¹ Kaamo, Yesu ukena a ndei dja dhene ka na djabhuwa, igulusia ka na ikokolia livfia la likima la bhukota bha Mbali. ² Bhaa bhúú na bhano tabha vfili bhubhia nana, ka na bhali bhamo bhaa bhú bhia bha bhike na mipumatima ma sulu ka na ndutu: Malia, mbisiane wa Magadala, anga udnjo bhagu sabha bhu vfunduwa angese, ³ Yoana, madya wa Kuza, angbela bhima bha Elodi, Susana, ka na bhagi bhaamo, bhaa bhun'kambila na bhima bhabho. ⁴ Dyombo ta dhene li kumanila, ka bhushe bhu idja á ndei dja dhene angese, ú vfia mbendo ino: ⁵ Muonusia tomoi ukena iko ona puma djese. Toku ubhiona, puma djimo dji kua na paki: iletiana na makului ka manoli ma ikulu la nguvfa ma dji dhia. ⁶ Djimo dja kuwa á na bhoi: dyaa dji tuwa, dja oma, mungusa sibhaese na misia mya mikima. ⁷ Djimo dji kuwa á mabhiyo: mabhiyo ma tulia, ka mabhio ma dji sigila. ⁸ Djimo dja kuwa á misia ma mikima: dyaa dji tuwa, dja bhuta puma mingo miyo temoi. Ambusa na ivfia, Yesu avfia ta ikpe: kia undjo ú na matoyi ma iyoka á oki! ⁹ Bhatende bhese bhu miya iyo ivfie mbendo ino. ¹⁰ A bha kpetania: nu bha bhaowane taa nu djibhi sili ya bhukota bha Mbali; nge anga bhaamo, ibha souwe na mbendo, ambusa na iyena bha enitaabho ka bha okitabho, bha djibhi ta bho. ¹¹ Enai iyo ivfie mbendo ino: puma i livfia la Mbali. ¹² Bhaa bha á paki, ibhaa bha bha okie; ka mugu i idja, ka iesisia á mipumatima mabho livfia, na bhuwa bha taa bhane djelie ka bhane bhike. ¹³ Bhaa bha ikulu la mabhoi, i bhaa dya bhu okie livfia, bhali dunguwe na isea, nge bhandje abho, na milika, bha djelie na evfumbu, ka bha kúúe á wakati wa madyalibho. ¹⁴ Djiyo djibha kena, ka bha litikila lisigilane na mawazo, na bhugumia ka na kulu dja kisi, ka bhandje bhutu abho puma dja djioluwe; ¹⁵ Djiyo dji kuwa á misiya ma mikima, ibhaa, na iyoka livfia na mpumatima wa endjini ka na wan'kima, bhu litunga, ka ibhuta puma na ibhelia. ¹⁶ Mushe, ambusa na itshuanisia lobela, andje lu sigie ese na yakuku, áo ilu avfisia á itshi la ndalo; nge ú liavfisie á ikulu la yakuku, ambusa taa bhaa bha lumilie bha eni mpena. ¹⁷ Mungusa indjese na ya ialiya iyo indje enikianie ese, indjese na sili iyo indje gwaliese mbese idjibhi kiana ka iyenikiane. ¹⁸ Bhonai kotiyo namuna eyo na oka. mungusa bha múuwe ku undjo ú nao, nge anga undjo andjese nao bha mesisie kuna iyo ú kpalie taa ú nao. ¹⁹ Nyinya wese ka na bha wanya bha Yesu bhu idja iko mena; nge bhatoke abho ine bhamba, dyulu la dyombo; ²⁰ Bhan'sowa: ano ka na bhawazo bha á bhovfo, ka bha na kulu wa ine ena. ²¹ Nge á manyula: á dyie ka na bha wanyinya bhami, i bhaa bha okie livfia la Mbali, ka ili kambisia. ²² Bhusi ta bhumoi, Yesu udjamila á kuku wa dhene na bhatende bhese; abhaowa: tu etaia moli ú womo waa ekuko ya dhene ka bhukena. ²³ Dyaa bhubhi kena, Yesu ubha mulale aligaa wa kesu kwa ú vfundia á ekuko ya dhene, kuku wa dhene ú idjala malivfa ka bhubha kalibho na ilinda. ²⁴ Bham'bhamba ka bhan'susumuwa na ivfia: Bhwáná, Bhwáná, tuneko linda! Na isusumuwa, á vfanila movfuvfu ka na kesukuwa á ibha, ka bhuguwe bha ouwa. ²⁵ Ka abhsowa: idjelia lanu li niya? Bhaouwa na bhuwa ka bhu sangala, bhadji vfilia bhaa na bhaamo: uno ú kotiyo neni, undjo ú vfanilie movfuvfu ka na malivfa, ka bhwa mesimia? ²⁶ Bhusiká a etuko ya bha Garanasia, iye ebhonane na Galilai. ²⁷ Dya Yesu udhuluwa a misia ,ena apele nana mushe tomoi wa ndhei ya dhéne, udjo ubhia ulumbe na abhugi bwa bhagu. a evumbhu ta etaa sabhisakala tese ngombe, sabhese na igula ya ilala mbhese sugweye, nge sugweye yese ibhia ese kwa a madjako. ²⁸ Dyka umena Yesu avfama, akuwa amakulu mese, ka avfia na dyoi ta likali: idje yao yangami ka na angai, Yesu, mona