¹ Iyondu lange lombe la lokuku! Yeimbomba la litina, la lotoeta tii kota baenesi la basaki baya Ngene. ² LOluwi buto amoi katikati iya Kilisito ono alilaka kota lobola lo asaso ifoeta miaka liou la inati: Lamba ambaka katikati ii bindo lamba lousa lo boinda, loiluwi, ndjo Mungu aluwi. ³ Loluwi mbo buto amo alile kota lobola (lamba lousa ta bindo, lamba lo bindo, loiluwi, Mungu aluwi) ⁴ Akaoka mbeko yeke yeitoluana obekomo yeke buto aiyengani obeka. ⁵ Loka lo buto amo lotomba la lokuku. Ndjo loka lange loitomba la lokuku, kanga kota bolelamu wange. ⁶ Yomba mbo lokaomba la lokuku, loitomba ebebe, lotobeka wewe. Ndjo lototika mbo buto aiyenyelikei kanga kota ye itoenena ye la imbo kaka katikati yange. ⁷ Lotofekila mbo loiyomalaka ta Baenesi bafi bafi, beke bambe batomomu baya Satana, loka itungisei loka loimbaka la liomali fafo. ⁸ Lo'osembola Ngene mala isaso ifowe ambei. ⁹ Ndjo akabeka lange mbo: Ngbengbele ange efoengana lao, loka bofoka wange botoengana ta bolelamu. Lotosimola la liomali ta bolelamu mbo bofoka boya Mungu bongale likolo liange. ¹⁰ Kola ongoma loto'omala loka loya Kilisito loka lo bolelamu loseolomo la bemusi la biale la tale. Loka ani embei la bolelamu, lombe la bofoka aleko. ¹¹ Lombe ebebe! Enu okafekei boimo bobe. Ikaondoko lange lombe la lokuku lino. Imbe loiti leka, loiti mbisa ii batomomu bamo la bolo. ¹² Ndembe ee botomomu bo wewe bo'osila oenena ambe'nu ta bofilili bototina, la tokesa la bamwali la bakuwa baofoka. ¹³ Enu oenoi osungama kanda emoi la mbele ee Mungu isiya ta eni ndole? Loka mbo loitilanga omba kee bolito lino. Mesilekei bobe woko! ¹⁴ Tene mala ee isaso lotokomia mbo loye ambe'nu. Loitomba aleko bolito ambe'nu. Loilangi olinga bieka bino, enu ndjo. Yeiyondu mbo bana baisele baise bieka, kanga ndjo baise baisele bana. ¹⁵ La liomali, lotofoya itotina lombe lao la lotofomo ta belimo bino. Yomba mbo ei lokaosame'nu likama, otosameni ango iniyo ani? ¹⁶ Ndjo, enu o'obekai mbo: Loitomba bolito ambenu lokawaka la weli mbo lo'anyenu la lilimbi. ¹⁷ Ta baito bee lokatoma bo ambenu, lolimbeke'nu la ndai? ¹⁸ Lokalengilaka Tito mbo ake la lokatoma aleko ye la nduku inde. Tito aolimbeke'nu? Toikeli mbeko ii bolimo bomoi? Toikendi ta ndole emoi? ¹⁹ Enu otoenyelai ko'ala mbo totolongisomo felo ino? Totobeka felo iya Mungu, katikati iya Kilisito, la mbeko itotina imbe ango loka lofenu bofoka, basamomu. ²⁰ Loka lombe la bowa mbo lotoya oyaenenu ta bomuna we loisami la enu otoenei ta namuna ene oisami. Yomba longbano lotomba la yeme la lisomi la tale la batongi la loseolomo la lofolo lo liye'eye. ²¹ Lombe aleko la bowa mbo oko eteyei lisiya, Mungu ange atofei soni felo ino la lotolela likama ta beke bakaokela bobe felo ani eitaka kikola bo betema ta mbeko ii bowewe la belefe la yeme ibe yeke ikaotuta bo.