¹ Bhapibhilika bhatopa ka na bhushe maisha mabhibhi bhubhamba Yesu iko moka. ² Ka Bhafalisayo ka bhakpaluwa bhangu ngumaka, ni ivfia: Mushe uno abhinga bhushe bha maisha mabhibhi, ka adyiya na bho. ³ Nge abhasuwa mbendo ino: ⁴ Neni mushe wanu, ani ona mekoko miya temoi ka abhoi shia tomoi, atikila bhamo makomo tisa na tisa asemele na upina wi iseke dyulu likovfngala udjo abhala, dyika akome ni iyo? ⁵ Dya manga amena iyo, avfevfa amavfeka mese ni iseya. ⁶ Ka, nikpudja ayavfulu, abhishia bhambenyi ka bhadjelani bhese, ka abha suwa: seyai-nami, ngo yena mokókó wami uwa wabhola. ⁷ Dyukuto, yanesuwa nuwe, egwali niseya taa dhene ikulu la nguvfa dyulu mushe tomoi wa zambi onebashuye, koliko na bha bhakiya makomo tisa dje edjini mbese kulu ya inebashia. ⁸ Ao mwali neni, ani ona misanga taa bhúú, ka tomoi obholi, ka asiki ichwanisia lobela ni yoluluwa sugweye, ka nivfungala na uvfevfene, ku idje sena? ⁹ Dya manga ena iyo, abhishia bhambenyi bhese ka na bha djelane bhese, ka avfia: seyai nani, ngo yena usanga wami uwo wabhola kolo. ¹⁰ Dyukuto, yanesuwa nuwe, eseiye dyukutu bhatambia bha Mbali dyulu la mushe wazambi tomoi inebashia. ¹¹ Avfia kamo: mushe tomoi abha na bhanongo ta bhavfili. ¹² Idja musu asuwa idjidje: tita ami, induwa isulu iyangami ya bhima iyo yinduwe faida. ka idjidje avfakana nana bhima. ¹³ Kisha masi tabhuwa, mona udja unongo idjamusu, ageya bhima bhitopa, akena a etuko ya dhomu, dya uko mala bhima bhitopa na bhali bhamajanyi. ¹⁴ Dya bhitopa bhimibila iyo, aliga weegwa alumila a etoko eyo, ka adja iyowa nakulu ya bhima. ¹⁵ Ake na iko kambila bushe bha etuko iyo, ka bhatuma a mabhulu iko mbgela kuluvfe. ¹⁶ Onda iyoguta na bhivfavfa bhia masongu bhiyo kuluvfe djibhi dhiya; nge mushe winemiwa sabhese. ¹⁷ Dya mango ukpudha kubha nene, anevfilia: bhushe bhamokambo imbani bhaa bha Tita bhokunedhiya ka nikochuwa, ka emi, dyano soguwe naegwa! ¹⁸ Etemiye, ekeniye anga Tita, ka esouwe: Tita ami, ya bhitaka a ikulu la nguvfa ka na angai, ¹⁹ Indi bhongi taami taa ibhishina taa mona ai; ikambishia toku bhushe bhai bhamokambo. ²⁰ Ka atema, ka akena amugwa búkúkú, idjidje akena mavfi an'kpanganyia ka na inebhiga. ²¹ Mona asuwa: Tita, yakiya bhubhi ikulu la nguvfa ka na angai, idhi bhangi taami ebhishiana taa monai. ²² Nge idjidje ivfia anga bhushe bhese bhamokambo: dishiai ketetino kadjo ya basi, ka usalishiai, osaliai lopete a mwandakala, ka na tobhokúbhokú a makúlú. ²³ Dishiai mona wa ngombe udjo usoguwe, ka umula. tudhia ka tuseai; ²⁴ Ngo monami udjo numeni uno abha idje sogwa, ka abhika, abha sabhola, ka mange oneka na. Ka bhataka iseya. ²⁵ Dya mona idja mwanga suku amabhulu. dya widja ka niyowa chekedhee na yavfulu, oka bhabhiba ka djumbo. ²⁶ Abhishia mushe tomoi wa mokambo, ka amiya iyo yeta. ²⁷ Mushe wa mokambo udjo inesuwa: wano aiganaka, ka tuku ai ganaka na mobhi taa ukima, ato amulia mona wa ngombe wa usoguwe. ²⁸ Ouwa na bhusungu, ka soônde se itangana evfaya. idjidje avfunduwa, ka akomola atangana. ²⁹ Nge akpetanyia: idjidje : ena, ina bhidjo tabhingi bhiyo yanekambila, mbese ituka shelia djai, ka udji musai muni nduwe ta bhuwa mona wa ngombe ta eseya mbhani na bhambhenyi bhami. ³⁰ Ka dya monai akiana, udjo adhiya bhima bhiai na bhushe kititi, dyulu lese wamuli ya mona wa ngombe wa usoguwe! ³¹ Monami, idjidje asuwa, owe vfedjo omasi kumatopa idyana, ka bhitopa bhiyo enao bhivfele bhiai; ³² Nge yabha ekima obhini ka ni iseya, dyulu dja wano udjo omeni úno abha sogwa ka oowa toku manga omuwa, dyulu dya manga sabhola ka mange a enikiana.