¹ Yesu, akawala la Bolimo Botanu, atofowa ta Yolodani, la akatolomo la Bolimo ta liombele, ² elo akakotomo la Satana basiyo tuku inati, ndola, ndomwa, mbisa ibo basiyo, akaoka semba. ³ Satana akabeka linde: Yomba mbo ombe Wana aya Mungu, esaka ishosha ta lie litale likindowe bokati. ⁴ Yesu akabinoisela ye: Isonomu mbo: Buto aiyengani ouwa ango loka lo boila. ⁵ Satana, akaila ye likolo, akaenisa ye la mala emoi bekota betotina be wenda, ⁶ la akabeka linde mbo: Lombofaka lao bofoka bototina, la talaa iye bekota bie; loka ifomo lange, la lotofa la ono lotolanga. ⁷ Yomba mbo otokuamelei, itotina yokomba yao. ⁸ Yesu akamutoela ye mbo: Atosuluwela Ngene, Mungu ao, la otokuwela ye angene. ⁹ Satana akakesa ye lisiya ta Yelusaleme, akata ye likolo li mbele ee Mungu, la akabeka linde mbo: Yomba mbo ombe Wana aya Mungu, kusamaka eke kota nyele; loka isonomu mbo: ¹⁰ Atoesa toshosha ta bakitomo ta litina liao, loka bamoile owe; ¹¹ la batotolo'we ta bao, loka kembo bakolo bao baiumunaka ta litale. ¹² Yesu akabinoisela ye mbo: Oiyengani okota Ngene, Mungu ao. ¹³ Mbisa iyokota ye ta baenyeli batotina bee, Satana aka'aka esika linde kota mbile emoi elo. ¹⁴ Yesu, awali la bofoka bo Bolimo, akabinowa ta Galilaya, la lokuku linde lokameyana ta beki betotina. ¹⁵ Akaekisa ta bisondjamelo, la akasimolomo la baito batotina. ¹⁶ Akaaka ta Nasaleta elo akondaka, la otutana la asili inde, akaota ta esondjamelo lisiyo li Yenga, akaemala loka lo'otanga, ¹⁷ la bakafa ye lokasa loya botondoli Isaya. Ekalikolaka ye, akaosha eseke leke lokasonomo mbo: ¹⁸ Bolimo boya Ngene bombe ambei, loka afo'uwei la baina loka lonangole mboli itanu ta tobube; aotomei loka lo'ouwisabeke betema bbibo bekaobuneya, ¹⁹ loka lobeke lisombulomu li bakandomu, la ta betuku baene, loka losombula bekowa, loka lobeke mwaka bomoi bo ngbengbele eya Ngene. ²⁰ La mbisa, aka kanda lokasa, akafa lo ambe bokowa, la akangala'se. Batotina beke bambaka ta esondjamelo bakamba ango batoimila ye. ²¹ Kola yamo aka'akola obekela bo: Laboni lie lioi li tosiyo, yeke okaokai, lifoenganisomo. ²² La batotina bakabeka loka linde, bakambaka batomwala ta baoi ba ngbengbele beke bambaka batotomowa ta bonoko winde. ²³ Yesu akabeka libo: Ndoena fiye otobekai lange weke bombila mbo: Bonganga, uwisaka owe angene; la otobekai langa mbo: Waka aleko eke ta boki wao ani ekaoke'su ani oko'owa ta Kapelanauma. ²⁴ La akataliya, lotobeka lino mbo ta wewe otobotondoli ono ambe la lokuku ta boki winde. ²⁵ Lotobeka lino ta wewe mbo: Ikambaka Eliya, la mbile ekandomoko lobola miaka besaso la tengai liambe la semba fafo ta wenda bototina; ²⁶ la Eliya aikatomomo ango ta amoi ibo, sakolo kota oko botaali, ta Salapata, ta boki bo Sidona. ²⁷ Imbaka aleko la baito ba baandi; la ango amoi ibo aititanisomo, sakolo ko Namana buto a Asuliya. ²⁸ Bakasoma bo'atotina ta esodjamelo, ta mbile eokaka bo yo mbeko. ²⁹ Bakaemala, bakasaya ye ta boki, la bakaka linde kota isoko ii longo yeke boki boshomoko, loka basuluwise la sekala. ³⁰ Ndjo Yesu akaeta aiteni ibo, akaka. ³¹ Akasuluwa ta Kapalanaume, boki bofi bo Galilaya; la akaekisa lisiyo li Yenga. ³² Bakaumana la libeki linde; loka ambaka atobeka la ki'bokota. ³³ Ikambaka la buto amoi ono ambaka la bolimo bobe ta esondjamelo, la atomama la limiki lifi mbo: ³⁴ Aisai! Ingi imbeaiteni iso lao Yesu a Nasaleta? ³⁵ Yesu akasaya ye, akabeka: Kandaka bonoko, la tomowaka aiteni iya ono buto, la bolimo bobe bokakusama aiteni ii esondjamelo, la akatomowa, ndoena ango okela ye wale. ³⁶ Batotina bakamwala, la bakabeka amoi la amoi mbo: Eni kanda ee lioi ene? Atobeka la ki'bokota la bafpka ta belimo bebe, la batotomowa! ³⁸ Ekatomowaka ye ta esondjamelo, akaka ta mbele eya Simona. Bobili aya Simona ambaka la bomusi bo likama, bakalombokola ye ta litina linde. ³⁹ Akakoma likolo linde, akasaya bomusi, la bomusi bokatika ye. Kota mbile amo, akaemala, la akakuwela ye. ⁴⁰ La bokolase kolase, batotina ne bambaka la bemusi likama bakayela ye libo. Akataliela amoi la amoi bao, la bakauwa. ⁴¹ Belimo bebe aleko bekatomowa ta bee baito likama, batomama la batobeka mbo: Ombe Wana aya Mungu. Akasaya bo la aikalanga mbo ba beke, loka bakaluwaka mbo ambe Kilisito. ⁴² Mbile ekandjaka bose, akatomowa la akaka ta eseke lomoi lo liombele. Embili lo baito bakaluka ye, la bakakoma ko'oko embe ye; bakamba la yeme iongala linde, loka aitikaka ale bo. ⁴³ Ndjo akabeka libo mbo: Iyengani lange longalo ta beki befi besiya mboli itanuiya Mungu, loka lo yamo ndjo lokatomomo. ⁴⁴ La akanangola ta bisondjamelo bi Galilaya.