¹ Yanékomola nuwe kotiyo, bha monima, na bhukuku bha Mbali na iowa mebhi manu toku sadhaka ya ébhike, kéngo, ékima anga Mbali ikambila lanu ligwali na énu. ² Mbèse nuwe iyekana na bhya masi mano, gwalai bhané bhasie na otinga la basi, mungusa nu djibhi ikakanua iyo i ionda la Mbali, iyo i ékima, édjeliané ka ésimé. ³ Na lokowa, luwo i owana, yavfia anga kila mushé wanú na mbese igwala idje mukulu aao na mawazo ma ikulu, ngé na igwala na mawazo ma otingá, iyekana na képimo wa idjelia liyo Mbali ú owa anga mushé n'topa. ⁴ Mungusa, toku tu na mango magi a mobhi ku umoi, ka mango maa matopa mandje kambiese namuna ku émoi, ⁵ na éyo djuwe bhaa tubhagi, tu mobhi ku umoi anga Kilisto, ká tú mango bhaa na bha amo. ⁶ Mungusa tu na maowa kuvfikuvfi, iyekana na lokowa luwo tu owana, kia undjo ú naliowa la iyénga á éngi iyekana na idjélia; ⁷ kia undjo ú m'bhisiané a mokambo a kambi mokambo wese, kia undjo ugulusiè adji owa a igulusia lèse. ⁸ Ka undjo ú dyedyie á dyedyi. Kia undjo ú ouwe aowa na uhulu; kia undjo útelemilie mokambo á ku na n'vfevfene; kia undjo ú énie bhukuku á kii na iséa. ⁹ Kia bhuondusia migwali mbese bhu swélé. Ondua ai ikia bhubhi, dungia nai la kpingbi á bhusumba. ¹⁰ Na bhu ondusia bha liwanyinya, gwalai bha idjalé, na iyondana bhaa na bha amo na ésima, ikpékisiana bhaa na bha ania. ¹¹ Gwalai na n'vfévféné, ka mbese na bhulelu. Gwalai na mpumatima n'tshuwané. Kambilai Bhwáná. ¹² séiai na ikpalia. Gwalai na ibhélia abhu ondusia. Livfiai a ivféma. ¹³ Ubhaowai bhaa bha kéngo kúlú djabho. Bhigai bhushé. ¹⁴ Bhalikiai bhaa bhane énisi núwe mpuli, nu bha bhalikiai ka mbese ibha tunaka. ¹⁵ eiai na bhaa bha seie, lilai na bhaa bha lilie. ¹⁶ Gwalai na kúlú ku émoi bhaa na bha amo. Mbese núwe iavfisia kúlú djanú á bhima bha dhene, ondai iyo inedulisia. Mbese nuwé idji éna nuwe bhakulu bhaao na bhutumba. ¹⁷ Nú iganisianu anga mushé bhubhi á bhubhi. Vfungalai iyo i ya ekima á pélé na bhushé bhatopa. ¹⁸ Ani ya wezekana; na iyo inébhonie núwé, gwalai na bhuguwé na bhushé bhatopa. ¹⁹ Mbèse núwé i úna nuwé bhakulu bhaao, bha ondusia bhami, ngé tikilai bhusungu bhu djikii ku bhanènè; mungusa ikpaluana: angami i na i una, angami i na ivfinda, uvfia Bhwáná. ²⁰ Ngé ani akodhu wai ú na égwa, umuwa ya idhia; ani ú na yamá, ú muwa má inyúwá; mungusá ná ikia dyito, i makoká ma isala máa n'kikilia a n'tuwe wese. ²¹ Mbèse idji tikilisia taá bhubhi bhunétoki, nge bhukima bhú toki bhubhi.