¹ Evfáya yá mekáti ma mbèsé tivfó, ébhisiané Pasaka, ibhia tshekedhè. ² Bhadumangá bhá bhakoli ká na bhá kpalúwá bhúvfúngálá namúna ya inémúlúsia Yesu; ngó bhibhú ónduwa bhushé. ³ Angó, múgú ú lúmila anga Yúda, nubhisiané Esikaliote, úndjo ubhiya á esábho ya bhaa ta bhúu na bhámó ta bhávfili. ⁴ Ká Yúda úkena iko ókana na bhá dumanga bhá bhakoli ká na bhá dumanga bhá bhasindili, na namúna ya iné múlúsia. ⁵ Bhú sééa ká bhá ókáná na namúna ya inémuwá bhilinge. ⁶ Ambúsa na iyókana, úvfúngala namúna ya ékima ya inékulusia Yesu na mbèse étúlumilo idjibha. ⁷ Bhusi bhá mekati bhá mbèsé tivfo, bhúwo bhúpásá iné tshindja móna mokoko, ikiyana, ⁸ Ká Yesu abhá túmá Petelo na Yoani, na ibhá sówá kénáyi kotáyálisiayi nású Pasaka, na tàa tú dhiye. ⁹ Bhá n'kétaniya: ú ondúwe tuko tayalisia niya? ¹⁰ Abhá manyúlá: énayi, dyàa nutángánie á ndéyi ya dhéné, nú kumaniliye na mushé tomoyi muvfévfé ndiko ya malivfa; ú mikáyi á yavfúlú iyo ú tanganiye, ¹¹ Ká núsaúwe mukúlú wa yavfulu: mweli anésówá taa: égula yániya iyo mangá údhiye pasáka na bhatende bhése? ¹² Ká únévfanisiye núwe súgwééé témoyi ya dhéné ya ikúlú, iyo i na bhitopá: i dyàa nutayalisie Pasaka. ¹³ Bhúkéna, ká bhugbóká bhima tóku mangá úbhásowá; ká bhú tayálisiya Pasaka. ¹⁴ Dyàa yoúwá wakáti wá aó, á djumáná á méza ká na bhatendé idjé nabhó. ¹⁵ Abhá sowá: yaóndá sána idhiya Pasaka inó nànú, ápele na émi iénisiana mpúli; ¹⁶ Ngó, yané sowá núwe, indje li dhiye tabhi ámi, mupáka dyikàa i àkisiani bhiyo á bhukota bhá Mbali. ¹⁷ Ká, á geya lúngú ta lúmoyi ká á kpudhusiá djokówa angá Mbali, ávfiya: geiyai lúngú lúno, ká vfakánakáyi núwe ngúngú; ¹⁸ Múngusá, yanésowa núwe, indje nyúwe tabhi ámi éngoká yá puma djá vinyo, mupáka wakáti úwo bhukota bhá Mbali bhú idji bhiyo. ¹⁹ Ká amó úgéiya mokáti; ká, kiisha ikpudhusia djokówa angá Mbali, á úbhúná, ká abhá owá, na ivfiya: ino i mobhi wámi, úwo ú owáná dyúlú lánú; kakiayi tanó dyúlú lá ini djúwaka. ²⁰ Ágeiyá dyókúto lúngú, ambúsa na idhiya, ká abhá owá, na ivfia: lúngú lúno lú lá iyókana lá basi na mányiká mámi, màa má idiye dyúlú lánú. ²¹ Na dyito énáyi, obhó wá úndjo windulúsie ú mudjumané námi á meza á mókumino. ²² Móna wá mushé á kéná. iyekána na tóku i lakáná. Ngé ikúkú angá mushé úndjo ú mulúsia! ²³ Ká bhá ándjá i iyanaka ibhó ngúmgú neni á káti yabhó úkiiye iyo. ²⁴ Nkakanyi wa andja ituwáná ángá bhatende: Neni á kati yabhó upasiye igwálá n'dumángá? ²⁵ Yesu abhá