¹ Ta Sabata bakangala se kanda ebekomoko baoi, la oko e'andjaka ningo loeneno ta lisiyo li yenga bakaya ta mbila, la bakaila bieka bi liesa bieke bikomanyaka bo. ² Baka'osha litale likaosila olikolamana ta boinda bo likemba, ³ la bakaota elo munga, la ongoma baikaena boliyo boya Ngene Yesu. ⁴ Embaka bo loenyekelo ta litina li lobeko lamo, batolome baele baka'emala la tulu ii liangangi. ⁵ Ongoma bataali bakamba la bowa likama, la baka'inya bembo bibo ta nyele. Batolome bamo baka beka libo mbo: Otolukai buto a liwawi ta bangbei loka lo ingi? ⁶ Aiti eke, la ongoma aofowa ta nyele. Enyelakai kanda ebekaka ye lino oko al ani embaka ye ta Galilaya, ⁷ imbo iengani la Wana a Buto lofomo ta bao ba baito babe lo lolilisomo ta lieka ongoma ta lisiyo li basaso afowe ta nyele. ⁸ La bakaenyela baoi binde lisiya, ⁹ ongoma bakafowa ta mbila loinowo ta boki, la bakabeisa ndjaso yamo ta baeki binde liou la amoi, la baito batotina. ¹⁰ Bataali bamo imbaka Maliya Magadala; la Yoana, la Maliya inago aya Yakobo; bataali basiya libo eseke lomoi bakabeisa baeki binde ndjaso yamo. ¹¹ Ongoma ndjaso yeke iyenenaka libo kanda emoi lobeko-beko, la baofeka loimilo. ¹² Ongoma Petelo akaemala, la akaka mangu ta mbila. Akainyama, la akaena ango tulu ifufu yo angene. Akainowa la akamwala aiteni ii yamo ikatomowa. ¹³ Ta lisiyo liamo aleko, baele bibo bambaka aleko ta boki bosiya esika la Yelusaleme kilometele tuku liambe, lina li boki wamo Emauwa. ¹⁴ Bakamba lotekelano mboli la litina li ndjaso yeke itotina ikaosila otomowa. ¹⁵ Embaka bo lotomboli la loiyolano, Yesu ye angene aleko akaya ambe bo, la akakenda libo ndole emoi; ¹⁶ la baiso bibo bakafelomo mbo, bailuwaka ye. ¹⁷ Akabeka libo mbo: Ini ndjaso itote'nu mboli ta lokendo? Bakaemala la bembo be ngandi. ¹⁸ Kola ongoma amoi ibo, lina linde Kelopoa, akabeka linde mbo: Kowe angene ombe boenda ta Yelusaleme, ono aluwi ndjaso yeke ikatomowa ta basiyo beke? ¹⁹ Akabeka libo mbo: Ini ndjaso? BO aleko bakabeka mbo: Ndjaso loka lo litina liya Yesu a Nasalete, ono ambaka bonangoli bo bofoka la bakuwa la baoi ta baiso baya Mungu la baito batotina. ²⁰ Bakanga ifi la bekota biso ba'anyi ye loka lo litchanelo li lingba, la bakata ye la lieka. ²¹ Esu ndjo tombaka otela botema mbo ye buto akoluka ofoya Isalaele ta bobe. La loka lo loko la likolo liye itotina, la laboni imbe lisiyo libasaso mbisa ii ndjaso yeke. ²² La ongoma bataali basiya aiteni iso baomwalise'su. Bakeli elo ta mbila nongo nongo aleko. ²³ La baikaena boliyo winde, ongoma bakainowa la bakabeka mbo basiena lienesi li balikitomo beke bakabeka mbo ambe la liwawi. ²⁴ Bamoi ta baito biso aleko bakeli elo ta mbila. Ba'oshi aleko kanda emoi la bataali bee bakeli, la ongoma loka loya Yesu, baka'osha