¹ Ta lisiyo li tuku yele la inati ta tengai ene, bana ba Isalaele bakatoamana ta okila bieka la lobato ngoto la nyele likolo li betchwe bibo. ² Bofindi bo Isalaele bokanana la beenda betotina bakaemala la bakayambola bobe wibo li liseisi li baafa bibo. ³ Bakaemala ta eseke libo la bakatanga ta lokasa lo ekela loya Mungu, Mungu ibo, ta botuku bo inati bakayambola aleko bobe wibo la bakasimola Mungu ibo. ⁴ Kola ongoma Yosua la Bani, Kedemiele, Sebania, Bni, Belebia la Kenani la bakamama l alimiki lifi fili ambe Mungu; Mungu ibo. ⁵ Kola ongoma, ba Lewi, Yesua la Kedemiele, Bani, Hasabenia, Selebia, Hodia, Sebonia, Petakia, bakabeka mbo: Emalakai, simolakai Mungu, Mungu ino koakola tee kota layalaya; lina liao li talaa lisimolomo, lieke litosimolomo likolo li lisimolomu la liutcholomu litotina. ⁶ Owe ombe Mungu, ko'owe ango, okakela lobola, bola la bola, la embili linde lototina, wenda la biengo bitotina, baye la bieka binde bitotina, la owe ndjo otokuka bio bitotina; embili lo lobola lotosimolo we. ⁷ Owe ombe Mungu, ono atchakolaka Abalama la okofoya ye ta boki bo Ulu la Bakaladi la okafa ye lina li Abalayama. ⁸ Oenaka mbo botema winde bombe la wewe felo yao la okatena limilomu linde mbo otofa ye boki bo Bakanana la Bahiti la Baamola la Bapeliji la Bayebusi la Bagilegase; Ɛɛ, lofoye bofindi winde aleko. La oosila okela kee ta baoi bao loka mbo owe ombe la liengani. ⁹ Oenaka bemusi be baise biso ta Ɛjipito la okaobii bibo tina la baye banenu. ¹⁰ Okaenisa tokesa la bamwali loka loemaela Falo la bekowa binde betotina la baito batotina ta wenda winde, okaluaka mbo bakakelaka bo mbeko ii folo; okanya owe angene lina lilo kani embe yo ta lisiyo lieke. ¹¹ Okafaa baye felo ibo la bakaeta ta baye kee wenda we bokafoomela; la okakusa beke batutaka bo kee litale katikati ii baye bafi. ¹² La okendisaka bo la likole li liangangi ta mbile ee lowa la likole ;o imbe ta saa ee lotiyo loka ofe bo liangangi ta ndole ene enganaka libo mbo bakende. ¹³ Okasuluaka aleko ta longo lo Sinai la okabeka libo ofowa ta lobola, la okafa bo osambisa ta wewe la bikela bi wewe, bie bikeli la toshosha toto ¹⁴ Okabeisa bo Sabata ao ene embe botanu la okaekisa bo toshosha biekisokowe la bikela ta boo boya Mose, bokowa wao. ¹⁵ Okafa bo boila ofowa ta lobola loka lo semba ibo, la okatomoisela bo baye ofowa ta litale loka lo yeme ibo la okaekisa bo balile loka loomba bangene ba wenda we boilokowe boo wao loka lofa bo. ¹⁶ Ndjo bo la baise bibo bakaleka la lofolo la bakaesa ngingo ibo bofoka, baikalaila la weli toshosha tchwao; ¹⁷ bakafeka ooka, baikaenyela ango onga tokesa tchweke okelaka katikati ibo, ndjo bakaesa betchwe bibo bofoka la bakata bokendisi loka mbo bakikowe talikandomu libo ta Ɛjipito. Ndjo owe ombe Mungu ono otomesila, ombe la ngbengbele la owali la ngandi, oitosomaka mangu, ndjo ombe la booto likama; oikatika bo. ¹⁸ Oko ekelaka bo wana a ngombe ene elangoaka la bakabeka mbo: Ono ambe Mungu ao ono atomoila isoko we ta Ɛjipito, la oko ekelaka bo liye'eye likama, ¹⁹ imbe ende ongoma, ta ngandi yao, ii likama, oikatika bo ta liombele; likole li liengange lieikafowaka libo ta mbile ee lowa lokambo likendise bo ta ndole; la likole li imbe lieikafowaka aleko lotiyo loka ife bo liangangi ta ndole ene ekaenganka libo mbo bakende. ²⁰ Ofaka aleko bo Bolimo bolo wao loka loekisa bo la okafaya mana yao ofowa ta bonoko bibo; la ofaka aleko bo baye ta