sowá: bhakóta bhá bhikita bhabhá tabhaliye, ká bhàa bhabhá tabhaliye bhá bhisianiye bhá kiyá bhudúmbá. ²⁶ Si gwalièsé namuna témoyi angánú. Ngé kia úndjo igwali tóku n'dumánga ángánú agwali tóku n'dadú, úndjo ú tabhaliye agwali tóku úndjo ú kambiliye bhá amó. ²⁷ Ngo neni úndjo ú n'dumánga, úndjo ú á méza, áo úndjo úbhá kambiliye? ká émi, n'a tóku, i á bholigogo bhánú tóku úndjo únekambiliye núwe; ²⁸ Núwe, nú bháa bhú bhéliyá námi á mipúli námi; ²⁹ Ina dyito yá avfisiya bhukotá bhá ikúlú lá ngúvfá dyúlú lánú, tóku Tita ú avfisiyá dyúlú lámi, ³⁰ Ambúsa tàa nú dhiye ká núnyúwe á méza mami má bhukotá, ká tàa núgwali bhá djúmané á bhá agimá bhá bhukotá, mungusá wá iúkúmúwa kabhila ta bhúú na djimó ta épili dja Isalaeli. ³¹ Bhwáná avfia: Simoni, Simon, múgú ú ondúwe iné péta núwe tóku ngáno. ³² Ngé ivféma Mbali dyúlú láyi, mungusá idjéliya láyi liné kuwé; ká owé dyàa ú idji káamo iyo ubhá kamisiyá bhá wanó á idjéliya. ³³ Bhwáná, Pétole ánsowá, étayali ikéna nàyi, á mudyalóló ká á ligwa. ³⁵ Bha sua kamo: Dyaa ya ne kenisia mono nue mbese echedhe, mbese mokúlú ka mbese to bhókúbhókú, indje-ema iyo ya ne kandá nué? bhaa kpetania mbese ema. ³⁶ Ka a bha sowa: ketetino, ambusa, undjo una echedhe ageya ka undjo una mokulu ageya dyukuto, ka undjo andjese na asobho akulusia lokimba lese ka akulu asobho. ³⁷ Ngo, yanesuanue, yeekpie taa livfia liyo likpaluna la kikisiana angami: Ubhandana toku mushewa ebhelá. ka etopa eyo etoti inibgoka echekedhe nükiana. ³⁸ Bha sua: Bwana, ena bhasobho taa bhavfili. ka abhasua: iyo yaaka. ³⁹ Ambusa nivfundua, a kena, tuku ulemanila, aa n'tala wa Olivie,bhatende bheese bhamika. ⁴⁰ Dyaa ukia na a egula eyo, abha sowa: Vfemai, taa nune kuwe a bhubhi. ⁴¹ Kaa abhamba taa dhomu nabho egula iyo lombuo lundji kiani ese, ka achúmámálú, avfémá, ⁴² avfia: Tita, ani wonda iesisia nami lúngú luno! ani ya gwala, bhondusia bhuami sikiaese, nge ani yagwala bhuai ekiana. ⁴³ Ngo n'tambiya Mbali tomoi aa djanila a ikulu la nguvfa, dyulu kine bgagisia. ⁴⁴ Dyaa owa taa onekolima, avfema ni tinaka, ka etawe yese yowa toku ma toii ma manyika, mubhi popa a misia. ⁴⁵ Ambusa ni vfema, atema, ka akena anga bhatende, a bha bgoka ibho bha lala na bhúkúkú, ⁴⁶ Ka abha suwa: indje nu lali eto? temai ka nu vfemi, na taa nune kuwe a bhubhi. ⁴⁷ Tuku ubhia suku nevfia, éná, etulumilo ya bhuse ya kiana; ka undjo ubhisiana taa Yuda, tomoi wa taa bhuuna bhamo taa