ye. ²⁵ Ye akabeka libo mbo: Enu baito bakosi bieli! BAito baisami bakuwa ta bawawi aleko loimilo ndjaso itotina ikabeka banangoli! ²⁶ Kilisito aikaengana koni oena bomusi ta mbeko itotina felo iyota ta talaa inde? ²⁷ Ko'akola ta lokasa loya Mose la oetela ta ye ii benangoli, Yesu akabeisa bo ta tasiyo tototina. ²⁸ Ta mbilele bakomaka tina la boki weke batoka, akamba la yeme iyoka. ²⁹ La felo akaunda bo likama akabeka libo: Tikalakai lange; tene, lisiyo lioka la likolase liomba tina. Akaota la mbele loka longala libo. ³⁰ Akangala ta mesa libo, akaosa bokati, mbisa iyoutchela, aka'ana la akafa libo. ³¹ Baiso bibo bakalikolomo, la bakaluwa la onga, akalimowa felo ibo. ³² Bakabekana bamoi ta basiya mbo: Toiyoki kee imbɛ́ imoi ta botema wiso ta mbile atobekele'su ta ndole la atoenise'su tosiyo? ³³ Bakaemala kota mbile amo la bakabinowa ta Yelusaleme. Bakaosha bo liou la emoi bambe eseke lomoi la kendisani libo. ³⁴ Bakabeka libo mbo: Ngene aofufuka omongo, la akaenena la Simona. ³⁵ La baeki baele bakabeka aleko yeke ikaomelaka bo ta ndole la ani baluwaka Yesu ta mbile eyanaka ye bokati. ³⁶ Ta mbile batobekana bo'angene ongoma, Yesu ye'angeneakaemala aiteni ibo la akabeka libo mbo: Tikaka kimia embe lino! ³⁷ Bakamba la bowa la lobilimo, otanga kembo bafoena bolimo bobe. ³⁸ Loka loingi ombei la baenyeli? Loka loingi betema bino bewali la fiye? ³⁹ Moilakai bao bange la bakolo bange, la luwakai mbo imbe ei. Undekeni la moilakai! Loka bolimo boiti la bindo la yuwa. La otoenai la weli mbo lombe lawo. ⁴⁰ Ebekelaka ye bo ongoma, akaenisa bo bao binde la bakolo binde. ⁴¹ Bakambaka la liomali lieke baikambaka ango la liimeli la bakatikala ta limwali. La akaiyola bo mbo: Ombei la leka lo'olaa? ⁴² Bakaenisa ye ekende lo suwe lofoambe. ⁴³ Akaosa la akala ta baiso bibo. ⁴⁴ La akabeka libo: Tene ani lobekaka lino ani lombaka lino: "Iyengani oenganisomo itotina yeke isomomu ta ekela loya Mose, ta benangoli, la ta be'ele" ⁴⁵ La onga, akalikola bo weli loka baluwe tosiyo. ⁴⁶ Akabeka libo mbo: Enakai, tosiyo totoekisa mbo Masiya atoena bomusi, atofufuka lisiyo liyasaso. ⁴⁷ La batobekela loka linde befindi betotina, owakola ta Yelusaleme, baengani okikowa loka baosho limesilomu li bobe wibo. ⁴⁸ Ombei babekeli iyo mbeko. ⁴⁹ Loka lange, lototoma kaniakni yeke Afa alakaka'enu. La enu eikalakai eke ta we boki bofi, kota ani otowalisomoi la bofoka bo likolo. ⁵⁰ La mbisa akatola bo lousa lo boki bofi tinatina la Betaniya la, akaila bao binde likolo, akautchela bo. ⁵¹ Mbile autchelaka bo, akatika bo la akailomo ta lobola. ⁵² Loka libo, mbisa iyokuwamela ye, bakabinowa ta Yelusaleme, ani botema bowali la liomali. ⁵³ La bakaoshamana ta mbile amo ta aiteni ii esondjamelo ani batosimola Mungu.