1 Ambusa na djha, Bwaná imula ku kaamo batende makomi saba, ka idja ibhatuma bhushe tabhavfili bhavfili apele nana andei ya dhene bhitoî ka na bhigula bhitopi mio idje kuukalesi utota mo ikena. 2 Idje ibhasakua nata bhole idhene, bhushe bhi kamba mokambo bha ta buwa, unvfemai n'kula bhole ibhatuma bhushe bha makambo abhole bhuese. 3 Kenai; enai, ya tumatoku bha mokoko asemele na bha poma. 4 Mbese ivfevfa ema, mbese etihedhe, mbese elato, ka mbese inensalimiya mushe a paki. 5 Abha yavfulu iyo nulumilie, vfiai mbani, kia guwe iguali a yavfulu iyo! 6 Ka animona tomoi indjaguwe udjha, bhuguwe bhuanu bhuguali angese, ani indese djhito, ikpudhu anganu. 7 Gwalai a yavfulu iyo, dhiai ka nyuai bhima bhima bhio bhanoou nuwe, mungusa mushe ya mokambo una bhukome bhuinenlipa, mbese nuwe ike a yavfulu na yavfulu. 8 Abha ndei bha dhene mio na lumili, ka ani egula iyo bha ne dhiai bhima bhio bhabhu. 9 bikisiai bhushe bha ndutu bha nu bheni; djha, ka vfia na bho nata bhukota bhua Mbali ya kiana anganu. 10 A bha ndei ya dhene miyo nululie, ka egula iyo bhasiki ibha bhiga kenai a bhapakiabho ka ivfia nata. 11 To vfula bhubhi bha misia bhua ndei yanu ya dhene miyo ibha a makulu masu; djibhai nata a evfumbu ino bhukota bhua Mbali ya bhamba leli. 12 Yane vfilia nue a bhusi bhuo Sodome inenkamania ta bhua nge nana iyo ndei ya dhene iyo. 13 Buli angai, chorazi buli angai, betsaida! mungusa abhugi ya bhishisho mio ikiana mo angai ikiana mo djhokuto a Tyro ka na Sidona, abhungbhe ubhia mo nitukulia na Mbali, ni dunga etshedhe ka na mokabha. 14 Mungusa aao, bhusi bwa ukumu, Tyro na Sidona ba bhakii ni bakamanyia ta buwa nge nowe. 15 Ka noowe; Kapernaumu, in'djo bhun'kpatisia mo ikulu la nguvfa, bhanedulusi paka ku abhudjako. 16 Un'djo ubhooki indoka, un'djo ubhasiki isika , ka un'djo wi siki ansika n'djo witumà. 17 Bhushe makomi sabha ibhoikpudha ni sea, ni vfia: Bwaná, bhagu djhokuto ikpokpuma apelenasu mungussssa linya lai. 18 Yesu ibhavfilia: yimena shetani ikua ikulu la nguvfa toku amelimeli. 19 Ena, ya bhoowa lokulu li luvfa ikulu la nyili ka na bha n'kutu ka na ikulu litopi la ka indese na ema iyo ibhakii bushi. 20 Mungusaoo mbese nuwe isea tokubhagu bhukpokpumano apele nanu seayi mene nata manya manu ikpaluana ikulu la nguvfa. 21 E vfumbu iyo, Yesu ikua ni sea na Upuma tima wa kengo ka idje ivfia : molombo uangai, tita, Bwaná wi ikulu languvfa ka na kisi na ma walia mo anga bha n'tumba ka naya djelia, tita, ya nowa molombo mungusa wonda igwalidjito. 22 Bhima bhitopi bhindua mono anga tita, ka indese na mushe n'djo udjibhi neni n'djo u mona, ani sibhia Tita neni n'djo u Tita, ani sibhie mona, ka na mushe n'djo mona wondu inendjibhisia. 23 Idjenebasia anga batende, idje ibhavfilia: seai madjo meni mio nueni! 24 Yanesakua nuwe bha kanga bhogi ka nabhakota bhonda mo iena miyo nuwe nuenie, nge bhene abho, ka nioka minguso nuwe nooka, nge bhookea bho. 25 Yoanea mona bhuutumba tomoi atema idje inen'sakua mungusa inentetania: mweli ekititani mungusa idungu ibika la masiku matopi? 26 Yesu abhakpetia ka abhasakua asemele na sheria ya kpalua na titani? wasona titani? 27 Idje ikpetia ka idje ivfia: umunda Bwaná Mbali wai ampumaaitopi na lokulu lai lutopi, nidjua lai lutopi; ka inemunda toku owe kukalesi. 28 Idje nen'sakua; wakpetia ekima, kia djhokuto ka owe obhikie. 29 Ka idjetota idji wanyisia toku Mushe wangili, idje inen'sakua Yesu: mange nami uneni? 30 Ka Yesu ikpetia, ka ivfia: Mushe tomoi udulua iyesa a Yerusalemu kikena a Yeriko; idje ikokua abholigogo bha mabho bha bhaola bhushe, ibho inen'bia ngombe djese, ibho inen'bhudja, ibho ikena yabho, ibho inen'tika tchekedhe ni yugwa. 31 Ivfundua mwalimo tomoï idjidulua a iyo paki, idjenemena Mushe n'ndjo idje ikpangba ka iyeta. 32 Ku kaamo djhokuto Mulawi ukiana a egula iyo, idje inem'bona, nge idje ieta na ikpangbo ka idje kena. 33 Nge musamaria tomoï ukena mono alokendo, idje ikiana egulaiyo Mushe ndjo ubha mono; idje ikiana inem'menila bhukuku. 34 Idje bhamba apele nana, idje isangaka mikuko meesè, antilia mada na bhuthi, ka idje inemkpatisia ikulu djha tumbu ese, ka inen'kenisia a yavfulu ya bha keni, ka idje inensibhaka. 35 Kapuma n'ndjomu idje ivfundua ka ivfindia dinari tipili Mukua yavfulu, ka idje ivfia: n'sibhaka tekima; nabhili nge bhio bhitopi ovfundusi amungusa ese, enevfindi na evfumbu iyo yiganaki. 36 Wakpia neni wa bhaa ta bhasaso ubhia mange nana un'ndjo ukua abholigogo bha mabho ma bhaola bhushe? 37 Idje ivfia un'ndjo ummenila mono bhuku, ka Yesu inesakua; kena yai, kaki djhokuto. 38 Toku Yesu ubhamo apaki na tende bhese; idji tangana andei ya bua temoi, mwali tomoi linya lese libhia mo Malata, idje inem'bhiga ayvfulu ese. 39 Ubhia mo na n'sali ese linya lese Malia idja idjumana apele na makulu ma Yesu, idje iyoka minguso mese. 40 Nge Malata idjigbegha na mekambo migi, idje angese ka ivfia: Bwaná, miyo mandine kiai tema tomoi toku n'sali yami witikilia ikamba mekambo emikulesi, un'sakua mbani na ta ivfulia. 41 Bwaná Yesu inemkpeki sia: Malata, Malata, indje ogbegbi ka ni bhunyia m'puma n'tima ikulu la minguso migi; 42 Nge ema tomoi ya bhukome; Malia aminula epitchi iyo yekima, iyo indiesi bhiese ange.