¹ Fesete, ta lioti li bokota winde, mbisa ii basiyo basaso akafowa ta Kaisalia la akalila ta Yelusaleme. ² Benganga befi; la bianga be Bayunda bakasitaka Paulo, bakalombokolae, la, ta lieni libe, ³ olengila loka kee ta losamo baka okata ye ta Yelusaleme. Loka bakakomanyanaka likomi lioita ye ta ndole. ⁴ Fesete akabinoisa bonoko mbo Paulo ambe ta bonyololo ta Kaisalia, la ye angene alangile ooka elo la mangu. ⁵ Akabeka mbo: baito ba lokuku aiteni ino basuluwe elo lange, yomba mbo loaso loositaka lombe loka lo botolome amo, basiteke ye. ⁶ Fesete akaumowa libo basiyo ndoeta bonanei ao liou, akasuluwa ta Kaisalia. Laotombale, akangala ta keka inde ee lisambisomu, akaesa ishosha mbo Paulo aye. ⁷ Mbile ekayakae, Bayunda be bakafoaka ta Yelusaleme bakalingilae, la baikaluaka oemalisa yo. ⁸ Paulo akabinoisa bonoko mbo: Loikeli bobe loka lo bikela bi Bayunda, lamba loka loya Petelo, lamba aleko loka loya Kaisala. ⁹ Fesete, akambaka la yeme iyoomalisa Bayunda, akabeka la Paulo mbo: Olangile osuluwa ta Yelusaleme, loka losambisomo taye ndjaso felo yange? ¹⁰ Paulo akabeka mbo: Lotoemala ndjo felo ii lisambisomu liya Kaisala, iyengani aleko lange osambisomo ko-eke. Loikeli bobe ta Bayunda, ani etoluwo we la weli. ¹¹ Yomba mbo lombe buto bobe, lamba lookela lobeko loengani la lingba, loitofeka ongba, la Yomba mbo ndjaso batositaka lange imbe ibe, buto ango amoi aimbo kesei ta bao bibo. ¹² Kola ongoma Fesete, akabekana la bakendi binde, akabinoisa bonoko mbo: Olengila ooka ta Kaisala; la otoka felo iya Kaisala. ¹³ Mbisa ii basiyo, bokota Akalipa la Belenika baka koma ta Kaisalia oyafa Fesete kalibo. ¹⁴ Ekambaka bo batoetisa basiyo likama elo, Fesete akabeisa la bokota lobeko loya Paulo, la akabeka mbo: Botolome amoi ambe ono Feliki atikakae ta bonyololo. ¹⁵ Oemaela ye, oko embekei ta Yelusaleme, biange befi la bekumi be Bayunda baka sitakae, bakalengila lange mbo lokpese ye. ¹⁶ Lokabinoisela bo mbo yeiti bonuna bo Baloma ofa buto ta bao ba basiya felo koni mbo ono akasitokomo aete felo ii beke bakasitakae, loka aoshe ndole eobinoisa bonoko loka lo lobeko linde. ¹⁷ Ekasila bo oya eke, loikaumbakela, la lokangala laotombale ta keka ee lisabisomu, la lokaesa ishosha, botolome amo akesomo. ¹⁸ Basitiki, bakaemala, baikatomoisa lobeko ango lomoi lo bobe ta yeke lokambaka lotoenyelisa loka linde; ¹⁹ Bakambaka linde la fiye loka lo lisemboli libo, la litina liya Yesu ono akaosila ongba, ko'ani Paulo akabeka mbo ambe la liwawi. ²⁰ Loikaluwakw ndole ee litina liye ndjaso, la lokaiyolae lamba atoimila ta ooka ta Yelusaleme, loka losambisomo ta litina liye ndjaso. ²¹ La Paulo akalengila mbo akukomo loka lo liteni liya bokota bofi, loka leka mbo bakuke ye kani etotomei ye ta Kaisala. ²² Akalipa akabeka la Fesete mbo: Lolangile koni ooka buto amo ei ya'angene. Elengo Fesete akabeka , ootokae. ²³ Laotombale, Akalipa la Belenike bakaya la bofoka, oota ta lisambisomu eseke lomoi la biange be basilikani la batolome bafi ba boki. Ta ishosha iya Fesete, Paulo akesomo elo. ²⁴ Fesete akabeka: Bokota Akalipa, ofoenai buto ono linginda lifi li Bayunda bakaya oyasitakae ambei, ta Yelusaleme, la eke aleko, la lokaka mbo yeiyengani ale linde omba la liwawi. ²⁵ Loka lange, liluwi mbo aikeli lobeko ango lomoi loengani la lingba; ye angene ndjo akasamaka ooka ambe Bokota bofi, la lokatena mbo lototomae. ²⁶ Loiti lalobeko lo fololo losonele bokota bofi loka linde; Loka lamo ndjo lokatomisae ta baiso bino, mbo, Bokota Akalipa, mbisa iyo felae, lombe la fofe iyosonelo we. ²⁷ Loka lofoenyela mbo yeiyengani otoma bokandomu la'ani toitakaenisa litina li lositokomo linde.