¹ Dyuwe bhaa tu na lokulu, tu wezie ibhelia bhaa bha na bholelu bha bhaa bhandje abho na lokulu ka na mbese djue isea djuwe bhakulu bhaao. ² Kia kila mushe wasu an'fulaisia undjomo na iyo i ekima dyulu la ikpelia. ³ Ngo Kilisito sa djifulaisiese idje mukulu aao, nge toku ikpaluana: maseki na bhaa bhane sekisie ma ikulia emi. ⁴ Ngo, bhitopa bhio bhibhia bhikpaluana apele ibha dyulu la itugulusia, ambusa taa na ibhelia, ka na bhu kuku iyo makpalua maowa, ikpalia lio tubhia mono nao. ⁵ Kia Mbali wa ibhelia ka na wa bhukuku anoowa nuwe kulu tomoi bhaa na bhaamo anga Yesu Kilisito, ⁶ Ambusa taa nuwe bhatopa, na anyuwa tomoi, nu bibi Mbali ka Tita Bhwáná bhasu Yesu Kilisito. ⁷ Kotiyo bhaa na ibhamo, toku bhiganai Kilisito utu bhiga dyulu la obibo la Mbali. ⁸ Yavfia, na eyo, kilisito ubhia n'kambia wa bhagbega, dyulu la ivfesia bhu angili bhwa Mbali na i akisia malaki maa mu kiana anga bhaidje bhanu, ⁹ Na dyokuto bhapagano bha m'biba Mbali na isowa la bhukuku bhwese iyejana na iyo ikpaluana ina eyo enebibie á bhikita, ka enebhelie djumbo na obibo la linya lai. I evfiane kaamo: ¹⁰ Bhikita, seeai na bhushe bhese! ¹¹ Ka kaamo; bhbai Bhwáná, nuwe bhikita bhitopa, un'bibai na djumbo, nuwe bhushe bhatopa! ¹² Isaya avfia dyokuto: ivfundue á libhoti la Yese mona, undjo utemie dyulu la itabhala á bhikita, bhikita bhan'ikpalie djie. ¹³ Kia Mbali wa ikpalia anu idjalisia na isea litopa kà na bhuguwe bhútopa á idjelia mungusá nugwali bhaidjali na ikpaliá,na lokulú la mpumatima wa kengo. ¹⁴ Na iyo inebhoni nuwe, bhomonima, eminukulu aao è mudjibhe taa, nu bhaidjalé nakulu ya ékima, nu idjalé na otinga lutopa, ka bhatoke ikomulana bhaa na bhaámo. ¹⁵ Na dyito, á namuna yomo, énékpalua nuwe na hali ya nvfevfene toku iné djulia nuwe bhio bhieta, na isowa la lokowa lio Mbali wa induwa, ¹⁶ Ta igwali n'kambia wa Yesu Kilisito anga bha pagano, na ikambisia mokambo wa bha gwali sadhaka yese ya ékima, ékengulane na mpumatima wa kengo. ¹⁷ Ikotiyo na koko ya idji bibisia anga Yesu Kilisito, na éyo ibhonie bhima bha Mbali. ¹⁸ Ngo indje pasiami ivfia éma ta émoi iyo Kilisito sa kiéese angami dyulu la ikenisia bha pagano á iesimia, na livfia ka na mekambo, ¹⁹ Na lokulu la bhikako ka na mekambo, na lokulu la mpumatima wa Mbali, namuna taa, iyandja á Yelusalema ka á bhékita bha mibhongo, mpaka kú á Ililiko, imala ivfandja égi livfia la Kilisito. ²⁰ Ka ya djiowá obibo la ikókólia livfia dyaa Kilisito sabhiese mu kpalane ambusa na mbèse ikpela á bhékpua bha bháamo toku ikpaluana: ²¹ Bhaa bhabhi abhó bha óké ikókólia, bhe énie; bhaa bha bhiabho bha oké ivfia, bha djibhie. ²² I iyo isikisia saa étopa ikiana anganú. ²³ Toku ketetino, inde tèse na éma éyo isikisie nuwa, ka na igwala bhidjo ta bhigi na kulu wa ikéna anganú, ²⁴ Ya kpalia inéna nuwe dyaa iyetiye, dya ikenie á Sipania, ka, tukeni mulungo, ambusa na émi imalisia ta bhua kúlú wami wa igwala anganú. ²⁵ Dyano ya kéna á Yelusalema, dyulu la mokambo wa bhaa bha kéngo. ²⁶ Ngo bha Makedhonia ka na bha Akaya bhúóndha ikia mokandjo dyulu la bhabhóka bha bhaa bha kengo bha Yelusalema. ²⁷ Bhubha ónda ta ékima, ka ibhá éwezekane bhabha kilia, ngo ani bha pagano bhu udha fiadha dyabhó dja mipumatima, iwezekani dyokuto vfulia ábhima bha mobhi. ²⁸ Dyaa émalie únguso úno ka dyaa ékpudhusie maówa mánò, ékenie á Esepania ka iyetiye anganu. ²⁹ Idjibhie taa na ikéna anganú, igwali muidjalé na bhalaka bha Kilisito dyaa iidje iyo. ³⁰ Yane komola nuwe, bhamonima, na Bhwáná bhwasu Yesu Kilisito, ka na bhoúndhusia bha mpumatima, na isianisia, na ivfémá anga Mbali dyulu lámi, ³¹ Ambusa taa igwali m'bhikisiané anga bhaa bhandje dji bhiabho Mbali á Yudheya; ka ta ma owa maa ya vfevfa à Yelusalema magwali ma djeliané na bhaa bha kengo, ³² Namuna taa ekiana anganu na iseea, ani iiyonda la Mbali, ka ta éseya. ³³ Kia Mbali wa bhu gúwé agwali nanú bhatopa! Inóó!