¹ Yesu, na itangana á Yeliko, ú kaliya ndei ya dhene. ² Ka enai, mushe tomoi n'gumiya, nubhisiane Zakayo, n'kota wa bha Pibilika, uvfungala á meni undjo ubha Yesu; ³ Nge sabha tokaese, dyulu la dyombo. Mungusa ubhia ta dyele. ⁴ Ukena mavfi apele, ka ikpata á eti mungusa á meni, mungusa ibha taa ú etiye dyaa. ⁵ Dyaa Yesu ukiana á egula iyo, á tubhula madjo ka ansowa: Zakayo, duluwa mangbalangba: mungusa i ekpie taa egwali bhusibhuno á yavfulu yai. ⁶ Zakayo á duluwa mangbalangba, ka an'bhiga na iseya. ⁷ Na ieba iyo, bhatopa bha ngungumaka na ivfia: ukena iko gwala anga mushe wa djambi. ⁸ Nge Zakayo, na itema apele na Bhwáná, un'sowa: ena, Bhwáná, youwe anga bhabhoka esulu ya bhugumia bhami, ka ani ikiya ema ya ebhibhi anga mushe, emiganisie mingo ta minai. ⁹ Yesu ansowa: ibhika la tangana bhuno bhusi á yavfulu ino, mungusa uno ú dyokuto mona wa Abhalayama. ¹⁰ Mungusa mona wa mushe ú idja ikovfungala ka na ibhikisia bhaa bhubha bha bhole. ¹¹ Bhubha oka mavfia maa, ka Yesu á gbukumiya mbendo temoi, mungusa ubha tshekedhe na Yelusalema, ka bhu kpalia taa dyokaa bhukota bha Mbali bhu djanilie. ¹² Uvfia kotiyo: mushe tomoi wa muesimiane ukena á ekita ya dhomu dyulu la ikosala bhukota, ka ikpudha. ¹³ Ubhisia ta bhúú bhaa bha bhakambiya bhese, abha owa bhilinge ta bhúú, ka bhasowa: kiai nao bhu tshulusi mpaka dyaa iko idji bhi iyo. ¹⁴ Nge bhushe bhese bhun'bhiliya ka bhutuma tomoi wabho angese inesowa: tundje onduwe asu taa mushe uno á ta bhala á ikulu lasu. ¹⁵ Dyaa ú kpudha, ambusa na isala bhukota, á bhisiya angese bha kambia bhaa ubha owa bhilinge, ambusa taa adjibhi namuna ya niya kila mushe ú tshuluza. ¹⁶ Wapikilie ú idja ka uvfia: Bhwáná, elinge yai ya owa faidha ya bhilinge ta bhúú. ¹⁷ Un'sowa: i ikima, n'kambia wa n'kima: mungusa ubha mukame á bhima ta bhuwa, wa ouwa Guvfelenele wa ndei ta bhúú dja dhene. ¹⁸ Wana vfili ú idja ka uvfia: Bhwáná, elinge ya owa faidha ya bhilinge ta efu. ¹⁹ Ansowa: owe dyokuto, gwala Guvfelenele dja ndei ta efu dja dhene. ²⁰ Womo wi idja, ka uvfia: Bhwáná, ena elinge yai, iyo i ngbela á edili ya ngombe; ²¹ Ngo ebha na bhuwa bhai, mungusa owe ú mushe undjo ú n'kali: ogei yakie iyo su tike ai, ka okolakoliye iyo su one ai. ²² Ansowa: yane okumuwa á mavfia mai, n'kambia wa m'bhibhi: udjibha taa emi mushe wa n'kale, undjo úgeiyakie iyo satike ese, ka ukolakoliye iyo sa one ese; ²³ Mungusa wa endje kotiyo su avfisieayi elinge yami á yavfulu ya i avfisiaka bhilinge, ambusa taa á ikpudha lami ibhi geya na faidha? ²⁴ Kaa avfia na bhaa bhuba dyaa: umagai elinge iyo, ka ú muwai