wa Mbali wa ikulu la nguvfa? yane komola mbhese ini teta nyiya. ²⁹ Ngo Yesu asúsúlia mugu avfunduwa anga udjo mushe, udjo ubhiya sakpela evfumbhu taa eta; bhubhi ngwela usanga ke na minyololo ka na djuka amakulu, nge utinaka bhiyo usangianaka nao, ka ukonetinda na mugu asemele na mipena m'iseke. ³⁰ Yesu amiya: linya lai neni? legio, akpetanyi a djuto. ngo abhugi bwa bhagu bhubhiya salumila angese na mobhi. ³¹ Ka bhavfema dyoka Yesu mbhese idje ikena ikobhatuwa alichia. ³² Ibhia dya, asemele na n'tala, aliga wa ekumbu ya kuluvfe iyo ibhia etaá.ka na bagu bha n'komola yesu na taá abha lusia bhatangana asemele na kuluvfe djio. Yesu abha lusia bhatangana a kuluvfe. ³³ Bagu bhavfuduwa anga udjo mushe, bhatangana anga ba kuluvfe, ka ekumbhu ya kuluvfe ya tinika makulu makpangane ya kochubhia a ekuko ya dhene, ka yalinda. ³⁴ Bha bhubhi ngwela kuluvfe, bhéena a emeyo ikiyana, ku ibho ikena mavfi, ka ibho ikena na lokúkú lalivfia liya a ndhei ya dhene ka na asemele na bhitanda. ³⁵ Bhushe bhakena ikoena iyo ikiana. bhaena a m'bhongo wa Yesu, ka bhabgoka mushe udjo ubhia na bhangu, udjumane a makulu mese, usale ngombhe, ka na hari ya bhusumbha, ka bha bhidja ku mebhi ibhalula. ³⁶ Bhaá bheéna tuku yeta bhalondola tuku udjo ubhiya na bhangu ubhikishiana. ³⁷ Bhushe bhatopa bha ekita epopa ya bha galesenia bhuvfema Yesu aesi angabho, ngo bhubhiya bhidjala na bhuwa ta dheéne, ku yesu ikpata a kúkú, ka ku idje ikhidha. ³⁸ Mushe udjo ivfunduwa bhagu angese na mobhi avfema luúsa taa bhatikala nana. nge Yesu asaga, ka na ivfia: ³⁹ Kudha angai na yavfulu, ka londola etopa eyo mbhali anekilia. akena, ka na idjibishia na a ndei ya dhene etopa eyo Yesu ukilia idje. ⁴⁰ A ikpundha lese, Yesu abhigiana na étulumilo, ngo bhatopa bhu bhi isibha. ⁴¹ Ka enai, mushe tomoi, linya lese yailusi, udjo ubhiya n'ukota wa Sinaghogi. akuwa amakulu ka komola taa atangama asemele na yavfulu yese, ⁴² Mungusa ubhia na mona mwali kutomoi. iekika miaka tbu na mino tamivfili udjo ubhiyo sogwa. dya yesu ubhia sukenie, ubhia ukpwatane na ethulumilo. ⁴³ Ango, ibhia na mwali thomoi udjo ubhia na iethisia manyuika miaka ta bhúú na mimo tavfili, ka udjo ubhia sabhalishia bhima bhese bhitopa anga nui nganga, toomoi sudhane sewa inebhikishia. ⁴⁴ A m'bhambha bhina mbhusa, ka abhukula chiya ya ngombe ya Yesu. ku dyika ietisa la manyika itinyia anga mwali ndjo. ⁴⁵ Ka Yesu ivfia: neni udjo ibhukula? tuku bhatopa bhilambhula, petelo ka na bha ubhiya na bho: bwana, etulumilo ya nekúumbha ka yane kpatanishia, ka wavfia ta neni udjo ibhula? ⁴⁶ Nge Yesu ikpetanya: tomoi ibhukula, ngo yadjibha ta lokulu ta lumoi lese angani na mobhi. ⁴⁷ Mwali, adjena ta adjibhikana, idja sukpokpumuwe akuwa amakulu mese, ka alondola apele na bhushe tukú abhukula chia yese ya ngombe, ka toku ubhika dyoka. ⁴⁸ Yesu asowa: useke wami, ikolia laila nebhikisia; kena ta guwe. ⁴⁹ Tuku ubhiya sukunevfia kaama, yekaa anga ukota wa sinagogi mushe tomoi ivfia: useke wai ogwa; mbese inetetanyi bwaná. ⁵⁰ Nge Yesu, oka eyo, avfia na n'kota wa Sinagogi: sonduwai, dje lie ai ku idjilia, ka idje obhikishanu. ⁵¹ Dya ukiana ayavfulu, sondhese mushe itangana nana, ku petelo, yowani ka yako bho, ka na idje ka na inya mona. ⁵² Bhatopa bhubhilila ka na inelabhia dyulu la mona. ka Yesu ivfia: nulilia nu; adjese mogwe, nge utolo. ⁵³ Ka ku ibho inemosakia, bha djibhe ta ogwa. ⁵⁴ Nge adhunga obho, ka avfia na nyoi ta likali: mona, owe-tema. ⁵⁵ Ka ku upumatima wa mona ikpudha, ka dyokaa mona itema; ka Yesu abha susulia bhamwa bhima bhidyia. ⁵⁶ Bha bhutia bha useke bhasangala, ka bhadyedya muvfia anu na mushe toomoi na eyo yeta ano.