¹ Baito basia bakambaka ongo ta mbile amo ba beisakaye lobeko lo Bagalilai beke Pilato asondjaka ngelo ibo loka lo liano. ² Akainoisela bo mbo, oenyeleï mbo Bagalilai yamo basieta baito batotina la bobe lokambo baosilösha biale yamo? ³ Lobeka lino mbo, otokelaï, kolangoma oikikoli bawawi, enu atotina otongbai ongoma. ⁴ Lokalo ongoma loka libo liou la bonanei beke mbele isa la loselamo ekaukowaka libo la ikaita bo, osienyelaï mbo bo basiete baito batotina bangali ta Yelusaleme la bobe? ⁵ Lobeka lino mbo, kolaongoma oikikoli bawawi, enu atotina otongbaï ongoma. ⁶ Yesu akabeka la bombila weke mbo, buto amoi alobaka isandu iko mosuke ta elanga linde lo bakoke, akaya oya luka touma tayamo aikaosha. ⁷ Akabeka la bakuki ba elanga mbo, kanikani loya oyaluka yuma isuke yeke miaka isaso ongoma loitocha. Tenaka yo itoama nyele bule loka loingi? ⁸ Bokuki akasanoela bo, Ngene, tikaka yo ta mwaka we ikonde, kolaongoma loto'osha fangi itotina, la lo'okusa tobi onga. ⁹ Kamba eiboti touma ta mwaka botoya. Yeiti ongoma, ototena yo. ¹⁰ Akambaka loeniso la amoi ta bisondjamanelo bi Sabata. ¹¹ Botaali amoi ambaka la bolimo bolilewi miaka liou la bonanei, bindo binde bika inyama la ongoma eikalua ale loinyamo. ¹² Yesu akaenaye la akatayelioï ongoma akabeka mbo, Ima osilo'uwa la lilewi liao. ¹³ Akatela ye baö, la aka'emala mala emoi, ongoma aka'inoisela Mungu kelekele. ¹⁴ Bokota bo esondjamelo akasoma lokambo Yesu asiuwisa ta Sabata, ongoma akabeka likama mbo: Basio basiengana liambe bisiengana lowo likuwa. La ongoma yokoï owisomoï ta basio bamo ongoma tinga ta lisio li Sabata. ¹⁵ Ngene akainoisa bonoko mbo, baito ba nanga! Amoi la amoi ino mbo fungolaka elelo lo nama inde, loka aya mwese yo baye lisiyo li Sabata? ¹⁶ Botaali weke ambe wana aya Abalayama, ono Satana akandiye miaka liou la bonaneï, iengane mbo afoyomoko ta boliki winde weke ta lisiyo li Sabata mboi? ¹⁷ Esilisakaë lobeko mbeko ye baemaeli binde batotina bakaena soni, ongoma likama likulu bakambaka lo'omalo la mbeko itotina ilo ikakelomo ta bao binde, bembila be yuma ii sinapo la fulo. ¹⁸ Kolaongoma Yesu akabeka mbo: Bokata boya Mungu bombeke ingi, la loenganise wo la ingi? ¹⁹ Bombeke yuma isinapo, yeke buto akaosa la akaka lokaloba ta elanga linde, yo'okonda la yo'okoma isandu, ongoma noli ii lokonda baongala ta betaä binde. ²⁰ Akabeka lisia mbo: Loenganise bokota boya Mungu la ingi? ²¹ Bombeke fulo weke bataali akaosa la akaisa atiteni ee bipelo mbisa ibefulo, kombile itotomowa yo itotina. ²² Yesu akaetaka ta beki befi la beki beke, la ani atoekisa, ani atoka ta Yelusaleme. ²³ Buto amoi akabeka linde mbo: Ngene, yeiti la baito iniyo batouwisomo? Akasanoela bo: ²⁴ Wakaï bofoka o'oteï ta boinda bokikelike. Loka, lobeke lino likama olukeï lo'oto, la baitoengana. ²⁵ La ambe boekesi bo mbele aosilo oemala lokando boinda, la oandja loemalo lousa euma boinda, la obeka mbo: Ngene sombulaka loka liso! Atoinoisele enu bonoko mbo: Loilui enu, kamba o'ofowai endeï. ²⁶ Kolaongoma bato akola lobeko mbo: Toka laka la to kamwaka felo yao, la okaekisaka ta ndole iso. ²⁷ La akamutola: Lotebeka, loiluwï kamba o'ofowai endeï, fakai lange, enu batotina bakeli ba bobe. ²⁸ Bileli la losio baino batongala ongo, kamba otoenai Abalayama, la Isaka, la Yakobo, la banangoli batotina aiteni e bokota boya Mungu, ongoma enu oto'tomoisomoi lousa. ²⁹ Atoya ta biseke bi etomoelo la mbile, ta biseke bi likolo la mbole, la batongala ta bokota boya Mungu. ³⁰ La moilakai, ba mbisa batongala felo, be bafelo batongala mbisa. ³¹ Ta lisiyo liamo, Bafalisa basiya bakaya ambe ye, ongoma bakabeka mbo: Fowaka eke, la kaaka, loka mbo Elode ambe la yeme iyoitowe. ³² Akamutoela bo mbo: Kakai okabekai la nama a bakolo amo mbo: Laboni lo'obeka lotofoya belimo bebe, la ongoma lotouwisa baito ba biale, lasiyo litoya lotokoma ta liko. ³³ Kola ongoma iyengani lange lokende laboni la elongo la basio batoya ongoma mbo iyengani mbo bonangoli aingbaka eseke losiya, kanga ta Yelusaleme. ³⁴ Yelusaleme, Yelusaleme, owe ono otoitaka banangoli ongoma otouma la babuki beki boto'umomo ambowe, mbile ibule lokambaka la yeme iyosela bana bao kanda emoi kee koko atoselaka bofindi winde sekala ii bambembe binde, la ongoma oikambakai la yeme. ³⁵ Tene mbele ino etotikala, la lo'obeka lino mbo: Ono atoya la lina liya Ngene autchelomoko.