undjo ú na bhiline ta bhúú. ²⁵ Bhunsowa: Bhwáná, ú na bhiline ta bhúú. ²⁶ Yanesowa nuwe; bha muuwe undjo ú nao, nge anga undjo andjese nao bha magiye imbi iyo ú nao. ²⁷ Nge, disia i dyano bha akodhu bhami, bhaa bhaonde abho ta etabhala á ikulu labho, ka ubha olai apele nami. ²⁸ Ambusa na ivfia dyito, Yesu á luvfa apele na dyombo, na ikena á Yelusalema. ²⁹ Dyaa bhu bhamba Bhetefedya ka Bheteniya, ikenila á n'tala mubhisiane n'tala wa Zaituni, Yesu utuma bhatende bhese tabha vfili, ³⁰ Na ivfia: kenai á iyo i apele, dyaa mu lumilie, nu gbokie mona wa falasa n'sangile, anga undjo mushe ta omoi angese mune kpatile: un'sangulai ka ú disiai. ³¹ Ani mushe á neiya nuwe: mungusa wa endje nan'sangula? nu n'kpetaniye taa: Bhwáná ú na kului wa ese. ³² Bhaa bhubha bhatumane bhukena, ka bhu gboka bhima toku Yesu ubhasowa. ³³ Toku bhubhia bhan'sangulu mona wa falasa bhakulu bhaao bhabhasowa: mungusa wa endje nu sanguluwe mona wa falasa? ³⁴ Bhkpetania: Bhwáná ú nakulu wese. ³⁵ Ka bhan'disila Yesu mona wa falasa undjo bhu kulia ngombe djabho, ka Yesu an'kpatila. ³⁶ Dyaa bhubhi kena, bhushe bhu aliliyangombe djabho á paki. ³⁷ Ka dyaa bhubhiya tshekedhe na Yelusalema, á iduluwa la n'tala wa mizaituni, dyombo la bhatende, bhubhi ya na iséea, bham'biba Mbali na dyoi ta ikpe dyulu la bhikako bhiyo bhu ena. ³⁸ Agwali mu bhalikie n'kota undjo ú idjie na linya la Bhwáná! bhuguwe á ikulu la nguvfa, ka obibo á bhigula bha ikulu! ³⁹ Bha Falisayo bhaamo, a semele na dyombo, bhun'sawa Yesu: Bhwáná, si kisi ya bhatende bhai. ⁴⁰ Ka akpetania: yanesowa nuwe ani mbi bhakatana mabhoyi ma dyunuwe! ⁴¹ Toku ú bhamba á ndei ya dhene, Yesu, na ena, ulila dyulu labho, ka avfia: ⁴² Ani owe dyokuto, ibhiya á bhusi bhuwo ú owana, ugwali mu djibhe bhima bhiyo bhi bhia á bhu guwe bhai! Nge ketetino bhi ouwa bhi kobhane á madjo mai. ⁴³ Igwalie á masi maa i idji angai, dyaa bha akodhu bhai bhane kulungilie toku bhokako, bhane lingiliye, ka bhane sigilie paki djitopa: ⁴⁴ Bhane kosiye itshi ka na bhana bhayi á semele na yi, ka bhandje tiki abho angai libhoi á ikulu la libhoi, mungusa su djibheai evfumbu iyo ubhia nu nyunyane. ⁴⁵ Alangana á yavfulu ya Mbali, ka á andja i saga bhaa bhubhi kulusakia iyo, ⁴⁶ Na ibha sowa: ibhia ekpaluane: yavfulu yami, igwalie yavfulu ya ivfema Mbali. Nge nuwe, na ibhasia egula ya bha aga. ⁴⁷ Ubhi gulusia masi ku matopa á yavfulu ya Mbali. Ka bhadumanga bha bhakoli, bha kpaluwa, ka bhadumanga bha bhushe bhuvfungala ta bha mulusia; ⁴⁸ Nge, bha djibhe abho namuna ya niya ikiya, mungusa bhushe bhatopa bhubhi moka na kulu.