¹ Ya avfisia apele nanu, Foibhe, n'sali wasu, undjo ú n'kambia a kanisa ya Kenkulea, ² Ambusa taa num'bhigi anga Bhwáná bhwasu toku nu bhigaki mono bhaa bha kengo, ka taa nu muwa bhitopa bhio ugwali nao na kúlú anganu, ngo ú owa sadhaka anga bhagi ka angami mukulu aaô. ³ Úbha bhigai Pilisika ka na Ikila, bhangenami bha mokambo anga Yesu Kilisito, ⁴ Bhaa bhaowa mitue mabho dyulu la inibhikisia; indjese emi mukulu aao undjo ubhaiganisie lokowa, i kaamo makanisa matopa ma bha pagano. ⁵ Salimiai dyokuto kanisa eyo asemele na ya vfulu yabho. Un'salimiai Epainata, muondhusia wami, undjo ubha wa pikilie á Azia dyulu la Yesu. ⁶ Ún'salimiai Malia, undjo úéna mpuli ta mugi dyulu lanú. ⁷ Ún'salimiai Andoloniko ka na Yunia, bha wanyinya bhami ka bhangenami bha mudyalolo, bhaa bhudjibhikiana anga bhatende, ka bhaa bhubhia anga Kilisito apele nami. ⁸ Un'salimiai Ampuliato, muondhusia wami anga Bhwáná, ⁹ Ún'salimiai Ulubhano, mangenami wa mokambo anga Kilisito ka na Sitaki muondusia wami. ¹⁰ Ún'salimiai Afele, undjo ú n'djeliane anga Kilisito. Salimiai bhaa bha yavfulu ya Alisitobulo. ¹¹ Salimiai Helodhio, monima, salimiai bhaa bha yavfulu ya Nalikiso, bhaa bha anga Bhwáná. ¹² Salimiai Tilifena ka Tilifosa, bhaa bhu kamba egi dyulu la Bhwáná. ¹³ Slimiai Lufo, undjo ú minulana na Bhwáná, ka na inyaese, undjo ú dyokuto wami. ¹⁴ Salimiai Asinkilito, Fulego, Helme, Patoloba, Helema, ka na bha wanyinya bhaa u nabho. ¹⁵ Salimiai Filologo na Yulia, Neleo na n'sali wese ka Olompa, ka na bhaa bhakengo bhaa nabho. ¹⁶ Salimianai nuwe na bhaamo na ibhusua la kengo. Kanisa djitopa dja Kilisito yane salimia nuwe. ¹⁷ Yane komola nuwe, bhamonima, na idji ngbela na bhaa bha kü ta nuvfakana ka na makia, na bhubhi bhi ugulusia lio nu udha. Gwalai dhomi nabho. ¹⁸ Ngo bhushe toku bhaa bhandjekambili ta abhó Kilisito Bhwáná bhasu, nge mala mabho kubhanene; na mavfia ma lèlè ka na ma ikomba, bha kóosie mipumatima ma bhaa bhandje abho na bhubhi. ¹⁹ Anganu, esima lanu li lidjibhikiané na bhatopa; ya séea kotiyo dyulu lanu, ka ya ónda taa nugwali na bhutumba na iyo ébhoni ékima ka túú naiyo ibhoni bhubhi. ²⁰ Mbali wa bhugue, un'gbotanie ketetino mugu á makulu manu. Kia lokowa la Bhwáná bhwasu Yesu Kilisito ligwali nanu! ²¹ Timoteo, mulungo wami wa mokambo, yanesalimia nuwe, ka na Lukio, Yasona ka na Sosipateli, bha monima. ²² Yanesalimia nuwe anga Bhwáná, émi Telitiyo, undjo úkpalua malubha maa. ²³ Gayo, n'keni wami ka wa kanisa etopa, anesalimia. Elasito, angbela lito wa ndei ya dhene anesalimia na wanyinya Kalitusi. ²⁴ Kia lokowa la Bhwáná bhwasu Yesu Kilisito lugwali nanu bhatopa! Inno! ²⁵ Anga undjo upasie inetemia nuwe iyekana na livfia lami lio la Mbali ka na ikokolia la Yesu Kilisito, iyekana na iyenisiana la sili ya ekobhe bhidjo na bhidjo, ²⁶ Nge evfanisiane ketetino, na makpalua ma bha kanga, na ibhona selia ya Mbali wamasi matopa, ka na idjibhisia bhituko bhitopa, ambusa taa bha esima á idjelia, ²⁷ Anga Mbali, n'tumba ku bhanene, agwali na obibo bhidjo na bhidjo, na Yesu Kilisito! Inno!