yeme ibo. ²¹ Kota miaka tuku inati okukaka bo ta liombele la baikaenoko leka ango lomoi; tulu ibo yeitingba la bakolo bibo baikumi. ²² Okafa aleko bo bekota la befindi; okaenela bo iniyo iniyo. Kola ongoma bakamba ba ngene ta wenda bo Sihono, bokota bo Heseboni la wenda bo Ogo, bokota bo Basana. ²³ Okaesa bana bibo likama kee tolonge to lobola okakomisa bo ta wenda weke bobekokowe la baise bibo mbo batoota loka loomba bangene bawo wenda. ²⁴ Kola ongoma bana bakaota la bakamba bangene ba wenda. Felo ibo okasuliwisa bangali ba wo wenda, bakanana; la okafa bo ta bao bibo la bekota bibo eseke lomoi, la bana ba wenda mbo bakele boeni elangi bo. ²⁵ Bakakpola wenda la bofoka la boki bo baina la bakamba bangene ba mbele ene ewalaka la bieka bitotina bilo, la biliya bieke bibushomoko la bilanga bi miwiti, la isandu ii bilaya la isandu ii touma likama likama. Bakala la bakakuma solo la bakaosha bindo la baina la bakaemala la bolo wao bofi. ²⁶ Ndjo bambaka la lisomi la batombokelokowe la bakakusa ekela lao mbisa ii bekongo bibo. Bakaita banangoli bao beke babekelaka bo mbo balile lisiya ambowe; bakelaka aleko liye'eye likama. ²⁷ Kola ongoma, okaana bo ta bao ba baiyani bibo beke baenisaka bo wale la ta mbile ee bemusi bibo, oko elelaka bo ambowe, ookaka bo ofowa ta lobola la'ani embe owe la ngandi likama, okafa bo bauwesi la bakauwisa bo ofowa ta bao ba baemaeli bibo. ²⁸ Oko ekaumowaka bo, bakakela bobe lisiya felo yao; kola ongoma, okatika bo ta bao ba baiyani bibo loka bambe bangene likolo libo. Ndjo oko eyaka bo la elelaka bo ambowe, okaoka kota lobola; mala likama okauwisa bo ani ambe ngandi yao. ²⁹ Okabeka aleko felo ibo mbo otomoise bo ta ekela lao. Ndjo bakelaka la lofolo la baitioka toshosha tchwao; bakakela bobe felo iyosambisa wewe wao, (eno yomba mbo buto akaotuta yo, aotouwa loka lo yamo). Bakaila litotoko la bakaesa ngingo ibo bofokala baitioka. ³⁰ Ndjo ombaka la botema bosa miaka likama la obekelaka bo ta Bolimo wao ta ndole ee betondoli biao. Imbe ende ongoma, baikalanga ooka. Kola ongoma okanaa bo ta bao bo befindi be wenda. ³¹ Ndjo ta ngandi yao likama oikakomisa bo ta wewe, oikatika aleko bo loka ombe Mungu a ngbengbele la ngandi. ³² Kola ongoma, Ɛe Mungu iso, Mungu bofi la bofoka la bowa, ye ono atokuka liimilani la booto, kanikai tikaka mbo bomusi boenene boke ta baiso bao, ene ikaosila likolo liso la bekota bibo la bangene biso la bakanga biso la banangoli biso la baise bibo oakola ta lisiyo li bokota bo Asulia kota basiyo be. ³³ Owe ombe la liengani la itotina yeke ikaosila oya liso, okela la wewe, ndjo esu tookela bobe. ³⁴ Bekota biso la bangene biso la bakanga biso la baise biso, baikuki ekela lao; bailaili toshosha la liekisi lieke obekelaka bo. ³⁵ Baikakuwelokowe katikati ii bokota wibo la bolo wao bofi weke ofaka bo wenda bo likama la baina beke ofaka bo; baikakikowa ta bakuwa bibo babe. ³⁶ Tene, ese tombe bekowa laboni, la loka lo wenda weke okafa ambe baise biso mbo tole touma tchwinde la bolo winde, tene tombe bekowa katikati ii yamo. ³⁷ Bieka biamo likama bitoka ambe bekota bieke owe otaka likolo liso loka lo bobe wiso; bambe aleko la lokuku likolo li bindo biso, la likolo li nama iso, batokela ani esami bo. Ɛsu tombe katikati ii bomusi likama. ³⁸ Imbe ende taye itotina, esu tototena liimilani bofoka la totosana layo; la bangene biso, la ba Lewi biso la bakanga biso batota ndembe ibo onga.