¹ Ko akakomi la Derbe la le Lysitera. ndo nyende, aki Ombki lokombo lande Timote, ona laki mama k'ose Yuda ombetawodi ndo mbapa kende ose Ngirika. ² Anango wa le Lysitera ndo l'Ikone wakateketa dimena lote ande. ³ Paulo akalange mbemba lande; ndo, akawoshi, akatowonya kumbini, lote tshee waka eyaka da shende eki ose Ngirika. ⁴ Watete lo wedja, wakatee anango da vo monga la eshikamelo keki le Atomami ndo le dikumanyi da le Yerusalema. ⁵ Kanisa yakatetemala lo mbetawo, ndo kotsha lofulo loshi la loshi. ⁶ Wakashimbamela la wolo wa nyuma k'ololo da teketa oteketa lo wodja wa Aziya, wakateho la Firigiya lo wodja wa Galileya. ⁷ Wakakomi suke la Misiya, vo wakalange mboto la Bitiniya; koko nyuma ka Yesohalangi kaanga. ⁸ Ko vo wakeete ma lo Misiya, ndo wakaholo la Toroya. ⁹ Ma lo l'otsho, Paulo akeni oheka: oto omotshi la le Masedoniya akoholwe, ndo mbosengasenga: da nde mbeta ma le Masedoniya, yotokimanyiya! ¹⁰ Ma lo oheka woso Paulo, sho takalange esadi esadi da shio tsho tsha la Masedoniya, tafonya da Owandji akatele da ndjoteketa lokumu l'ololo. ¹¹ Ko takete tsha lo Toroya, ndo taka nomunomuno tsha la Samotarika, ndo wedipendju takakomi le Neyapoli. ¹² Ko takatombe leko takakomi le Filipe, wodja wa tondo woleki woke lo distriki da le Masedoniya, ndo wakendama l'ase Romo. sho taketsha shii miotshi l'osomba woso. ¹³ Loshi la Sabato, sho takatombe ,l'andja wa lokuke, tsha l'okedi, lene akatakani one lene ototana fashi ke dombelo. takakite, ndo sho takateketa l'adimato wane wakahomana. ¹⁴ Otoyi w'odimoto l'ateyi wawo lokombo lande Lidiya, osondji w'epila, lo wodja wa Tiyatira, eki odimoto lakoka Zambi woma. ndo akalongaka. Owandji akodihwe otema, dande nongalonga kene kekataka Paulo. ¹⁵ Ko lakandalongola obatizo, nde la wa lo kumbo kende, akatate tombola: naka nyu mbeyaka da ndeko kokele le Owandji, nyoto lo loodu lami, ndo nyotetemale. ndo akatotshutshuya la tokokomiya tande. ¹⁶ Oko wakatatatshokaka lo fashi ke dombelo, ose olemu omotshi l'odimoto aki la nyuma ke doho, k'Edenge, ndo nde, aka pataka dango, efula oma l'aloho ande. ¹⁷ Ndo akatoyele, Paulo ndo sho. akawana: ato wako waleko ekambi wa Zambi we ladiko da tshee, ndo wambonyote da mboka ke panda. ¹⁸ Nde aka tsheeka osoku shii efula. Paulo akalembe akakadimo, ndo mbute nyuma: lambokotondja, lo lokombo la Yeso Kristo, da tomba lende. ndo aka tombe lo saa keko kemee. ¹⁹ Embetsha wa oko odimoto, wakeni wamboshisha faïda kewo, wakande Paulo ndo Silase, ndo wakatshu lawo lo fashi ke tondo ke amboledi. ²⁰ Wakalambola le amboledi, wata: ato ane wambofukutanya wodja; ase Yuda kelewo, ²¹ Kateketa da loshidi yahatakoke sho nongola kana ndjela, le sho ase Roma. ²² Oloyi wato wakomala otshikitano lawo, ndo amboledi, wakaate ahondo wawo, wakatee da mbakomola fimbo. ²³ Kisha mbokomola, wakawadje l'okodi, ndo wakatee kanga lalama okodi da mbalama dimena. ²⁴ Olami w'okodi, akalongola olembe, da mbaoka l'okodi wa l'eteyi, ndo akawadje ekolo lo lowete. ²⁵ Tsha l'ateyi w'otsho, Paulo la Silase wakalombaka ndo membaka lotombo la Zambi, ndo ase okodi waka longalongaka. ²⁶ Shashimuya akayala adidimu wa kete, ko kudu ke le tshina da loodu l'okodi laka sokasoka; mala keko otoyi, kuke tshee yakadiho, ndo kodi y'ase okodi tshee yakakeleko. ²⁷ Olami w'okodi aketo, ndo, lakandeni kuke tshee y'okodi hwee, akomola lokuwa lande ndo akalange ndjayaka,akakani ate ase okodi wambolawo. ²⁸ Koko Paulo akahangohango la doyi da kudu: toyatsheke ke koolo taleko sho tshee lane. ²⁹ Ko olami w'okodi, akalombe tala, akoto esadi esadi, ndo ndjasokola adidima l'ekolo wa Paulo la Silase; ³⁰ Nde akaatondja l'andja, ndo mbuta: Owandji na kehombami tshee da lemi tshungo? ³¹ Paulo la Silase wakakadimola etawo Owandji Yeso, ndo oko tshungo, wee la kumbo keye. ³² Ndo vo waka wotee oteketa wa Owandji, dno wane weki lo loodu lande. ³³ Nde aka wawoshi, ko tsho lawo ko saa keko l'otsho, aka sole pota yawo, ndo hatshimbitshimbi aka Batizama, nde la kumbo kende. ³⁴ Akatshu lawo lekande aka washa dango dande ndo nde aka ngenangena la kumbo kende lo kene kekandetawo le Zambi. ³⁵ Ko lakahoto wonya, amboledi wakatomi apodishi le totee olami w'okodi: adihole apami wako. ³⁶ Ndo olami w'okodi akate Paulo dikambo so: amboledi wakatomi ato da ndjota one wanyodihole; kakiye kele nyotombe, ndo nyotshu la kii. ³⁷ Koko Paulo akatee apodishi: mala tokomola fimbo loseke ndo aha samba, sho ase Roma, wakatodje l'okodi, ndo kakiye ane vo wototondja loyishshs! kema hakoke nye shambo. watoye vamee lendjototondja. ³⁸ Apodishi wakembe eteketa wawo le amboledi, kako wakoke woma da mboka one vo ase Roma. ³⁹ Wakaye le ndjasengasenga, ndo wakatondja wa lomba da vo tomba lo wodja. ⁴⁰ Kakawatombe ma l'okodi, vo wakatshu tsha leka Lidiya, ndo, kisha mena ndo sengasenga anango, wakatshu.