¹ Yesu idjala na lokulu la mbali, alugwa a yolodani, ka upumantima w'anluta asemele na mpena w'iseke. ² Dyowa ukena uchuchana na mugu évfumbu ya masi makomi tamanai. S'abhidhiaese masi maa matopa, ka ambusa na masi iyeta, apata égwa. ³ Mugu inensua: Ani owe umona Mbali basia mabhoi mano magwali mékati. ⁴ Yesu ine manyula: ikpaluana:mushe andeishiese isua la bhima bhidhia ngungu. ⁵ Mugu, antubhula, inevfanisia ta bhua makota matopa m'ikulu na misia; ⁶ Ka idjinensua: énouwe lokulu luno lutopi, ka molombo wa makota mano; mungusa bwindua ka emiyouwe anga mushe undjo yondue. ⁷ Aniwachuma malu apele nami, etopa igwalie yaye. ⁸ Yesu inemanyula: ikpaluana: omwabuduwe Bhwáná Mbali waye, kan'oweine nkambela idje kukalesi. ⁹ Mugu idjenenluta kamo a Yelusalemu, inekpatisia abhesanga ikulutikongó, ka idjinensua: ka ani omona Mbali, tumba mbani okokuwe dhichi, mungusa ikpaluana: ¹⁰ Otindikie bhantambia bhese dyululai, mungusa ikonengbela; ¹¹ Ka: bhanevfivfie ikulu la mabho, n'iondua taa okuluwayi inekotutale a libhoi. ¹² Yesu amanyula: kinensua: undjichuchue ta bua Bhwáná, Mbali aye. ¹³ Ambusa n'inechucha na paki, djitopa mugu idji kena dhomu naana iko olila évfumbu téemoi yéekima. ¹⁴ Yesu, idjala kamo na lokulu la mavfuvfa ma Mbali iiganaka na Galileya, kana mbino djese dja bhusumba djalagatana asemele na bhituko bhitopa bha mibhongo. ¹⁵ Ugulusia asemele na Sinagogi ka abibiana na mushe untopa. ¹⁶ Idji kena a Nazaleti, dya ukiká, ka, dyuto ulemanila, idjitangana asemele na Sinagogi bhusi bha sabato. idjitema mangasomi, ¹⁷ Ka ibho inemua kitabho wa nkanga Isaya. undjo bhubhingaka, akogboka ntungo uwo dya bhukpalua: ¹⁸ Lokulu la Bhwáná la mavfuvfa luikulami, mungusa w'itilia madha isua likodjibhisia mbino dja djikima anga bhaa bhukandakanda; w'itindika mungusa ikobhikisia bha bhubhunakala a upumantima, ¹⁹ Mungusa ikpola bhaa bhusangianaka bhaa bhatikilana, kana bhutiti bhéeni, n'ibhiganisia tafomu bhaa bhusangiana, bhakolondula édjo ya lokowa la Mbali. ²⁰ Ambusa idji bhingaka kitabho, inemua mushe wa mokambo, ka adjimana, bhatopa bhaa bhubhia asemele na Sinagogi madjo mabho mubhia manebhone kwidje. ²¹ Kamo idjitatika ibhasua: bhusi bhuno livfia la bhukpalua, éyo nalubwi oka, la kiyana. ²² Ka ibho bhatopa bhagwala bhasamboli bhese; bhubhidjukua na mavfia malokoa maa mubhivfundua angese na anyua, ka ibho ivfia: ombese mona wa Yozefu? ²³ Yesu abhasua sombi iyondua, dungai sokaka sino isua lami: Monganga, udjibhikisia owe mukulao; ka nu isua: kia djukuto, antungo wanganu, étopa éyo tooka nata wakia na Kapenaunu. ²⁴ Ngó, yagbukumia yanesua nuwe angili, indese na nkanga undjo udjelianie