¹ Paulo, botomomu boya Yesu Kilisito ta yeme iya Mungu, la wina Timote, ta Ɛtanda loya Mungu leke lombe ta Kolito, la baliengani batotina beke bambe ta Akaya: ² Tikaka mbo liuwisomu la haii lifomo lino liofowa ambe Mungu Ise iso la Ngene Yesu Kilisito! ³ Mungu Ise aya Ngene iso Yesu Kilisito afomoko lokuku, Ise a ngandi la Mungu a liongondji litotina, ⁴ ono ato'ongondje'su ta bemusi biso, loka, kola liongondji lieke likafowa ambe Mungu, esu toengane aleko o'ongondja beke ta bemusi! ⁵ Loka, ko'ongoma bemusi beya Ngene beoya ambe'su, ko'ongoma liongondjomu liofowa ambe Kilisito. ⁶ Imbe mbo toto'osha bemusi, imbe loka lo liongondjomu lino la liuwisomu lino; iomba mbo tosiongondjomo, imbe loka lo liongondjomu lino, lieke lito'oshe'nu ta ndole eolendeela bemusi bieke bekaolingile'su. ⁷ La liimeli liso ambe'nu likokaamani, loka toluwi mbo, okambai ta bemusi, ombei aleko ta liongondjomu. ⁸ Toilangi, ale, otike'nu lobungo, baina, ta ndole ee bemusi bieke beoshi esu ta Aziya, bieke bekalongeleke'su, likolo lii befoka biso, ta bofono weke toikaenyelaka ale mbo totoengana ouwa. ⁹ La tomoilaka kee bamoi mbo to'ongba, ta okosa ota liimeli ambe'su angene, alafu ofa la Mungu, ono atoyayoisaka beliyo. ¹⁰ Kowe ono akafoye'su la ambofoyeke'su ta bofono wamo bo lingba, ee ono tombe la liimeli ambe ye mbo atouwise'su lisiya, ¹¹ ɛnu angene aleko okasunge'su la basomboli bino, loka lo lifotisomu likasila oshe'su mbisa ii basomboli ba baito likama to'oshe fofe ee oinoisa kelekele loka liso. ¹² Loka yeke ikaokela tala iso, imbe likuwa li baenyeli biso, bieke likaese'su ta wenda, la loeto ambe'nu, la liengani la botanu felo iya Mungu, tinga la liluwi li boniyo, ngoko la losamo loya Mungu. ¹³ Toitosonele'nu lobeko losiya amboko yeke itotange'nu, la yeke iluwi enu. La loenyeli mbo otoluwai yo kota tunga, ¹⁴ ani ekaoluwe'nu mbo esu tombe tala inio, la ongoma otombai aleko tala iso ta lisiyo liya Ngene. ¹⁵ Ta lioki liamo, lokambaka la yeme ioya ambe'nu oumei bauwi baele; ¹⁶ lokambaka la yeme loete ambe'nu, loka lo'okoma ta Mekedoniya, mbisa iofowa Mekedoniya lokomele'nu, la okomiseni ta Yuda. ¹⁷ Kembo, oimila yamo, lokambaka ango olema-lema bule? Ta litina liko imbeambei yee kee oto? ¹⁸ Ongoma wewe mbo Mungu ambe a liengani, lioi lieke likabeiseke'su enu lieikamba "Ongoma" la "Oto". ¹⁹ Loka wana aya Mungu, Yesu Kilisito, ono toka tondolaka ye loka linde ambe'nu, lange, la Siluwano, la Timote, yeikamba Ongoma la Oto, ngoko ikambaka Ongoma ene ekambaka ambe ye; ²⁰ loka ta yeke imoili basaka batotina baya Mungu, ambe ye ndjo "Ongoma": Ta yamo aleko totobekaka Ongoma loka linde etobekomo liso ta tala eya Mungu. ²¹ ono akaemalise'su lino ko pkoo ambe Kilisito, la akauwe'su baina, imbe Mungu, ²² ono akata aleko isiyo la akata ta betema biso bolimo winde kee botiko. ²³ Kumbi losiosa Mungu bobekeli wange ta bolimo, loka loenise'enu mbo loikeli ale ta Kolito; ²⁴ yeiti mbo tosietelee'nu ta liimeli lino, ngoko to'osunga ta liomali lino, loka ombei ko'pkoo ta liimeli.