalake poo, ¹⁰ Ne da ndeko laye, ndo koto lokonda da kotshe koolo: teketa, ne da ndeko la wodja wa woke lo ngelo kene. ¹¹ Akakite mwaka otoyi ndo wedi esamalo, afundisha lateyi wase Korito oteketa wa Zambi. ¹² Lo saa ketshi Galiyo atshi shushi lo Akayi, ase Yuda wakomala hakoke loote wa Paulo, ndo wakotole letondo ke leta, ¹³ Wata: one oto aleko lo tshutshuya ato da kambe Zambi lo yoho yotshikitani lolembe. ¹⁴ Paulo akatshu todihola onyo, saa kekate Galiyo ase Yuda: naka koleko dikambo daha la losembwe kana dikambo da koolo, lakonyosha oko shadiya, ô ase Yuda; ¹⁵ Koko, naka aleko taamu loote woteketa, loote wa kombo, ndo loote wolembe wanyu, keso nyendaka: lemi halanga ndjala shishi wa aso akambo. ¹⁶ Ndo akakaloya lo leta. ¹⁷ Laso votshee, wakande Sositena, owandji ke Sinagogi, wakokomola letondo ke leta, aha la Galiyo mbidjama lo sowi. ¹⁸ Paulo akatshikala yema edja efula le Korito. le mwisho akalakana lanalengo, ndo akoto lo wato otsha la Syriya, la Prisisila ndo la Akilasa, kisha minya divo lote le Kashiya, ne da atshi lolango lande. ¹⁹ Wakakomi lEfeso, ndo Paulo akatshike wanyande. akoto lo Sinagogo, akasawola lase yuda, ²⁰ Wakawoshi da gawiya shii yande. koko nde konanga poo, ²¹ Ndo akalakana lawo, ata: paka mete mete lemi ndee fete keyaye le Yerusalema. lakoya lenyu, naka Zambi nanga. ndo akatshu lEfeso. ²² Ndo akaholo le Sezare, akade le Yerusalema, ndo, kisha memula kanisa, akaholo le Atiyoshe. ²³ Saa kekandetsha shii miotshi le Atishe, Paulo akoto lo mboka, ndo akatshu tondoo otsha le Galatiya ndo le Phygaya, akakeketshe Ambeki tshee. ²⁴ Ose Yuda lokombo lande Apolosi, lo doho da Alexandriya, oto la yimba ndo akayasha lo miandiko, akaye lEfeso. ²⁵ Atshi lo soma mboka ke Owandji, ndo, okambi wa nyuma, asambisha ndo fundisha lo mete lo kene kendana la Yeso, kanga wele wakandeye obatizo wa Joani. ²⁶ Akatate teketa lo mete lo Sinagogi. Akilasa ndo Prisisila, akoke, akawoshi lawo, ndo wakotondje efula mete mete doyi da Zambi. ²⁷ Oko wakandalange mbeda le Akiya, analengo akakeketsha, ndo akandika Ambeki davo mbolongola dimena. saa kekandakomi, akatshu, lo ketshi ke Zambi, la dihombo defula le wane waketawo; ²⁸ Ne da akasete efula ase Yuda letondo ke wodha, akenya lo miandiko da Yeso kele Kristo.