angese na ndei. ²⁵ Yanesua nuwe angili: Ibhia na bhugi bha bhali bhaa bhogusia bhalume a Izalaeli évfumbu ya Eliya, iyo ikulu na nguvfa lisigiana na bhidjo ta bhisaso kana mieli okingiondala(6) ka ibhia negwa ta dhene a kisi ntopa; ²⁶ Ka imbiese dyito Eliya bhantindikiabho anga mwali tomoi bhaa bhugusia bhalume, Ngô ibhiaese kwa anga mwali tomoi undjo wogusia mulume ubhia andeyi, Selefati, asemele na ékita ya Sidonia. ²⁷ Ibhia dyokuto na bhugia bhandutu dja kebhu kebhu a Izalaeli évfumbu ya Elisha, nkanga; ka n'évfumbu iyo tomoi wabho sakengulanese, ibhiese ku namani undjo ukengulana. ²⁸ Ibho bhatopa bhidjala na bhusungu asemele na Sinagogi, a évfumbu iyo bhooka bhima bhiyo. ²⁹ Ka, bhatema ineluba inevfundusia abovfo na ndei ka inenkenisia a pichipichi na ntala dyowa ikpela nandei yabho, mungusa bhankosia untuwe ichi. ³⁰ Ngô yesu, éta na bholigogo bhabho, idji kena. ³¹ Idji dulua a Kapenaunu, ndei ya dhene ya Galileya; ka idji gulusia, bhusi bwa sabato. ³² Bhadjukua na masua mase migulusia dyia ubhivfia na dyoi la kpingbi. ³³ Ugbokiana asemele na Sinagogi mushe tomoi ubhia na lokulu la bhagu bhamavfuvfa, ka uvfamaka na dyoi ta likali: ³⁴ Ah! indje unguso uwo tunanu nao Yesu Nazareti? widja ikotubhungusia. idje na taa owe mona wa kengo wa Mbali. ³⁵ Yesu abhavfamilia n'inensua: katana kavfundua anga mushe ono. kakumugu inenkulia a bholigogo bwa étulumilo, ka idjivfundua angese, sankiese ta bhubhi ta bhumoi. ³⁶ Ibho bhatopa bhondua, ka ibhiyanaka ibho ngungu: Indjé livfia lino? avfivfania na dyoi la kpingbi ka na lokulu anga mavfuvfa ka n'ibwiesa! ³⁷ Kana mbino djese djavfandjala bhigula bhitopa bha mibhongo. ³⁸ Ivfundua lese a Sinagogi, idjikena ayavfulu ya Simoni. Imyamota Simoni undja mwali oka mobhita kpingbi ikoeté, ka bhanvfema abhavfulia. ³⁹ Yesu abhamba kalibho nana k'anvfamila ndutu ka ndutu ivfundua. N'aevfumbu iyo manga tema ka n'ibhakambila. ⁴⁰ Ambusa n'idulua la dyuvfa idjakolo bhatopa bhaa bhubhia bhagwale na ndutu kuvfikuvfi bhabhadisia angese. Abhatulia obho anga mushe tomoi-moi ka abhabhikisia. ⁴¹ Na bhagu dyokuto ivfundua anga bhugi wa bushe n'ivfama ka n'ivfia: Owe mona Mbali. Ngé abhavfamakila ka s'ondese ibhatikila bhavfi,mungusa bhudjibha ta idjé klisto. ⁴² Apindi n'ivfundua la dyuvfa, idjivfundua kan'ikena a égula temoi iyo s'ibhiese na bhushe ghyombo ta limoi la bhushe bhanvfungakalaikiana angese dyia ubhia bhabfunga la bhansigila mungusa bhane kontikile bhaneko bhatike kamo. ⁴³ Ngé abhasua: Kiya dyokuto ékovfiye andei djimo dja dhene masua ma makima ma Mbali. Ngé munguso uwo yidjelia mono uwoo. ⁴⁴ Akenila n'igulusia abha Sinagoge bha Galileya.