bhavfili, ubhi luvfa apele na bho. a m'bhamba Yesu, ine bhusua. ⁴⁸ Ka Yesu asuwa: Yuda dyulu li busua liyo wowuwe mona wa mushe! ⁴⁹ Bhaa bhubhia na Yesu, bheena iyo iidjie, bha vfia: Bwáná, tu bha ovfula asobho? ⁵⁰ Ka tomoi wa bho aa movfula n'kobhé tomoi wa n'kota wa bhakoli, ka a n'tina otoi wa ilume. ⁵¹ Nge Yesu, atatika livfia, avfia: tikila, tema! ka, adunga otoi wa undjo mushe, idje ine bhikisia. ⁵² Yesu avfia kamo anga bhadúmángá bha bhakoli, anga bhakota bhambgelia bha yavfulu ya Mbali, ka na bhagágulú, bhaa bhu idja na liyá nana: nue nidja, toku emi mene aaga bhushe bhima, naa bha asobho ka mambáká. ⁵³ Ya bha nanu masi ku matopa asemele na yavfulu ya Mbali, ka mabho manu midungese emi. nge dyano yowa evfumbu yanu, kana lokulu la livfue. ⁵⁴ Ambusa nine dunga Yesu, ibho inedisia, ka bha kenisia asemele na yavfulu ya n'dumanga wa bhakoli . Petelo ubhia subhoni taa dhomu. ⁵⁵ Bha melia isala aa mbanda, ka bhádjúmáná. Petelo adjúma ná nabho. ⁵⁶ Mushe tomoi wa mokambo wa mwali, améná un'djumane iisala, aa m'bhóná Petelo, ka nivfia: mushe uno ubha niidje dyukuto. ⁵⁷ Nge alambula nivfia: mwali uno, indje n'djibhiami. ⁵⁸ Mbusa tabua, womo, aa méná, avfia: owe dyukuto owe mushe wabho. ka Petelo ivfia: mushe uno, indjami wa bho. ⁵⁹ Iyekeka ambusa na evfumbu teemoi, womo aa n'kakamia, nivfia: angili mushe uno ubha dyukuto náná, ngo idje mu Galilaya. ⁶⁰ Petelo akpetania: mushe uno, indjidjibhiami iyo ovfie. dyokaa ubhivfia kamo eto, n'eki ikokolia. ⁶¹ Bwáná, anebasia, aa m'bhoná Petelo. ka Petelo adjua livfia lio bwáná un'sua: apele na eki ikokolia bhusi ku bhúno, wilambuluwe mingo tamisaso. ⁶² Kaa avfundua, aalilá na bhoobú. ⁶³ Bhushe bhaa ndunga Yesu bhaa mosakia idje, ka bha m'bhitila. ⁶⁴ Bhaa n'siga bhosio, ka bhamiakia, nivfia: kpola neni undjo anovfula. ⁶⁵ Ka bha dyongela teegi ka nine sekisia. ⁶⁶ Dyaa bhusi bhugia, etulumilo ya bhagagulu bha bhushe, bhadumanga méné bha bhakoli ka na bhakpalua, bha kumanila, ka bhakenisila Yesu asemele na Sanedelina ya bho. ⁶⁷ Bhavfia: ani owe Kilisito, utu sowa. Yesu a bha kpetenia; ani ya ne sowa nuwe, nu ndji djelie anu. ⁶⁸ Ka ani ya niya, undji kpetaniaye. ⁶⁹ Dyikaa mona wa mushe agwalie un'djumane a ilume laa lokúlú la Mbali. ⁷⁰ Bhatopa bhavfia: owe undjo oo mona wa Mbali? ka abha kpetania: na vfia leli, emi djokuno. ⁷¹ Ngo bha vfia: tukaamo nakulu wa bhusamboli? tooka djuwe bhakulu bhao na anyuwa wese kubhanene.