¹ Otsha lo shii yako, kumekanga Herode akatate soya wanamemba amotshi wa lo kanisa, ² ndo akadake lopanga Yakobo, onango Joani. ³ Akeni da keso ketshi dimena le ase Yuda, akande lokina Petro. - atshi shii yekate aha wana. - ⁴ kisha mbonda ndo mbodja lo muyololo, akawodje lolami wa pele neyi asoda aneyi lehele lehele, la lokani la mbolombosha letondo ke wodja kisha Pasaka. ⁵ Petro okone akalamema lo muyololo; ndo kanisa ko nemba toma loote wande alombelo le Zambi. ⁶ Lotsho wakatangudiya loshi lone lele Herode akahombe mbolombosha, Petro, akakelekama la tosheni tohende, akalalaka lasa asoda ahende; ndo enami letondo ke mulango walama muyololo. ⁷ Ndo nyende, ondjelo wa Owandji wakaye, ndo osase wakahete lo muyololo. ondjelo aketola Petro, akokomola lo leeke, ndo akawote: emala esadi esadi! tosheni takako lanya wande. ⁸ Ko ondjelo akawote: dja okawa waye ndo elato waye. ndo akayetshe osoku. ondjelo akawote lokina. yaomba la dihondo daye, ndo ondjele. ⁹ Petro akatombe, ndo akoyele, nde kombeyaka da kene kekatsheka ondjelo ketshi mete, ndo akafonya da atshi oheka. ¹⁰ Saa kekawete onami wa tondo, ko wahende, wakakomi lo mulango wa mbolo otsha lo ngelo, ndo wakayadihola ndame letondo kewo, wakatombe, ndo wakatetemala losese omotshi. kako ondjelo akamo le Petro. ¹¹ Akayakaloya lende ndame, Petro akate: lamena kakiye lo yoho ya mate da Owandji akatomi ondjelo wande, ndo ambokelekola lo lonya la Herode ndo lo kene tshee kekakongeka wodja wa Yuda. ¹² kisha nde kaniya, da tsho oma lo loodu la Madiya, nyangende la Joani, lakaweleka Malako, kene akahomana efula ke ato ndo wakalombaka. ¹³ Akakokola lo mulango wa mama keko, ndo okambi, lokombo lande Rhoda, akasukana da mbolonga. ¹⁴ Akeye doyi da Petro; ndo, lo olo wande, tondo ke dihola, akalawo tewoya da Petro atshi tondo ke mulango. ¹⁵ Wakawote: wee oleko dadi. koko akashikike da dikambo atshi osoku. ndo wakawote: ondjelo wande. ¹⁶ Koko Petro akatetemala la kokola. wakodihola, ndo wakambe da mbena. ¹⁷ Petro, akaenya lo lonya davo monohala, akasambe okonde Owandji akotondja lo muyololo, ndo akate: nyote Yakobo ndo analengo. ko akatombe, ndo akatshu fashi kikina. ¹⁸ Saa kekandakomi la pendju, asoda watshi lohangayiko wa woke, da mbeya kene kekakomi le Petro. ¹⁹ Herode, akatate lambona ndo kombena, akambola enami, ndo mbisha didjango davo mbela esadi esadi. le mwisho akaholo oma le Yuda otsha le Sezara, da totshikala leko. ²⁰ Herode atshi la tokani ta koolo le ase Tyriya ndo ase Sidoniya. koko wakaye ndjotonwe; ndo, kisha vo tana Blasta, wonyande, wakoni kii, loote wodja wawo senaka oma le wone wa kumekanga. ²¹ Lo loshi lone lakawokana, Herode, akalote ahondo wande wa lowandji, ndo akakite lo lowandji lande, akatole letondo ke wodja. ²² Wodja wakawana: doyi da zambizambi, ndo aha doto! ²³ Kako, ondjelo wa Owandji akokomola, loote nde kombisha Zambi lotombo. ndo akashile, ndodama la wonyodi. ²⁴ Koko oteketa wa Zambi wakatawala yema yema, ndo leemba lAmbeki lakafule. ²⁵ Barnabasi ndo Sawulo, kisha vo mana la dewoyelo dawo, wakakaloya le Yerusalema, lakatshu lawo Joani, lelewo Malako.